নগাঁও, ১৪ অক্টোবৰ: ৩ দিনৰ অন্তত সন্ধান ওলাল মৰিগাঁও কাৰাগাৰৰ পৰা পলায়ন কৰা এটা কয়েদীৰ । অৱশ্যে জীৱিত নহয়, মৃতদেহ পোৱা গ'ল কয়েদীটো । মৰিগাঁৱৰ লাহৰীঘাটৰ দেৱাগুৰি বিলত উদ্ধাৰ হয় কয়েদীটোৰ মৃতদেহ । ঘটনাটোক লৈ এতিয়া সমগ্ৰ মৰিগাঁৱতে তীব্ৰ চাঞ্চল্যৰ সৃষ্টি হৈছে ।
মৰিগাঁও কাৰাগাৰৰ পৰা কয়েদীৰ পলায়ন
উল্লেখ্য যে মৰিগাঁও কাৰাগাৰৰ দেৱাল বগাই একেলগে ৫ টাকৈ কয়েদীয়ে পলায়ন কৰিছিল । যোৱা শুকুৰবাৰে কয়েদীৰ পলায়নৰ খবৰ পোহৰলৈ আহিছিল । নাবালিকা ধৰ্ষণৰ দৰে জঘন্য অপৰাধৰ পৃথক পৃথক গোচৰৰ অভিযুক্ত ক্ৰমে ছৰিফ উদ্দিন, জিয়াৰুল ইছলাম, নুৰ ইছলাম, মফিদুল ইছলাম আৰু আব্দুৰ ৰছিদে পলায়ন কৰিছিল । অভিযুক্তকেইটাৰ বিৰুদ্ধে বিচাৰ প্ৰক্ৰিয়া চলি আছে মৰিগাঁও আদালতত ।
কিন্তু দুৰ্গা পূজাৰ মাজতে বৃহস্পতিবাৰে নিশা মৰিগাঁও কাৰাগাৰৰ পৰা একেলগে আটাইকেইটা অভিযুক্তই পলায়ন কৰাৰ পাচতেই এক প্ৰকাৰ হাহাকাৰ লাগে মৰিগাঁও কাৰাগাৰ কৰ্তৃপক্ষৰ লগতে মৰিগাঁও আৰক্ষীত । মৰিগাঁও জিলাৰ লাহৰীঘাট, মৈৰাবাৰীৰ লগতে শোণিতপুৰ জিলাৰ পৰা কৰায়ত্ত কৰি মৰিগাঁও কাৰাগাৰত ৰখা নাবালিকা ধৰ্ষণৰ অভিযুক্তকেইটাই কাৰাগাৰৰ পৰা পলায়ন কৰাৰ পাচতে আৰক্ষীয়ে অভিযান তীব্ৰতৰ কৰি তুলিছিল ।
লাহৰীঘাটত উদ্ধাৰ কয়েদীৰ মৃতদেহ
মৰিগাঁও আৰক্ষীয়ে অভিযান চলাই থকাৰ মাজতে সোমবাৰে পুৱা উদ্ধাৰ হয় আব্দুৰ ৰছিদ নামৰ কয়েদীটোৰ মৃতদেহ । লাহৰীঘাটৰ দেৱাগুৰি বিলত উদ্ধাৰ হয় মৰিগাঁও কাৰাগাৰৰ পৰা পলায়ন কৰা আব্দুৰ ৰচিদৰ মৃতদেহ । স্থানীয় ৰাইজে সন্দেহ কৰা মতে আৰক্ষীয়ে বিচাৰি থকাৰ উমান পাইয়ে দেওবাৰে সন্ধিয়া বিলত নৌকাৰ পৰা জঁপিয়াই পুনৰ পলায়নৰ চেষ্টা কৰিছিল আব্দুৰে । সম্প্ৰতি আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে । একেদৰে বাকী ৪ পলাতক কয়েদীক বিচাৰিও আৰক্ষীয়ে অভিযান চলাই আছে ।
উল্লেখ্য যে চলিত বৰ্ষৰ ২৮ মে'ত আব্দুৰ ৰছিদৰ বিৰুদ্ধে লাহৰীঘাট আৰক্ষী থানাত ৰুজু হৈছিল নাবালিকাক যৌন নিৰ্যাতন চলোৱাৰ গোচৰ । লাহৰীঘাট আৰক্ষী থানাত ১০৫/২০২৪ নম্বৰত POCSO আইনৰ অধীনত কেইবাটাও ধাৰাত ৰুজু হৈছিল গোচৰ । এই গোচৰতেই লাহৰীঘাট আৰক্ষীয়ে গ্ৰেপ্তাৰ কৰি বিগত মে' মাহত জে'ল হাজোতলৈ প্ৰেৰণ কৰিছিল আব্দুৰ ৰচিদক ।
