গোলাঘাট: "শাসকীয় বিজেপি দলক পৰাভূত কৰিবলৈ হ'লে বিৰোধী ৰাজনৈতিক দলসমূহ আমি একত্ৰিত হ'বই লাগিব । বিৰোধী ঐক্য মঞ্চত যি ১৬ টা ৰাজনৈতিক দল আছোঁ, ফেচিবাদী বিজেপি, সাম্প্ৰদায়িক বিজেপি, ভাগ-ভাগ কৰা বিজেপি, বাকৰুদ্ধ কৰা বিজেপিক পৰাভূত কৰিবলৈ হ'লে পঞ্চায়ত নিৰ্বাচন, পৌৰ সভাৰ নিৰ্বাচনত উমৈহতীয়া যুঁজ দিব লাগিব ।" অখিল গগৈ ।
শনিবাৰে গোলাঘাট নগৰত আয়োজন কৰা দলৰ কৰ্মী সভাত অংশগ্ৰহণ কৰি সাংবাদিকৰ আগত এনেদৰে মন্তব্য কৰে ৰাইজৰ দলৰ সভাপতি অখিল গগৈৰ । কৰ্মী সভাৰ অন্তত তেওঁ কয়, "কংগ্ৰেছে আগন্তুক পঞ্চায়ত নিৰ্বাচনত যি অকলেই নিৰ্বাচন খেলাৰ সিদ্ধান্ত লৈছে, বিধানসভাৰ উপ-নিৰ্বাচনৰ দৰে কংগ্ৰেছে এনে আত্মঘাতী সিদ্ধান্ত নল'ব । উপ-নিৰ্বাচনৰ দৰে ভুলৰ পুনাৰাবৃত্তি আৰু কংগ্ৰেছে নকৰিব । তেওঁলোকৰ প্ৰতি ই মোৰ বিনম্ৰ অনুৰোধ । বিজেপিক জিকাবৰ বাবে নিৰ্বাচনত যিসকলে সুযোগ আনি দিব বিচাৰে, সেইসকলক মই কোৱা নাই । কিন্তু বিজেপিক যিসকলে পৰাভূত কৰাতো বিচাৰে, সকলো বিৰোধী ঐক্য মঞ্চৰ ৰাজনৈতিক দলক কৈছোঁ, আহক আমি একলগ হওঁ ।"
অখিল গগৈয়ে লগতে কয়, "পঞ্চায়ত নিৰ্বাচনত কোনে কিমান আসন লাভ কৰে সেইটো ডাঙৰ কথা নহয়, কিন্তু ২৬ ৰ নিৰ্বাচনৰ বাবে বিৰোধী ৰাজনৈতিক দলসমূহৰ মাজত একতা দৃঢ় হ'ব ।" ঐক্যমঞ্চৰ আধাৰ ৰূপে পঞ্চায়ত নিৰ্বাচনটোক ব্যৱহাৰ কৰিবলৈ তেওঁ আহ্বান জনায় । অন্যহাতে অৰুণোদয় আঁচনি মহিলা সকলক ব্লেক মেইলিং কৰাৰ হাঠিয়াৰ হিচাপে মুখ্যমন্ত্ৰী হিমন্ত বিশ্ব শৰ্মাই ব্যৱহাৰ কৰাৰ গুৰুতৰ অভিযোগ উত্থাপন কৰে অখিল গগৈয়ে ।
মুখ্যমন্ত্ৰী ড৹ শৰ্মা গোলাঘাট নগৰৰ সমন্বয় ক্ষেত্ৰত বিশাল চৰকাৰী কাৰ্যসূচীত উপস্থিত থকাৰ সময়তে নগৰৰ মৈত্ৰী সংঘত আয়োজিত ৰাইজৰ দলৰ অংশ লৈ সাংবাদিকৰ সমুখত মুখ্যমন্ত্ৰীৰ বিৰুদ্ধে আজি সোচ্চাৰ হৈ পৰে অখিল গগৈ ।
তেওঁ কয়, "অৰুণোদয় আঁচনিৰ নামত বিজেপি চৰকাৰে লেটেৰা ৰাজনীতি কৰিছে । মুখ্যমন্ত্ৰী ড৹ হিমন্ত বিশ্ব শৰ্মাই ৰেচন কাৰ্ড থকা সকলো মহিলাক অৰুণোদয় আঁচনি প্ৰদান কৰাৰ প্ৰতিশ্ৰুতি প্ৰদান কৰাৰ পাচত এতিয়া পাই থকা সকলৰো নাম কৰ্তন কৰি পুনৰ আবেদন জনোৱাৰ যি প্ৰক্ৰিয়া আৰম্ভ কৰিছে, ই ভোটৰ ব্লেক মেইলিঙৰ ৰাজনীতিৰ বাদে একো নহয় বুলি অভিযোগ কৰে ।" ইয়াৰোপৰি গগৈয়ে ৰেচন কাৰ্ড থকা অসমৰ সকলো মহিলাক অৰুণোদয় আঁচনিয়ে সামৰি ল'বলৈ তেওঁ দাবী জনায় ।
গোলাঘাট নগৰৰ মৈত্ৰী সংঘত আয়োজিত কৰ্মী সভাৰ জৰিয়তে অখিল গগৈৰ উপস্থিতিত ৰাইজৰ দলে গোলাঘাট জিলাত সাংগঠনিক আৰু ৰাজনৈতিক অভিযানৰ আনুষ্ঠানিকভাৱে পাতনি মেলে । গোলাঘাট জিলাত কৰ্মী বাহিনী গঠনেৰে সমষ্টি কেইটাত সাংগঠনিক তৎপৰতা আজিৰে পৰা বৃদ্ধি কৰিব । আজিৰ কৰ্মী সভাত কৃষক মুক্তি সংগ্ৰাম সমিতিৰ সম্পাদক বিদ্যুৎ শইকীয়া, ৰাইজৰ দলৰ গোলাঘাট জিলা সমিতিৰ সভাপতি প্ৰবীণ কুমাৰ দাস আদি উপস্থিত থাকে ।
