শিলচৰ, 17 জুলাই: কাছাৰৰ ভূবন পাহাৰত আৰক্ষী আৰু উগ্ৰপন্থীৰ মাজত সংঘটিত হোৱা গুলীয়াগুলীৰ সন্দৰ্ভত প্ৰতিক্ৰিয়া প্ৰকাশ কৰিছে জিলা আৰক্ষী অধীক্ষক নোমল মাহাত্তাই ৷ আৰক্ষী অধীক্ষক মাহাত্তাই এই সন্দৰ্ভত কয় যে, মঙলবাৰে নিশা অভিযান চলোৱা আৰক্ষীৰ ওপৰত আক্ৰমণ চলাই উগ্ৰপন্থীসকলে ধৃত তিনি উগ্ৰপন্থীক পলাই লৈ যোৱাৰ পৰিকল্পনা কৰিছিল ৷
মৃত তিনি মাৰ উগ্ৰপন্থী মণিপুৰৰ হিংসাত্মক ঘটনাৰ সৈতে জড়িত থকাৰো সম্ভাৱনা ব্যক্ত কৰে কাছাৰৰ আৰক্ষী অধীক্ষকগৰাকীয়ে । কিয়নো মৃত তিনি উগ্ৰপন্থীৰ মাজৰ এজন মণিপুৰৰ আৰু আন দুজন কাছাৰৰ আছিল বুলি চিনাক্ত কৰিছে আৰক্ষীয়ে । সমগ্ৰ ঘটনা সন্দৰ্ভত আৰক্ষীয়ে তদন্ত অব্যাহত ৰখাৰ কথা জানিবলৈ দিয়ে কাছাৰৰ আৰক্ষী অধীক্ষকগৰাকীয়ে ৷
মঙলবাৰে নিশা ধৃত তিনি উগ্ৰপন্থীক লৈ আৰক্ষী অধীক্ষক নোমাল মাহাত্তাৰ নেতৃত্বত কাছাৰ আৰক্ষীৰ এটা দল অসম-মিজোৰাম সীমান্তৰ ভূবন পাহাৰত নামিছিল অভিযানত ৷ এই অভিযানৰ উমান পাই হঠাৎ পাহাৰৰ ভিতৰত লুকাই থকা আন উগ্ৰপন্থীবোৰে আৰক্ষীক লক্ষ্য কৰি গুলীবৰ্ষণ আৰম্ভ কৰে ।
প্ৰত্যুত্তৰত আৰক্ষীয়েও গুলীচালনা কৰে । প্ৰায় এঘণ্টা ধৰি আৰক্ষী আৰু উগ্ৰপন্থীৰ মাজত চলে এই গুলীয়াগুলী । দুই পক্ষৰ গুলীচালনাত গুলীবিদ্ধ হৈ মৃত্যু ঘটে আৰক্ষীয়ে লগত লৈ যোৱা তিনি মাৰ উগ্ৰপন্থী কেডাৰৰ । এই ঘটনাত আহত হৈছে তিনিজন আৰক্ষীৰ লোক । লগতে গুলীবৰ্ষণৰ ফলত যথেষ্ট ক্ষতিগ্ৰস্ত হৈছে কাছাৰ আৰক্ষীৰ কেইবাখনো বাহনৰ ।
উল্লেখ্য যে, ধলাইৰ গংগা নগৰত মাৰণাস্ত্ৰসহ তিনি যুৱকক সোমবাৰে আটক কৰিছিল কাছাৰ আৰক্ষীয়ে ৷ আৰক্ষীয়ে লগতে উদ্ধাৰ কৰিছিল এটা AK-47 আৰু এটা পিষ্টলসহ কেইবাজাঁই গুলী ।
লগতে পঢ়ক: হাতত AK-47 আৰু পিষ্টল লৈ গৈ আছিল তিনি যুৱক, বাটতে পালে আৰক্ষীয়ে
