গুৱাহাটী, ৭ ছেপ্টেম্বৰ : আজি গণেশ চতুর্থী । এই উপলক্ষে ৰাজ্যজুৰি গুঞ্জৰিত হৈছে সিদ্ধি বিনায়কৰ বন্দনা। ইফালে গণেশ চতুর্থী উপলক্ষে ভক্তই ভিৰ কৰিছে বিভিন্ন স্থানৰ গণেশ মন্দিৰত । ইয়াৰ ব্যতিক্ৰম নহয় গুৱাহাটী মহানগৰীও ।
গুৱাহাটী মহানগৰীৰ ঐতিহ্যমণ্ডিত গণেশগুৰিৰ গণেশ মন্দিৰ, লতাশিলৰ গণেশ মন্দিৰ, হাতীশিলা গণেশ মন্দিৰ, খানাপাৰা গণেশ মন্দিৰ, বতাহঘূলি গণেশ মন্দিৰত পুৱাৰে পৰা ভক্তই ভিৰ কৰিছে । আনহাতে, মহানগৰীৰ অন্যান্য ঠাইতো আয়োজন কৰা কৰা হৈছে সিদ্ধিদাতা গণেশৰ পূজা । পুৱাৰে পৰা গণেশ বাবাক দৰ্শনৰ বাবে ভক্তৰ লানি নিছিগা সোঁত বৈছে । গণেশ চতুর্থীক কেন্দ্ৰ কৰি মহানগৰীত এক উখল-মাখল পৰিৱেশে বিৰাজ কৰিছে ।
উল্লেখ্য যে হিন্দু ধৰ্মৰ তেত্ৰিশ কোটি দেৱতাৰ ভিতৰত গণেশ হৈছে অন্যতম । ঐতিহাসিক লতাশিল গণেশ মন্দিৰত আয়োজন কৰা হৈছে গণেশ চতুৰ্থীৰ । এদিনীয়া কাৰ্যসূচীৰে আয়োজন কৰা হৈছে গণেশ পূজা । গণেশ চতুৰ্থীৰ দিনটোত নিত্য নৈমিত্তিক পূজাৰ পিচতে ভক্তৰ বাবে মন্দিৰৰ দুৱাৰ খুলি দিয়া হয় ।
বিশ্ব শান্তিৰ বাবে ইয়াত আজি তিনিটা আহুতি দিয়া হ'ব । আনহাতে, মন্দিৰৰ সভাপতি ৰমেন বৰুৱা য'তে আছে ভালে-কুশলে থাকি আমাৰ মাজলৈ যাতে ঘূৰি আহে তাৰ বাবে আহুতি দিয়া হ'ব । সন্ধিয়া অনুষ্ঠিত হ'ব মহিলাৰ নাম । আৰতিৰ পিচত প্ৰদৰ্শিত হ'ব আতচবাজী ।
আনহাতে, গণেশগুৰি গণেশ মন্দিৰতো বিগত বৰ্ষৰ দৰে এইবাৰো গণেশ চতুৰ্থীৰ আয়োজন কৰা হৈছে । এইবাৰ ৪৯ সংখ্যক গণেশ চতুৰ্থী আয়োজন কৰা হৈছে । পুৱা ৬ বজাৰ পৰা ভক্তৰ বাবে মন্দিৰৰ দুৱাৰ খুলি দিয়া হৈছে । ১০ বজাৰ পৰা পূজা-অৰ্চনা আৰম্ভ হৈছে । দুপৰীয়া ১২ .১৫ বজাত মহা আৰতি অনুষ্ঠিত হ'ব । সন্ধিয়া নাম-কীৰ্তন কৰা হ'ব ।
