ডিব্ৰুগড়: ডিব্ৰুগড়ৰ ৰাজপথত টেম্পো চালকৰ গুণ্ডাৰাজ । টেম্পো চালকে যাত্ৰীক বিভিন্ন সময়ত দুৰ্ব্যৱহাৰ কৰাৰ অভিযোগ উত্থাপিত হৈ অহাৰ সময়তে এইবাৰ ডিব্ৰুগড়ৰ ৰাজপথত সংঘটিত হয় ভয়ংকৰ ঘটনা । ৰাজপথতে ইউনিফৰ্ম পৰিধান কৰি থকা মূকবধিৰ গৃহৰক্ষী জোৱানক প্ৰহাৰ কৰে টেম্পো চালকে ।
ঘটনা অনুসৰি, বুধবাৰে বিয়লি AS-06-BC-0081 নম্বৰৰ লেপেটকটাৰ পৰা অসম চিকিৎসা মহাবিদ্যালয়লৈ চলাচল কৰা এখন টেম্পোৰ চালকে ৰাজপথতে সংঘটিত কৰে নিৰ্লজ্জ কাণ্ড ।
ইউনিফৰ্ম পৰিধান কৰি বাইচাইকেলেৰে শ্বেন মেক নায়াৰ নামৰ গৃহৰক্ষী জোৱানজনে কৰ্তব্য সামৰি ঘৰমুৱা হওঁতে ৰাজপথতে সকলোৰে সন্মুখত তেওঁক প্ৰহাৰ কৰে টেম্পো চালকজনে । এই দৃশ্য প্ৰত্যক্ষদৰ্শী কিছু লোকে ম'বাইলত আবদ্ধ কৰি সামাজিক মাধ্যমত প্ৰচাৰ কৰাৰ পাছতে সৃষ্টি হৈছে ব্যাপক প্ৰতিক্ৰিয়াৰ ।
ইফালে এই ঘটনাৰ ভিডিঅ' সামাজিক মাধ্যমত ৰাজহুৱা হোৱাৰ পাছতে ডিব্ৰুগড় আৰক্ষীয়ে অভিযুক্ত চালক দিগন্ত মেধিক গ্ৰেপ্তাৰ কৰে ।
উল্লেখ্য যে ডিব্ৰুগড়ৰ শ্বেন মেক নায়াৰ নামৰ গৃহৰক্ষী জোৱানজনে দুটা দশকৰো অধিককাল বিনা বেতনেৰে ডিব্ৰুগড়ৰ থানা চাৰিআলিত যান-বাহন নিয়ন্ত্ৰণত ব্যস্ত হৈ নিঃস্বাৰ্থ সেৱা আগবঢ়াইছিল । ইয়াৰ পাছতে মাত্ৰ তিনিটা বছৰ পূৰ্বে খোদ আৰক্ষী সঞ্চালক প্ৰধানৰ নিৰ্দেশত তেওঁক নিয়মীয়াকৈ গৃহৰক্ষী জোৱান হিচাপে নিযুক্তি প্ৰদান কৰা হয় । মূকবধিৰ হ'লেও নিজকে এজন সফল যান-বাহন আৰক্ষী হিচাপে প্ৰতিষ্ঠিত কৰিবলৈ সক্ষম হৈছে শ্বেন মেক নায়াৰে । অৱশ্যে এই ঘটনা টেম্পো চালকজনে কিয় সংঘটিত কৰিলে সেই কথা আৰক্ষীৰ তদন্ততহে পোহৰলৈ আহিব ।
প্ৰহাৰ কৰা টেম্পো চালকৰ বিৰুদ্ধে এজাহাৰ দাখিল কৰিব পৰিয়ালবৰ্গই
আনহাতে, জনবহুল ৰাজপথত মূকবধিৰ এজন গৃহৰক্ষী জোৱানক প্ৰহাৰ কৰা ঘটনা সামাজিক মাধ্যমত প্ৰচাৰ হোৱা দেখি ক্ষোভিত হৈছে শ্বেন মেক নায়াৰৰ পৰিয়াল । গৃহৰক্ষী জোৱানগৰাকীৰ কন্যাই জানিবলৈ দিয়া অনুসৰি, টেম্পো চালকজনৰ বিৰুদ্ধে তেওঁলোকে এজাহাৰ দাখিল কৰিব । লগতে টেম্পো চালকজনৰ বিৰুদ্ধে ব্যৱস্থা গ্ৰহণ কৰিবলৈ দাবী জনাইছে পৰিয়ালটোৱে ।
