মাজুলী, ১৪ অক্টোবৰ: স্বাস্থ্য়খণ্ডত অভূতপূৰ্ব উন্নয়ন হোৱা বুলি চৰকাৰে দাবী কৰাৰ সময়তেই ঠেলাত কঢ়িয়াবলগীয়া হৈছে মৃতদেহ । তাকো এক বা দুই কিলোমিটাৰ নহয়, ২০ কিলোমিটাৰ ঠেলাত কঢ়িয়ালে মৃতদেহ । চিকিৎসালয়ৰ পৰা মৃতদেহ ঘৰলৈ অনাৰ সময়তেই বিপদে লগ এৰা নিদিয়া এটা দুৰ্ভগীয়া পৰিয়ালৰ এই ছবিখনে প্ৰতিফলিত কৰিছে স্বাস্থ্য়খণ্ডত হোৱা উন্নয়নৰ স্বৰূপ ।
সত্ৰপীঠ মাজুলীত সংঘটিত হৈছে এক হৃদয় বিদাৰক ঘটনা । ঘটনা অনুসৰি যোৱা দেওবাৰে নিশা প্ৰায় ৯.৩০ বজাত চামগুৰি বনিয়া গাঁৱৰ দীপালী সেনাপতি নামৰ এগৰাকী মহিলাক ১০৮ সেৱাৰে গড়মূৰ জিলা চিকিৎসাললৈ নিয়া হৈছিল । গড়মূৰ চিকিৎসালয়ত উপস্থিত হোৱাৰ পাছত এম্বুলেঞ্চখনৰ ওপৰতে চিকিৎসকে পৰীক্ষা কৰি মহিলাগৰাকীক মৃত বুলি ঘোষণা কৰে ।
নিশা গড়মূৰ জিলা চিকিৎসালয়ৰ পৰা দীপালী সেনাপতিৰ মৃতদেহ ঘৰলৈ অনাৰ সময়তেই পাঁচ কিলোমিটাৰ অহাৰ পাছত পথত বিকল হয় স্বৰ্গৰথ । নিশা ১২.৩০ বজাত সংঘটিত হয় এই ঘটনাটো । স্বৰ্গৰথ বিকল হোৱাত প্রায় ২০ কিলোমিটাৰ দূৰৰ চামগুৰি বনিয়া গাঁৱৰ পৰা পৰিয়ালৰ লোকে এখন ঠেলা নি ঘৰলৈ আনিব লগা হয় মহিলাগৰাকীৰ মৃতদেহ ।
দুৰ্ভগীয়া মহিলাগৰাকীৰ পৰিয়ালৰ লোকে নিশাই গড়মূৰ আৰক্ষীৰ সৈতে যোগাযোগ কৰিছিল যদিও কোনো সুফল লাভ নকৰিলে । দুই লাখ জনসাধাৰণৰ আজিৰ তাৰিখত একমাত্ৰ ভৰসা মৃতদেহ কঢ়িওৱা এখন স্বৰ্গৰথ । ফলত মাজুলীত এই হৃদয় বিদাৰক ঘটনাটো সংঘটিত হয় ।
নিশা মৃতদেহ ৰাজপথত ৰাখি ২০ কিলোমিটাৰ দূৰৰ পৰা ঠেলাৰ ব্যৱস্থা কৰি মৃতদেহ আনিব লগা হোৱা ঘটনাই সমগ্ৰ মাজুলীত তীব্ৰ প্ৰতিক্ৰিয়াৰ সৃষ্টি কৰিছে । পৰিয়াল তথা আত্মীয়ই চৰকাৰে মাজুলীবাসীৰ সুবিধা হোৱাকৈ অতি কমেও তিনিখন স্বৰ্গৰথৰ ব্যৱস্থা কৰিবলৈ আহ্বান জনাইছে ।
