তেজপুৰ,২১ জুন: বৃদ্ধ বা জ্যেষ্ঠ অৱস্থাত বহু লোকে নিজৰ ঘৰখনতেই এলাগী হৈ পৰে । বৰ্তমান সময়ত দেখা যায় যে আধুনিকতাৰ ধামখুমীয়াত সন্তানেই এলাগী কৰে পিতৃ-মাতৃক । ফলত নিজে সজা ঘৰখন এৰি আহিবলৈ বাধ্য হোৱা বহু লোকে বৃদ্ধাৱস্থাত থাকিবলৈ এক আশ্ৰয়স্থল বিচাৰি হাবাথুৰি খাই থকা খবৰ প্ৰায়ে প্ৰকাশ পায় । কিন্ত এই বৃদ্ধসকলৰ বাবে সমাজত এতিয়া বহুজনে চিন্তা কৰিবলৈ আৰম্ভ কৰিছে । সেই উদ্দেশ্যেৰে তেজপুৰ মাজগাঁৱত নিৰ্মাণ কৰা হয় 'তপোবন' নামেৰে এক আশ্ৰয়গৃহ ।
জ্যেষ্ঠজনৰ বাবে নিৰ্মাণ কৰা আশ্ৰয়গৃহটি শুকুৰবাৰে আনুষ্ঠানিকভাৱে মুকলি কৰে মুখ্যমন্ত্ৰী ড৹ হিমন্ত বিশ্ব শৰ্মাই ৷ ভাৰতীয় শিশু কল্যাণ পৰিষদ, তেজপুৰ শাখাৰ সৌজন্যত বিয়াজু নামৰ সংস্থাটোৱে CSR কোষলৈ আগবঢ়োৱা ধনৰাশিৰে নিৰ্মাণ কৰি উলিওৱা তপোবন আশ্ৰয়গৃহ পুৰোহিতৰ মন্ত্ৰোচাৰণ আৰু উৰুলি, শংখধ্বনিৰ মাজত ফিটা কাটি মুকলি কৰে মুখ্যমন্ত্ৰীগৰাকীয়ে ৷ প্ৰথম পৰ্যায়ত আশ্ৰয়গৃহটোৰ তলৰ মহলাৰ নিৰ্মাণকাৰ্য সম্পূৰ্ণ হৈ উঠিছে আৰু অনাগত দিনত চৰকাৰে বাকী ৰোৱা কাম সম্পূৰ্ণ কৰি তুলিব বুলি উল্লেখ কৰে ৷
আনহাতে এইধৰণৰ আশ্ৰয়গৃহ প্ৰয়োজন সাপেক্ষে অসমৰ অন্য স্থানতো নিৰ্মাণ কৰা হ'ব বুলি মুখ্যমন্ত্ৰী হিমন্ত বিশ্ব শৰ্মাই জানিবলৈ দিয়ে । শোণিতপুৰৰ জিলা আয়ুক্তৰ তত্বাৱধানত এই আশ্ৰয়গৃহৰ তলৰ অংশৰ নিৰ্মাণকাৰ্য ইতিমধ্যে সম্পূৰ্ণ হৈছে । পৰৱৰ্তী সময়ত প্ৰথম মহলাৰ নিৰ্মাণকাৰ্য সম্পূৰ্ণ হ'লে আৰু বহু জ্যেষ্ঠ নাগৰিকক আশ্ৰয় প্ৰদান কৰিবলৈ সক্ষম হ'ব । বৰ্তমান সময়ত ১৫ জন লোকে আশ্ৰয় গ্ৰহণ কৰিব পাৰিব এই আশ্ৰয়গৃহত ।
