সৰুপথাৰ, ২৩ জুন : ৰাজ্য়ৰ বিভিন্ন ঠাইত জল জীৱন আঁচনিয়ে ৰাইজক জলাকলা খুৱাই থকাৰ বাতৰি সঘনাই প্ৰচাৰিত হৈ আহিছে । ক’ৰ’বাত যদি পাইপ বহুওৱাৰ পিচতো ৰাইজে পানী পোৱা নাই, আন কোনো ঠাইত আকৌ ঠিকাদাৰে কাম সম্পূৰ্ণ নকৰাকৈয়ে দায়িত্ব সামৰাৰ অভিযোগ উত্থাপিত হৈছে ।
ইয়াৰ মাজতেই এইবাৰ গোলাঘাট জিলাৰ সৰুপথাৰ নগৰৰ ৯ নং ৱাৰ্ডত জল জীৱন আঁচনিৰ বাবে কৰি থকা কামেই অতিষ্ঠ কৰিছে জনসাধাৰণক । ঠিকাদাৰে পৌৰসভাৰ অনুমতি নোলোৱাকৈ ৯ নং ৱাৰ্ডৰ উপ-পথত কাম কৰাৰ অভিযোগ উত্থাপন কৰিছে স্থানীয় ৰাইজে ।
সৰুপথাৰ নগৰৰ ৯ নং ৱাৰ্ডৰ একাংশ বাসিন্দাই এই প্ৰসংগত আভিযোগ উত্থাপন কৰি কয় যে চৰকাৰে ঘৰে ঘৰে পানী পাব বুলি কোৱালৈকে সকলোখিনি ঠিকেই আছিল । পিচে ঠিকাদাৰৰ মইমতালিৰ বাবেহে ৱাৰ্ডটোৰ ৰাইজে হাৰাশাস্তি ভুগিবলগীয়া হৈছে । জনৈক মোস্তাফা নামৰ ঠিকাদাৰজনৰ নেতৃত্বত চলি থকা কামক লৈ ৰাইজৰ মাজত অসন্তুষ্টিয়ে গা কৰি উঠিছে ।
এই ৱাৰ্ডটোৰ পথৰ অৱস্থা দেখিলেই অনুমান কৰিব পাৰি ক্ষোভৰ উৎস কি ! পৌৰসভাৰ অনুমতি নোলোৱাকৈ ৯ নং ৱাৰ্ডৰ উপ-পথত কাম কৰিছে ঠিকাদাৰজনে । এই ক্ষেত্ৰত পৌৰসভাকো অৱগত কৰা নাই ।
