গুৱাহাটী,২১ আগষ্ট: অসম বিধানসভাৰ বৃহস্পতিবাৰৰ পৰা অনুষ্ঠিত হ'বলগীয়া শৰৎকালীন অধিৱেশনত মুছলমানৰ বিবাহ সম্পৰ্কীয় এখন গুৰুত্বপূৰ্ণ বিধেয়ক অনা হ'ব । 'দা আসাম কম্পালচৰি ৰেজিষ্ট্ৰেচন অফ মুছলিম মেৰিজ এণ্ড ডাইভৰ্চ বিল-২০২৪' বিধানসভাত উত্থাপন কৰাৰ বাবে আজিৰ কেবিনেটে অনুমোদন দিয়ে । মুখ্যমন্ত্রী হিমন্ত বিশ্ব শৰ্মাৰ পৌৰোহিত্যত আজি দিছপুৰৰ লোকসেৱা ভৱনত ৰাজ্য চৰকাৰৰ সাপ্তাহিক কেবিনেট বৈঠক অনুষ্ঠিত হয় । কেবিনেট বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয়। বৈঠকৰ অন্তত মুখ্যমন্ত্রী হিমন্ত বিশ্ব শৰ্মাই কেবিনেটৰ সিদ্ধান্তসমূহ সংবাদমেলযোগে সদৰী কৰে।
মুছলমান বিবাহ সম্পৰ্কীয় বিধেয়কত কেবিনেটৰ অনুমোদন :
আজিৰ কেবিনেটে 'দা আসাম কম্পালচৰি ৰেজিষ্ট্ৰেচন অফ মুছলিম মেৰিজ এণ্ড ডাইভৰ্চ বিল-২০২৪' বিধানসভাত উত্থাপনৰ বাবে মঞ্জুৰী দিয়ে । এই বিধেয়ক অনুসৰি এতিয়াৰে পৰা কাজিসকলে মুছলমান বিবাহৰ পঞ্জীয়ন কৰিব নোৱাৰিব । মুছলমান বিবাহ আৰু বিবাহ বিচ্ছেদৰ ১৯৩৫ চনৰ আইন অনুসৰি কাজিয়ে ১৮ বছৰৰ তলৰ বিবাহ পঞ্জীয়ন কৰাৰ অধিকাৰ লাভ কৰিছিল । কিন্তু এতিয়াৰে পৰা সেই ব্যৱস্থাৰ অৱসান ঘটিব । কাজিৰ সলনি উপ-পঞ্জীয়কে বিবাহ পঞ্জীয়ন কৰিব আৰু ১৮ বছৰ বয়সৰ তলৰ বিবাহ পঞ্জীয়ন নহ'ব । অৱশ্যে বিবাহ সম্পন্ন কৰাৰ ধৰ্মীয় প্ৰক্ৰিয়া পূৰ্বৰ দৰেই থাকিব ।
আসাম লেণ্ড ৰেভিনিউ এণ্ড ৰেজিষ্ট্ৰেচন আইন-১৮৮৬ত নতুন অধ্যায়ৰ সংযোজন :
আজিৰ কেবিনেটে আসাম লেণ্ড ৰেভিনিউ এণ্ড ৰেজিষ্ট্ৰেচন আইন-১৮৮৬ত নতুনকৈ অধ্যায় ১২ৰ সংযোজন ঘটায় । ইয়াত ৰাজ্যৰ ইতিহাস আৰু সাংস্কৃতিক ঐতিহ্যক সামৰি লোৱা হৈছে । আইকনিক গাঁথনিৰ ভেটিত 'হেৰিটেজ ব্লক' নিৰ্মাণ কৰি সংৰক্ষণ কৰা হ'ব । আঢ়ৈশ বছৰ পুৰণি ধৰ্মীয় আৰু সাংস্কৃতিক ঐতিহ্যক হেৰিটেজ ব্লক হিচাপে ঘোষণা কৰা হ'ব । এই ব্লকৰ ৫ কিলোমিটাৰ পৰ্যন্ত এলেকা সংৰক্ষিত কৰা হ'ব । এই সংৰক্ষিত এলেকাৰ মাটি ক্ৰয়-বিক্ৰয় সেই স্থানত তিনিটা প্ৰজন্ম বাস কৰা লোকহে কৰিব পাৰিব । বৰ্তমান বৰপেটা সত্র, বটদ্ৰৱা সূত্র আৰু মাজুলীকলৈ আৰম্ভ কৰা হৈছে । আবেদনৰ ভিত্তিত আঢ়ৈশ বছৰ পুৰণি ঐতিহ্যসমূহ সংৰক্ষিত কৰা হ'ব । এই এলেকাত ৫ কিলোমিটাৰ পৰ্যন্ত তিনিটা প্ৰজন্ম বাস কৰা মানুহেহে মাটি কিনা-বেচা কৰিব পাৰিব । মাজুলীৰ ক্ষেত্ৰত সমগ্ৰ জিলাখনতেই এই ব্যৱস্থা প্ৰযোজ্য হ'ব । তিনিটা প্ৰজন্ম বাস নকৰা লোকে মাজুলীত মাটি ক্ৰয়-বিক্ৰয় কৰিব নোৱাৰিব । বিচাৰিলে পৰৱৰ্তী সময়ত কামাখ্যা মন্দিৰকো আনিব পৰা যাব ।
