মৰাণ, 18 জুলাই: ঐতিহাসিক চৰাইদেউ মৈদাম ৰক্ষাৰ বাবে চৰাইদেউ জিলাত বন্ধৰ প্ৰভাৱ সৰ্বাত্মক । চৰাইদেউৰ সোণাৰি, সাপেখাতী আৰু মৰাণহাটত বন্ধৰ প্ৰভাৱ সৰ্বাত্মক । চৰাইদেউ মৈদাম ক্ষেত্ৰ জিলাখনত অন্তৰ্ভুক্তিৰ দাবীত চৰাইদেউ জিলা সুৰক্ষা সমিতি আৰু অন্যান্য স্থানীয় সহযোগী দল-সংগঠনে আহ্বান কৰা চৰাইদেউ জিলাত বন্ধৰ প্ৰভাৱ সৰ্বাত্মক পৰা দেখা যায় । বৃহস্পতিবাৰে পুৱা 6 বজাৰ পৰা সন্ধিয়া 6 বজালৈ অব্যাহত থাকিব এই বন্ধৰ কাৰ্যসূচী ।
উল্লেখ্য যে, ঐতিহাসিক চৰাইদেউ মৈদাম ক্ষেত্ৰক বিশ্ব ঐতিহ্যক্ষেত্ৰৰ তালিকাত অন্তৰ্ভুক্তিৰ বাবে চেষ্টা অব্যাহত ৰখাৰ সময়তে জিলাৰ সীমাকেন্দ্ৰিক বিবাদে চৰাইদেউ আৰু শিৱসাগৰ জিলাৰ মাজত সংঘাতৰ আৰম্ভণি ঘটায় ৷ 2015 চনতে চৰাইদেউক জিলা ঘোষণা কৰাৰ পাছতো আজিলৈকে শিৱসাগৰ আৰু চৰাইদেউ জিলাৰ সীমা নিৰ্ধাৰণ নকৰাত সূত্ৰপাত ঘটিছে সীমাকেন্দ্ৰিক বিবাদৰ ।
প্ৰশাসনিক দুৰ্বলতাৰ বাবেই আজিলৈকে দুয়োখন জিলাৰ সীমা নিৰ্ধাৰণ নোহোৱাৰ অভিযোগ উত্থাপন কৰিছে সচেতন মহলে । যাৰ পৰিপ্ৰেক্ষিতত চৰাইদেউ মৈদামক শেহতীয়াকৈ শিৱসাগৰ জিলাত অন্তৰ্ভূক্ত কৰাৰ বাবে উঠি-পৰি লাগিছে একাংশই ।
পূৰ্বে বিষয়টো মীমাংসা কৰি চৰাইদেউ মৈদাম ক্ষেত্ৰক চৰাইদেউ জিলাতে অন্তৰ্ভুক্ত কৰাৰ বাবে ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাই আশ্বাস প্ৰদান কৰিছিল যদিও এই আশ্বাস আজিলৈকে কাৰ্যকৰী নহ'ল ৷ সেয়ে বৃহস্পতিবাৰে চৰাইদেউ জিলা সুৰক্ষা সমিতি আৰু অন্যান্য সহযোগী দল-সংগঠনে চৰাইদেউ জিলা বন্ধ কাৰ্যসূচীৰ আহ্বান জনায় ৷
উল্লেখযোগ্য যে, বিশ্ব ঐতিহ্য ক্ষেত্ৰৰ স্বীকৃতি লাভৰ দিশত আগবাঢ়িছে চৰাইদেউ মৈদাম । ইউনেস্ক'ৰ বিশ্ব ঐতিহ্যক্ষেত্ৰৰ বাবে দাখিল কৰা মনোনয়ন প্ৰক্ৰিয়াত সকলো কাৰিকৰী প্ৰয়োজনীয়তা পূৰণ কৰিবলৈ সমৰ্থ হৈছে চৰাইদেউ মৈদাম ক্ষেত্ৰই । চৰাইদেউ মৈদাম ক্ষেত্ৰ হ'ল ২০২৩ বৰ্ষত ইউনেস্ক'ৰ বিশ্ব ঐতিহ্য ক্ষেত্ৰৰ স্বীকৃতি লাভৰ বাবে প্ৰেৰণ কৰা একমাত্ৰ মনোনয়ন ।
