ৰঙিয়া, ১৬ জুন : ৰাজহ আৰু ঋণৰ ওপৰত নিৰ্ভৰ কৰি ৰাজ্য পৰিচালনা কৰি থকা অসম চৰকাৰে শেহতীয়াকৈ মদ বিক্ৰীত বিশেষ গুৰুত্ব প্ৰদান কৰিছে ৷ মদৰ দাম বৃদ্ধি কৰাই নহয়, সুৰাপায়ীক যাতে বেছিকৈ মদ খুৱাব পাৰে, তাৰ বাবে মদৰ বিপণীসমূহক দিছে টাৰ্গেট ৷
প্ৰতিমাহে মদৰ বিপণীসমূহে কিমান লিটাৰকৈ মদ বিক্ৰী কৰিব লাগিব, সেয়াও নিৰ্ধাৰণ কৰি দিছে চৰকাৰে ৷ মুঠতে মদৰ পৰা ৰাজহ সংগ্ৰহ বৃদ্ধি কৰাৰ বাবে সকলো ধৰণৰ চেষ্টা অব্যাহত ৰাখিছে অসম চৰকাৰে ৷
চৰকাৰৰ এই কষ্টৰ বিপৰীতে ৰাজ্যত এক বিপৰীত ছবি দেখা গৈছে ৷ অসম চৰকাৰৰ কষ্টৰ প্ৰতি অলপো সহানুভূতি নেদেখুৱাই, পদক্ষেপৰ প্ৰতি অলপো সহযোগিতা আগনবঢ়াই অসমৰ সুৰাপায়ীক চুবুৰীয়া দেশৰ মদ খুৱাই আছে একাংশ বেপাৰীয়ে ৷
লগতে পঢ়ক: অসমত সুৰাৰ বিক্ৰী বৃদ্ধি কৰিবলৈ ব্যৱসায়ীক দিছপুৰৰ নিৰ্দেশ
সকলোৰে জ্ঞাত যে, অসমৰ মদৰ দামতকৈ চুবুৰীয়া অৰুণাচল প্ৰদেশ, মেঘালয় আদিত দাম যথেষ্ট কম ৷ সেই ৰাজ্যসমূহৰ মদ অসমত গোপনে প্ৰচলিত হৈ আহিছে, আবকাৰী বিভাগেও জব্দ কৰি আহিছে ৷ কিন্তু এইবাৰ অসমত ধৰা পৰিছে ভূটানৰ মদৰ ৰমৰমীয়া ব্যৱসায় ৷
চুবুৰীয়া ৰাষ্ট্ৰ ভূটানৰ পৰা সস্তীয়া দামত মদ ক্ৰয় কৰি অসমত বিক্ৰী কৰি থকা হৈছে তিনিগুণ অধিক দামত ৷ ভূটানত উপলব্ধ ৬০ টকীয়া মদৰ বটল অসম তথা ভাৰত হৈ আহি পৰেহি একো একোটা ব্ৰেণ্ডেড মদৰ বটল হিচাপে ৷ এনে মদৰ বিৰুদ্ধে দেওবাৰে তামুলপুৰত চলিল আবকাৰী বিভাগৰ বৃহৎ অভিযান ৷
অভিযানত জব্দ কৰা হয় ২৫ লক্ষাধিক টকা মূল্যৰ ভূটানৰ মদ ৷ তামুলপুৰৰ পংকজ কলিতা ওৰফে পিছলাৰ কেবাটাও গুদামত অভিযান চলাই এই বৃহৎ পৰিমাণৰ মদ জব্দ কৰা হয় ৷
লগতে পঢ়ক: গুৱাহাটীৰ সুৰাপায়ীয়ে দুদিনত গিলিলে ১১ কোটি টকাৰ সুৰা
জানিব পৰা গৈছে যে, বিগত বহুদিনৰ পৰাই ভূটানৰ পৰা মদবোৰ ক্ৰয় কৰি আনি নকলকৈ অসমৰ লেবেল-হলোগ্ৰাম বেপাৰ চলাই অহা হৈছিল ৷ একপ্ৰকাৰে এটা উদ্যোগলৈ পৰিণত হৈছিল ৷ এই খবৰ লাভৰ পিচতে আবকাৰী বিভাগে ৰঙিয়াৰ সমীপৰ দলংপাৰ, ঘগ্ৰা চক, চিকনীবাৰীকে ধৰি কেবাঠাইতো চলালে অভিযান ৷
অভিযানত ৪৬১ কাৰ্টুন ভূটানৰ মদ জব্দ কৰে অভিযানকাৰী দলটোৱে ৷ ইফালে আবকাৰী বিভাগৰ অভিযান চলাৰ উমান পাই পলায়ন কৰে পংকজ কলিতা ওৰফে পিছলাই । অভিযানকাৰী দলটোৱে ইতিমধ্যে পংকজ কলিতা ওৰফে পিছলাৰ পত্নীক সোধপোচৰ বাবে আটক কৰিছে ।
আচৰিত কথাটো হ’ল যে চুবুৰীয়া ৰাষ্ট্ৰ ভূটানৰ মুখ্য দুৱাৰত তীব্ৰ নিৰাপত্তাৰ লগতে তালাচী চলাই থাকে নিৰাপত্তাৰক্ষীয়ে ৷ তেনেস্থলত ভূটানৰ পৰা অসমলৈ কিদৰে ২৫ লক্ষাধিক টকা মূল্যৰ মদ আমদানি হ’ল, তাক লৈ সৃষ্টি হৈছে ঘন ৰহস্যৰ ৷
লগতে পঢ়ক: সুৰাৰ বিপণিৰ অনুজ্ঞাপত্ৰ দিয়া কাৰ্যৰ বিৰোধিতাৰে মহিলাৰ পথ অৱৰোধ