গঠন হ'ব মাইক্ৰ ট্ৰাইবেল বেল্ট আৰু ব্লক :
ট্ৰাইবেল বেল্ট আৰু ব্লকৰ বাহিৰত অনুসূচীত জাতি আৰু জনজাতিৰ লোকসকলে বাস কৰা গাঁওসমূহ মাইক্ৰ ট্ৰাইবেল বেল্ট আৰু ব্লক কৰা হ'ব । ৮০ শতাংশ অনুসূচীত জাতি আৰু জনজাতিৰ লোকে বাস কৰা গাঁওসমূহ ট্ৰাইবেল বেল্ট আৰু ব্লকলৈ আহিব । গাঁওসমূহ চিনাক্ত কৰাৰ বাবে মন্ত্রী পৰ্যায়ৰ কমিটি গঠন কৰি দিয়া হৈছে ।
মিছন বসুন্ধৰাত মাটিৰ প্ৰিমিয়াম কম কৰা হ'ব :
মিছন বসুন্ধৰা-২ত মাটিৰ প্ৰিমিয়াম বেছি হোৱা বাবে বহু লোকে দিব পৰা নাছিল । এতিয়া দৰিদ্ৰ আৰু মধ্যবিত্ত লোকে ল'ব পৰাকৈ প্ৰিমিয়াম ধাৰ্য কৰাৰ বাবে মন্ত্রী পৰ্যায়ৰ কমিটি গঠন কৰা হৈছে । মন্ত্রী যোগেন মোহন আৰু অশোক সিংহলক ইয়াৰ বাবে দায়িত্ব দিয়া হৈছে । যাতে মিছন বসুন্ধৰা-৩ৰ যোগেদি ৰাইজে সুবিধা ল'ব পাৰিব ।
জীৱিকা সখীয়ে লাভ কৰিব স্কুটী :
জীৱিকা সখীৰ বাকী থকা ৫২৪২ গৰাকীয়ে লাভ কৰিব স্কুটী । আজিৰ কেবিনেটত এই সিদ্ধান্ত গ্ৰহণ কৰা হয় ।
অৰুণোদয়ত অন্তৰ্ভুক্ত হ'ব ১২ লাখ ৬০ হাজাৰ নতুন হিতাধিকাৰী :
ৰাজ্যৰ ২৭ লাখ লোকে লাভ কৰি আহিছে অৰুণোদয় । এইবাৰ প্ৰতিটো সমষ্টিত ১০ হাজাৰতকৈ নতুন হিতাধিকাৰী দিয়া হ'ব । মুঠ ১২ লাখ ৬০ হাজাৰ লোক নতুনকৈ অৰুণোদয়ত অন্তৰ্ভুক্ত হ'ব । অৰুণোদয়-২ ত আবেদন কৰাসকলেও অৰুণোদয়-৩ ত আবেদন কৰিব লাগিব । ৰেচন থাকিলেহে অৰুণোদয় পাব ।
সোনাল মানসিঙলৈ শ্ৰীমন্ত শংকৰদেৱ বঁটা :
বিশিষ্ট নৃত্যপটিয়সী সোনাল মানসিঙলৈ আগবঢ়োৱা হৈছে ২০২৩ বৰ্ষৰ শ্ৰীমন্ত শংকৰদেৱ বঁটা । আজিৰ কেবিনেটে এইক্ষেত্রত অনুমোদন জনায় । মুখ্যমন্ত্রীয়ে সংবাদমেলযোগে কয়, "লুৰীণজ্যোতি গগৈ আৰু জগদীশ ভূঞাই কৈ থাকে যে শংকৰদেৱ বঁটা কিয় দিয়া নাই । ২০০৮ চনত কংগ্ৰেছে সিদ্ধান্ত লৈছিল যে তিনি বছৰৰ মূৰে মূৰে শংকৰদেৱ বঁটা দিয়া হ'ব । সেই অনুসৰি তিনিবছৰৰ অন্তৰে অন্তৰে এই বঁটা প্ৰদান কৰি অহা হৈছে । কোনো এবাৰো মিছ হোৱা নাই । এইবাৰ বিশিষ্ট নৃত্যশিল্পী সোনাল মানসিঙক শংকৰদেৱ বঁটা প্ৰদান কৰা হ'ব । নৱেম্বৰত এই বঁটা দিয়া হ'ব ।"
মাধৱদেৱ তিথিৰ চৰকাৰী বন্ধ ২৪ আগষ্টত :
মহাপুৰুষ শ্ৰীমন্ত মাধৱদেৱৰ তিথিৰ চৰকাৰী বন্ধ ২৩ আগষ্টৰ পৰিৱৰ্তে ২৪ আগষ্টত হ'ব । মাধৱদেৱৰ তিথি ২৩ আগষ্টৰ বিয়লি হোৱাৰ বাবে বন্ধ পূৰ্ব ঘোষিত ২৩ আগষ্টৰ সলনি ২৪ আগষ্ট কৰা হৈছে ।
আনহাতে বিধানসভাৰ অধিৱেশনত পৰিবহণ কৰৰ ক্ষেত্রত বিধেয়ক অনাৰ বাবে আজিৰ কেবিনেটত সিদ্ধান্ত গ্ৰহণ কৰা হয় ।
