ৰঙিয়া,৫ অক্টোবৰ: শাৰদীয় দুৰ্গোৎসৱলৈ মাজত মাত্ৰ কেইটিমান দিন । ৰাজ্যৰ বিভিন্ন প্ৰান্তৰ লগতে ৰঙিয়াৰ ভিন্ন প্ৰান্ততো দুৰ্গা পূজাক লৈ চলিছে ব্যাপক প্ৰস্তুতি । বিগত বহু বছৰ ধৰি সম্প্ৰীতিৰ নিদৰ্শনেৰে ৰঙিয়া নগৰত উদযাপন কৰি অহা হৈছে দুৰ্গোৎসৱ । যদিও দুৰ্গা পূজা মূলতঃ হিন্দুসকলৰ উৎসৱ আৰু সম্ভৱতঃ বিহুৰ পিছত আটাইতকৈ বৃহৎ উৎসৱ, কিন্তু ৰঙিয়া নগৰৰ মুছলমানসকলেও যুগ যুগ ধৰি দুৰ্গা পূজাৰ আঁৰত নীৰৱে বিশেষ ভূমিকা পালন কৰি আহিছে ।
মূৰ্তি নিৰ্মাণৰ বাবে ৰঙিয়াৰ আটাইতকৈ পুৰণি মূৰ্তি নিৰ্মাণস্থলীসমূহৰ ভিতৰত অজন্তা শিল্পালয়ে ৰঙিয়া আৰু কাষৰীয়া অঞ্চলত মূৰ্তিৰ প্ৰয়োজনীয়তা পূৰণ কৰি আহিছে আৰু শিল্পালয়খনৰ গৰাকীয়ে যুগ যুগ ধৰি তেওঁৰ শিল্পালয়ৰ বাবে কেঁচা সামগ্ৰী যোগান ধৰি অহাৰ বাবে চহৰখনৰ মুছলমান লোকসকলক ধন্যবাদ জ্ঞাপন কৰে ।
এই সন্দৰ্ভত অজন্তা শিল্পালয়ৰ বৰ্তমানৰ গৰাকী নন্দ পালে কয়,"মই এই শিল্পালয় চলাই থকা তৃতীয় প্ৰজন্ম । আমাৰ শিল্পালয় ১৯৫০ ৰ দশকৰ পৰা চলি আছে। ইয়াত কোনো হিন্দু বা মুছলমান বুলি ভেদাভেদ নাই । মুছলমানসকলে প্ৰজন্মৰ পাছত প্ৰজন্ম ধৰি আমাক সমানে সামগ্ৰী যোগান ধৰি আহিছে ।"
তেওঁ লগতে কয়,"আব্দুলে দীৰ্ঘদিন ধৰি আমাক মাটি আৰু তুঁহগুৰি যোগান ধৰি আহিছে । মই আৰু আব্দুল দুয়ো এতিয়া বুঢ়াই হৈছো, তেওঁ আমাৰ স্থায়ী যোগানকৰ্তাসকলৰ মাজৰ এজন ।" একেদৰে, পালে কয় যে খাবিৰ আহমেদে তেওঁক কাঠ, তুঁহগুৰি আদি যোগান ধৰে, যিবোৰ মূৰ্তি নিৰ্মাণৰ বাবে অত্যন্ত প্ৰয়োজনীয় । মূৰ্তি নিৰ্মাতাসকলক দুৰ্গা আৰু অন্যান্য মূৰ্তি তৈয়াৰ কৰিবলৈ এক বিশেষ মাটিৰ প্ৰয়োজন হয় ।
পালে লগতে উল্লেখ কৰে,"মূৰ্তিবোৰ তৈয়াৰ কৰিবলৈ আমাক যথেষ্ট বাঁহৰ প্ৰয়োজন । হিন্দু আৰু মুছলমান উভয়ে এই সময়চোৱাত আমাক প্ৰয়োজনীয় বাঁহ আদি যোগান ধৰে ।" উল্লেখ্য যে, অসমৰ ৰাজধানী চহৰ গুৱাহাটীৰ পৰা প্ৰায় ৩০ কিলোমিটাৰ দূৰত অৱস্থিত ৰঙিয়া হৈছে এক ব্যস্ত নগৰ । য'ত কমেও ১৫ খন সৰু আৰু ডাঙৰ পূজা উদযাপন কৰা হয় । এইক্ষেত্ৰত পালৰ অজন্তা শিল্পালয়ৰ মূৰ্তিবোৰৰ এক বিশেষ সমাদৰ আছে । এইবাৰ তেওঁলোকে ১৫ টাকৈ দুৰ্গা প্ৰতিমা নিৰ্মাণ কৰিছে । ইয়াৰ ভিতৰত ৮টা মূৰ্তি কাষৰীয়া অঞ্চলত উদযাপন কৰা পূজাস্থলীলৈ প্ৰেৰণ কৰা হ'ব । শিল্পালয়খনৰ কেৱল সাতটা মূৰ্তিহে ৰঙিয়া চহৰৰ পূজাস্থলীলৈ যাব ।
