গোৱালপাৰা, ১৭ জুলাই : গোৱালপাৰা জিলাৰ আগিয়া আৰক্ষী থানাৰ অন্তৰ্গত কল্যাণপুৰত অশোক গোৱেল নামৰ ব্যৱসায়ীজনক শূন্য দূৰত্বৰ পৰা গুলীয়াই হত্যা কৰা ঘটনাত জড়িত এটা অভিযুক্তক আৰক্ষীয়ে গ্ৰেপ্তাৰ কৰিছে । চিনেমাৰ কায়দাৰে ব্যৱসায়ীগৰাকীক হত্যা কৰা ঘটনাৰ অন্য়তম অভিযুক্ত জাহিদুল ইছলামক মঙলবাৰে নিশা মৰনৈ থানাৰ অন্তৰ্গত ৪ নং বলদমাৰী চৰৰ পৰা আৰক্ষীয়ে গ্ৰেপ্তাৰ কৰিবলৈ সক্ষম হয় ।
অশোক গোৱেলক গুলীয়াই হত্যা কৰা দলটোৰ গাড়ী চালক আছিল জাহিদুল ইছলাম । সোমাবাৰে নিশা ব্যৱসায়ীগৰাকীক পুত্ৰৰ সৈতে ধূপধৰাৰ পৰা গোৱালপাৰা চহৰলৈ গৈ থকা অৱস্থাত দুৰ্বৃত্তৰ দল এটাই শূন্য দূৰত্বৰ পৰা গুলীয়াই হত্যা কৰিছিল । অশোক গোৱেলৰ হত্যাকাৰী দলটোৰ গাড়ী চালক আছিল জাহিদুল ইছলাম । এই হত্যাকাণ্ডৰ সৈতে জড়িত আছে চাৰিটা অভিযুক্ত ।
আনহাতে, এই ঘটনাৰ মূল তিনি অভিযুক্ত বহিঃৰাজ্যত আত্মগোপন কৰি আছে বুলি আৰক্ষীয়ে উল্লেখ কৰিছে । ইতিমধ্যে ধৃত জাহিদুল ইছলামক গোৱালপাৰা সদৰ থানাত আৰক্ষীয়ে মাৰাথন জেৰা অব্যাহত ৰাখিছে ।
উল্লেখ্য় যে, এই ঘটনাটো সংঘটিত কৰাৰ পূৰ্বে তিনি দুৰ্বৃত্তই গাড়ীৰ পৰা নামি প্ৰথমে অশোক গোৱেলক মাৰপিট কৰিছিল ৷ অশোক গোৱেলৰ পুত্ৰই এই সন্দৰ্ভত উল্লেখ কৰা মতে, দুৰ্বৃত্তই মাৰপিটৰ পিচত ব্য়ৱসায়ীগৰাকীৰ পুত্ৰ আৰু গাড়ী চালকক গাড়ীৰ পৰা নমাই অশোক গোৱেলক গাড়ীখনৰ সৈতে ওচৰৰে এটা ভিতৰুৱা পথৰে লৈ যায় আৰু গাড়ীৰ ভিতৰতে শূন্য দূৰত্বৰ পৰা মূৰত গুলীয়াই হত্যা কৰে ৷ তাৰ পিচতেই দুৰ্বৃত্তৰ দলটোৱে গাড়ীত থকা নগদ ধনৰ টোপোলা লৈ ঘটনাস্থলীৰ পৰা পলায়ন কৰে ৷ আৰক্ষীয়ে উক্ত ঘটনা সন্দৰ্ভত তদন্ত অব্যাহত ৰাখিছে ।
