লখিমপুৰ,২৬ ছেপ্টেম্বৰ: যেন কালিকাহে লাগিছে ৰাজ্যৰ একাংশ বিদ্যা মন্দিৰত । ইটোৰ পাছত সিটোকৈ ঘটিব ধৰিছে অবাঞ্চিত কেতবোৰ ঘটনা । দৰঙৰ ছিপাঝাৰৰ পদুম পুখুৰী হাইস্কুলত সংঘটিত ঘটনাই জোকাৰি গৈছে ৰাজ্যক । শিক্ষাগ্রহণ কৰিবলৈ গৈ এচাম শিক্ষার্থীয়ে কৰা এনে কাণ্ডই সকলোকে স্তম্ভিত কৰি তুলিছে । এনে ঘটনাৰ চাঞ্চল্য মাৰ নৌ যাওতেই লখিমপুৰতো তেনে এক ঘটনাৰ কথা পোহৰলৈ আহিছে ।
ঘটনাটো কেইদিনমানৰ পুৰণি যদিও বৃহস্পতিবাৰেহে পোহৰলৈ আহে । ঘটনাৰ স্থান লখিমপুৰ চৰকাৰী উচ্চতৰ মাধ্যমিক বিদ্যালয় । জিলা আয়ুক্তৰ কাৰ্যালয়ৰ পৰা মাথো তিনিশ মিটাৰমান দূৰত আৰু জিলাৰ আৰক্ষী অধীক্ষকৰ কাৰ্যালয়ৰ সন্মুখতে থকা এই গৌৰৱোজ্বল ঐতিহ্য থকা বিদ্যালয়খনৰ ছাত্রৰ হাতত ওলাল লোহাৰে তৈয়াৰী অস্ত্ৰ । অষ্টম শ্রেণীৰ এজন ছাত্রই বেগত লৈ অহা এই অস্ত্ৰ শিক্ষকৰ তৎপৰতাত উদ্ধাৰ হয় ।
হাতত পিন্ধি লৈ আক্রমণ কৰিব পৰা এই লোহাৰে তৈয়াৰী অস্ত্ৰ শিক্ষকে উদ্ধাৰ কৰি গতাই দিয়ে অধ্যক্ষক । অধ্যক্ষই লগে লগে ছাত্রজনৰ অভিভাৱকক মাতি আনি সবিশেষ জনাই ছাত্রজনক গতাই দিয়ে । ছাত্রজনক সাময়িকভাৱে বিদ্যালয়ৰ শিক্ষাগ্ৰহণৰ পৰা আঁতৰাই ৰাখিছে যদিও ছমহীয়া পৰীক্ষা দিবলৈ অনুমতি দিয়া বুলি অধ্যক্ষগৰাকীয়ে জানিবলৈ দিয়ে ।
ছাত্রজনে কাৰোবাক কিবা উদেশ্যেৰে আক্রমণ কৰিবলৈ এই অস্ত্ৰ আনিছিল নে অন্য কিবা উদ্দেশ্য আছিল সেই কথা জানিব পৰা নাই । কেৱল শিক্ষকৰ তৎপৰতাৰ বাবেই যে বিদ্যালয়খনত কোনো অঘটন নঘটিল সেয়া স্পষ্ট হৈ পৰিল । বিদ্যালয়খনৰ অধ্যক্ষগৰাকীয়ে খেদ প্ৰকাশ কৰি কয়,"মুষ্টিমেয় একাংশ ছাত্রৰ অভিভাৱকে সন্তানৰ প্ৰতি বিশেষ দৃষ্টি নৰখাৰ ফলত উশৃংখলতা বাঢিছে । গুটখা জাতীয় সামগ্রী সেৱনৰ পৰা পাঠগ্ৰহণত অমনোযোগিতালৈকে বিভিন্ন দিশ দেখা গৈছে ।"
তেওঁ লগতে কয়,"সন্তানৰ ক্ষেত্ৰত অনুশাসনমূলক ব্যৱস্থা গ্ৰহণ কৰি একোজন সু-নাগৰিক হিচাপে গঢ় দিয়াত শিক্ষক সমাজৰ লগতে অভিভাবকসকলেও ভূমিকা ল'ব লাগে ।" পবিত্র বিদ্যা মন্দিৰৰ এনেবোৰ অনাকাংখিত ঘটনাই এতিয়া সচেতন লোক সকলক উদ্বিগ্ন কৰি তুলিছে । একাংশ অভিভাৱকে এতিয়া বিদ্যালয়ৰ চৌহদত নিজৰ সন্তানৰ নিৰাপত্তাৰ দিশটোক লৈ উদ্বিগ্নতা প্ৰকাশ কৰিছে ।
