গুৱাহাটী, ২৫ এপ্ৰিল: কিমান অসহায় অনুভৱ কৰিলে এজন চিকিৎসকে এটা "চিষ্টেম"ৰ বিৰুদ্ধে গৈ নিজৰ মনৰ ভাৱ প্ৰকাশ কৰিব পাৰে ! সাধাৰণতে চিকিৎসকসকলে ঔষধ প্ৰেছক্ৰাইব কৰাৰ সময়ত ঔষধৰ মূল্যৰ কথা চিন্তা নকৰে নাইবা ৰোগীৰ ক্ৰয় ক্ষমতাৰ কথাও নাভাৱে ।
কিন্তু শেহতীয়াকৈ ঔষধৰ অস্বাভাৱিক মূল্যবৃদ্ধিয়ে চিকিৎসকসকলকো ভাবিবলৈ বাধ্য কৰাইছে । কাৰণ জীৱনদায়িনী ঔষধৰ অস্বাভাৱিক মূল্যবৃদ্ধিয়ে সাধাৰণ জনতাক বিপদত পেলাইছে । এনে এক পৰিস্থিতিৰ মাজতে এজন অসহায় চিকিৎসকৰ অকপট স্বীকাৰোক্তিয়ে ব্যাপক চৰ্চা লাভ কৰিছে ।
সামাজিক মাধ্যমত দিয়া এটা পোষ্টক লৈ সৰ্বত্ৰে ব্যাপক চৰ্চা হৈছে । দেখাত সাধাৰণ যেন লগা পোষ্টটোৱে বহুতৰে মনৰ বেদনা দাঙি ধৰিছে । ফেচবুকত দিয়া পোষ্টটো হৈছে এজন চিকিৎসকৰ । নাম ডাঃ সীমান্ত কোঁৱৰ । ডিব্ৰুগড়ৰ চিকিৎসক ডাঃ সীমান্ত কোঁৱৰে পোষ্টটোত লিখিছে - ‘‘১০ মিলি লিটাৰৰ এটা লুব্ৰিকেটিং চকুৰ দৰৱৰ দাম প্ৰায় ৪০০ টকাৰ পৰা ৭০০ টকা । গ্লোক'মাৰ দৰবৰ দাম তেনেকৈ ৩০০ টকাৰ পৰা ৮০০ টকা । যিবোৰ ৰোগীয়ে দীঘলীয়াকৈ ল'বলগীয়া হয় । গ্লোক'মা ৰোগত গোটেই জীৱন ল’ব লাগে । ৰোগীক লিখি দিবলৈকে টান লাগে । ১২৫০ টকা অৰুণোদয় আঁচনি পোৱাসকলৰ এনে ৰোগ নোহোৱাটোৱেই কামনা কৰিম ।’’
ডাঃ সীমান্ত কোঁৱৰৰ এই পোষ্টটো সামাজিক মাধ্যমত ব্যাপকভাৱে চৰ্চিত হৈছে । জীৱনদায়িনী ঔষধৰ এনে অস্বাভাৱিক মূল্যবৃদ্ধিক লৈ চিকিৎসকগৰাকীয়ে দিয়া অসহায় স্বীকাৰোক্তিয়ে সকলোকে ভাবিবলৈ বাধ্য কৰাইছে । এনে পৰিস্থিতিত কেনেদৰে সাধাৰণ জনতাই ৰোগৰ বিৰুদ্ধে যুঁজ দিব ! সবাটোকৈ তাৎপৰ্যপূৰ্ণ কথাটো হৈছে চিকিৎসকগৰাকীৰ পোষ্টটোৰ শেষৰ বাক্যশাৰী ।
‘‘১২৫০ টকা অৰুণোদয় আঁচনি পোৱাসকলৰ এনে ৰোগ নোহোৱাটোৱেই কামনা কৰিম’’- এই বাক্যশাৰীৰে চিকিৎসকগৰাকীয়ে কৈ গ'ল বহু কথা । অৰুণোদয় আঁচনিৰ নামত চৰকাৰে মহিলাসকলক মাহেকত ১২৫০ টকাকৈ দি বাঃ বাঃ লৈছে । ১২৫০ টকীয়া লাখ লাখ হিতাধিকাৰী সৃষ্টি কৰি চৰকাৰে জনতাক সকাহ দিয়াৰ কথা কৈছে যদিও বাস্তৱ ছবিখন বৰ দুখজনক । চিকিৎসকগৰাকীৰ পোষ্টটোৱে যেন তাৰেই ব্যাখ্যা দাঙি ধৰিছে ।
দেখাত সাধাৰণ যেন লাগিলেও বহতৰে মনত ক্ৰিয়া কৰিছে পোষ্টটোৱে । যাৰ বাবেই হৈছে চৰ্চা আৰু প্ৰতিক্ৰিয়া । যেন চৰকাৰখনে চামুচেৰে দি বেলচাৰে নিছে । কেৱল ঔষধেই নহয়, বিভিন্ন অত্যাৱশ্যকীয় সামগ্ৰীকে ধৰি বিভিন্ন সা-সামগ্ৰীৰ মূল্য আজি আকাশলঙ্ঘী হৈছে । মূল্যবৃদ্ধিৰ বাবে আজি সাধাৰণ জনতা দিশাহাৰা হৈ পৰিছে । কোনে শুনিব কাৰ কথা ? যাৰ বাবে এনেদৰে এজন চিকিৎসকে অসহায় স্বীকাৰোক্তি দিবলৈ বাধ্য হৈ পৰিছে ।
লগতে পঢ়ক: ঋণৰ বোজা সহিব নোৱাৰি চৰম পন্থা গ্ৰহণ কৃষকৰ
জীৱনদায়িনী ঔষধৰ ইছ্যু পৰিল বাদ, এইবাৰ বৃদ্ধি হ’ল আলুৰ মূল্য
ঔষধৰ দামবৃদ্ধিৰ পৰা কিদৰে পাব সকাহ? উপায় দিলে জয়ন্ত মল্লবৰুৱাই
