গুৱাহাটী, ২২ আগষ্ট : অসমৰ চাহ বাগিচাত হাস্পতাল আৰু স্কুলৰ উন্নয়নৰ বাবে কেন্দ্ৰীয় চৰকাৰৰ ৭০০ কোটি টকা অনুমোদন দিছে । বৃহস্পতিবাৰে বিধানসভাত এই কথা জনালে মুখ্যমন্ত্ৰী হিমন্ত বিশ্ব শৰ্মাই । বিধানসভাৰ শৰৎকালীন অধিৱেশনৰ বুধবাৰে চাহ বাগিচাৰ উন্নয়নৰ সন্দৰ্ভত প্ৰশ্নৰ উত্তৰ দি মুখ্যমন্ত্ৰীয়ে কয়, ‘‘প্ৰধানমন্ত্ৰী নৰেন্দ্ৰ মোদীয়ে অসম আৰু পশ্চিমবংগৰ চাহ বাগিচাৰ হাস্পতাল আৰু স্কুলৰ উন্নয়নৰ বাবে ১০০০ কোটি টকা দিছে । ইয়াৰে ৭০০ কোটি টকা অসমৰ বাবে ধাৰ্য কৰিছে ।"
তেওঁ কয়, ‘‘অসমৰ বাগিচা এলেকাত ১০০ খন হাইস্কুল নতুনকৈ নিৰ্মাণ কৰা হ’ব । আকৌ অহা বছৰ অসমৰ বাগিচা এলেকাত ১০ খন ডিগ্ৰী কলেজ নিৰ্মাণ কৰা হ'ব । এই কলেজ চাহ বাগিচাৰ শ্ৰমিকৰ সন্তানসকলৰ বাবে মুখ্যতঃ নিৰ্মাণ কৰা হ’ব । আকৌ ৯০০ খন বাগিচাত ৰাস্তা নিৰ্মাণ কৰাৰ বাবে ৯০০ কোটি টকা অসম চৰকাৰে ধাৰ্য কৰিছে । অহা বছৰ ৮ লাখ বাগিচাৰ শ্ৰমিকক ছাত্ৰ- ছাত্ৰীৰ পঢ়াৰ খৰচৰ বাবে নগদ ধন দিয়া হ’ব ।’’ মুখ্যমন্ত্ৰীয়ে জনাই যে শ্বহীদ দয়াল দাস পানিকা আঁচনিৰ বাবে আৱেদন কৰা ২৬০০ হাজাৰ আৱেদনকাৰীক অহা বছৰত এই আচঁনিৰ সুবিধা দিয়া হ’ব ।
বাগিচাৰ শ্ৰমিকৰ মজুৰি লৈ বিৰোধীৰে বাক-বিতণ্ডা মুখ্যমন্ত্ৰী :
বিধানসভাত চাহ বাগিচাৰ শ্ৰমিকৰ উন্নয়নৰ সন্দৰ্ভত মুখ্যমন্ত্ৰীয়ে উত্তৰ দি থকাৰ সময়ত মাজতে বিধায়ক অখিল গগৈয়ে মুখ্যমন্ত্ৰীক চাহ শ্ৰমিকৰ মজুৰি বৃদ্ধিৰ প্ৰশ্ন তোলে ৷ অখিল গগৈয়ে কয়, ‘‘বি জে পিয়ে চাহ শ্ৰমিকৰ মজুৰি ৩৫১ টকা বৃদ্ধিৰ প্ৰতিশ্ৰুতি পালন কৰিলে সকলো হৈ যাব ৷’’ মুখ্যমন্ত্ৰীয়ে উত্তৰত কয়, ‘‘ভাস্কৰজ্যোতি বৰুৱাই চাহ শ্ৰমিকৰ মজুৰি কেতিয়া বঢ়াব সেয়া ক'ব লাগে ৷’’
তেতিয়া বিৰোধী দলপতি দেৱব্ৰত শইকীয়াই থিয় হৈ কয়, ‘‘মুখ্যমন্ত্ৰীয়ে চৰকাৰৰ অধীনত থকা চাহ শ্ৰমিকৰ মজুৰি বৃদ্ধিৰ উত্তৰ দিব লাগে । বেলেগ কথা কৈ বিধানসভাৰ প্ৰশ্নকালীন সময় নষ্ট কৰিব নালাগে ৷ বি জে পিৰ ভিছন ডকুমেণ্টত চাহ শ্ৰমিকৰ মজুৰি ৩৫১ টকালৈ বৃদ্ধিৰ প্ৰতিশ্ৰুতি দিছিল । তাৰ উত্তৰ দিয়ক ।’’
তেতিয়া মুখ্যমন্ত্ৰীয়ে কয়, ‘‘নিজৰ ইতিহাস বেয়া । বি জে পিয়ে চাহ শ্ৰমিকৰ বাবে বহুত কৰিছে । কংগ্ৰেছে কি কৰিছে ?’’ এনেদৰে বিষয়টো তৰ্ক-বিতৰ্কলৈ যোৱাত শেষত বিষয়টোত বিধানসভাৰ অধ্যক্ষই হস্তক্ষেপ কৰে ।
লগতে পঢ়ক : ধৰ্মৰ ভিত্তিত মাটি কিনা-বেচাৰ বিধেয়ক উত্থাপন কৰাক লৈ বিৰোধীৰ সদন ত্যাগ
বিজেপিয়ে য’ত স্মাৰ্ট শব্দটো লগাই তাতেই গণ্ডগোল হয়: তেজপুৰত সাংসদ গৌৰৱ গগৈ
অসমৰ শিক্ষাৰ্থীক মাধমাৰ শোধোৱা সিদ্ধান্ত পৰিহাৰ কৰক: USTM বিতৰ্কক লৈ মুখ্যমন্ত্ৰীক সকীয়নি আছুৰ
