তেজপুৰ, 4 জুন : আজি তথা 4 জুনত দেশজুৰি লোকসভা নিৰ্বাচনৰ ভোটগণনা আৰম্ভ কৰা হ’ব ৷ ৰাজ্যৰ ভিন্ন প্ৰান্তৰ লগতে আজি পুৱা আঠ বজাৰ পৰা শোণিতপুৰ লোকসভাৰ ভোটগণনা আৰম্ভ হৈছে ৷ ইতিমধ্যে পুৱা 6 বজাৰ পৰা 11 নং শোণিতপুৰ লোকসভা সমষ্টিৰ ভোটগণনাৰ বাবে প্ৰস্তুতি আৰম্ভ কৰা হৈছে ৷ ভোটগণনাৰ বাবে সাজু কৰা হৈছে 620 গৰাকী বিষয়া-কৰ্মচাৰীক ৷
শোণিতপুৰ লোকসভা সমষ্টিৰ দৰং মহাবিদ্যালয়ত ঢেকিয়াজুলি, বৰছলা, তেজপুৰ, ৰঙাপৰা আৰু নদুৱাৰ বিধানসভা সমষ্টিক ধৰি মুঠ পাঁচটা বিধানসভা সমষ্টিৰ ভোটগণনা অনুষ্ঠিত হ’ব ৷ আনহাতে বিশ্বনাথত দুটা বিহালী আৰু বিশ্বনাথৰ, গহপুৰত গহপুৰ, লখিমপুৰ আৰু বিহপুৰীয়া বিধানসভা সমষ্টিৰ ভোট গণনা আৰম্ভ কৰা হ’ব ৷
তেজপুৰত জিলা নিৰ্বাচনী বিষয়া দেৱকুমাৰ মিশ্ৰ, জেনেৰল অৱজাৰভাৰ এম আৰ ৰবিকুমাৰ, আৰক্ষী অধীক্ষক বৰুণ পুৰকায়স্থৰ লগতে ৰাজনৈতিক দলৰ নিৰ্বাচনী এজেন্টৰ উপস্থিতিত ষ্ট্ৰং ৰুমৰ তলা খোলা হয় ৷ উল্লেখ্যে যে, শোণিতপুৰ লোকসভা সমষ্টিত ভোটৰ হাৰ আছিল 78.46% অৰ্থাৎ মুঠ 12 লাখ 81 হাজাৰ 959 জন ভোটাৰে ভোটদান কৰিছে ৷
ভোটগণনাৰ বাবে তেজপুৰত পাঁচটা বিধানসভা সমষ্টিৰ বাবে পাঁচটা কক্ষত 14 খনকৈ টেবুল, বিশ্বনাথত দুটা কক্ষত 12 খনকৈ টেবুল, গহপুৰ আৰু লখিমপুৰত 14 খনকৈ টেবুলত ভোটগণনা চলিব ৷ উল্লেখ্য যে, পোষ্টেল ভোটাৰ 6,400 আৰু ই টি পি বি এম এছৰ 3,100 ভোটৰ গণনা প্ৰথমতে আৰম্ভ হ’ব ৷ ইয়াৰ বাবে দুটা কক্ষত ক্ৰমে 13 খন টেবুল আৰু 20 খন টেবুলত গণনা আৰম্ভ কৰা হৈছে ৷ ভেটগণনা কেন্দ্ৰত তিনিতৰপীয়া নিৰাপত্তা বেষ্টনীৰ গঢ়ি তোলা হৈছে । সৰ্বমুঠ 19 টা ৰাউণ্ডত ভোটগণনা সমাপ্ত হ’ব বুলি জানিব পৰা গৈছে ৷
শোণিতপুৰ (পূৰ্বৰ তেজপুৰ) সমষ্টিৰ ইতিবৃত্ত -
11 নং শোণিতপুৰ লোকসভা সমষ্টি পূৰ্বতে 9 নং তেজপুৰ লোকসভা সমষ্টি আছিল । 1957 চনত মুঠ 9 টা বিধানসভা সমষ্টিৰে গঠিত হৈছিল সমষ্টিটো ৷
লোকসভা নিৰ্বাচনৰ ফলাফলৰ লাইভ আপডেটৰ বাবে ক্লিক কৰক https://www.etvbharat.com/as/!elections/lok-sabha-election-results-2024
সাংসদ তালিকা:
1957 চনত তেজপুৰ লোকসভা সমষ্টিৰ পৰা সাংসদ হিচাপে নিৰ্বাচিত হৈছিল স্বৰ্গীয় বিজয় চন্দ্ৰ ভাগৱতী ৷ ভাৰতীয় জাতীয় কংগ্ৰেছৰ পৰা তেওঁ 1957, 1962 আৰু 1967 চনলৈ 3 বাৰকৈ সাংসদ হৈছিল ৷ 1971 চনত কমলা প্ৰসাদ আগৰৱালা কংগ্ৰেছৰ পৰা সাংসদ হিচাপে নিৰ্বাচিত হয় । 1977 চনত ড৹ পূৰ্ণ নাৰায়ণ সিংহ জনতা পাৰ্টীৰ পৰা সাংসদ হিচাপে নিৰ্বাচিত হয় ।
1984 চনত বিপিন পাল দাস, 1991 চনত স্বৰূপ উপাধ্যায় আৰু 1996 চনত ঈশ্বৰ প্ৰসন্ন হাজৰিকা কংগ্ৰেছৰ পৰা সাংসদ হিচাপে নিৰ্বাচিত হৈছিল । ইয়াৰ পিচত 1998 চনৰ পৰা মণি কুমাৰ চুব্বা একাদিক্ৰমে কংগ্ৰেছৰ পৰা সাংসদ হৈ আছিল । 2009 চনত এই সংসদীয় সমষ্টিত প্ৰথমবাৰৰ বাবে অসম গণ পৰিষদৰ পৰা যোচেফ তপ্প সাংসদ হিচাপে নিৰ্বাচিত হয় । 2014 চনত বিজেপি দলৰ পৰা ৰাম প্ৰসাদ শৰ্মা , 2019 ত পুনৰ বিজেপিৰ পৰা পল্লৱ লোচন দাসে সাংসদ হিচাপে নিৰ্বাচিত ৷
লগতে পঢ়ক: কোনে মাৰিব শেষ হাঁহি ? কি বিচাৰে গুৱাহাটীৰ সাধাৰণ জনতাই ? - LOK SABHA ELECTION RESULTS 2024
2019 ত কোনে কিমান ভোট লাভ কৰিছিল -
2019 চনৰ নিৰ্বাচনত বিজেপিৰ পল্লৱ লোচন দাসে মুঠ 6,84,166 টা ভোট লাভ কৰি কংগ্ৰেছৰ এম জি ভি কে ভানুক পৰাস্ত কৰিছিল । ভানুয়ে 4,41,325 টা ভোট লাভ কৰিছিল ।
