গুৱাহাটী : মাৰ-পিটতে শেষ হোৱা নাই সাহিত্য সভাৰ নিৰ্বাচনী বিতৰ্ক । এইবাৰ অসম সাহিত্য সভাৰ সভাপতিৰ নিৰ্বাচনত ভোটগণনাত আসোঁৱাহ বিতৰ্ক ! ভোটগণনা পদ্ধতিটোকে আসোঁৱাহপূৰ্ণ আখ্যা দি সমস্ত প্ৰক্ৰিয়াটোৰ পুনৰ বিবেচনা কৰিবলৈ নিৰ্বাচনী সমিতিক আহ্বান জনাইছে সভাপতি পদৰ প্ৰাৰ্থী উপেন ৰাভা হাকাচমে ৷ বিপৰীতে সাহিত্য সভাৰ ঘোষণা, পুনৰ কৰা নহয় ভোটগণনা । নিয়ম অনুসাৰেই হৈছে ভোটগণনা ।
দেওবাৰে উত্তৰ গুৱাহাটীৰ দদৰাত অসম সাহিত্য সভাৰ ২০২৫-২৭ বৰ্ষৰ বিভিন্ন বিষয়-বাবৰ বাবে হোৱা নিৰ্বাচনৰ ভোটগণনা অনুষ্ঠিত হয় ৷ অসম সাহিত্য সভাৰ সভাপতি হিচাপে নিৰ্বাচিত হ'ল সাহিত্যিক তথা অসম সাহিত্য সভাৰ প্ৰাক্তন প্ৰধান সম্পাদক ড৹ বসন্ত কুমাৰ গোস্বামী । গোস্বামীয়ে মুঠ ৪০৪টা ভোট লাভ কৰি সভাপতি হিচাপে নিৰ্বাচিত হয় ৷
আনহাতে তেওঁৰ প্ৰতিদ্বন্দ্বী বিশিষ্ঠ গৱেষক-সাহিত্যিক ড৹ উপেন ৰাভা হাকাচামে ৩২৫ টা ভোট লাভ কৰি ৭৯ টা ভোটত পৰাস্ত হয় । তাৰ পাছতেই উপেন ৰাভা হাকাচামে অসম সাহিত্য সভাৰ নিৰ্বাচন সমিতি আৰু উচ্চ ক্ষমতা সম্পন্ন সমিতিলৈ ভোট গণনাৰ বিষয়টি পুনৰ বিবেচনা কৰিবলৈ আহ্বান জনাই পত্ৰ প্ৰেৰণ কৰে ।
বিশিষ্ট গৱেষক-সাহিত্যিক উপেন ৰাভা হাকাচামে ভোটগণনাত আসোঁৱাহ দেখুৱাই পুনৰ বিবেচনাৰ পিছতহে ফলাফল ঘোষণা কৰিবলৈ আহ্বান জনাইছে । সভাপতিৰ বেলট কাকত খোলা ঠাইৰ পৰা আন ঠাইলৈ নি গননা কৰাৰ অভিযোগ উত্থাপন কৰিছে উপেন ৰাভা হাকাচামে ।
তেওঁ পত্ৰখনত উল্লেখ কৰিছে, “যোৱা ৫/১২/২৪ তাৰিখে মেঘদূত ভৱনত বন্ধ কৰা বেলট বাকচসমূহ যি ঠাইত খোলা হৈছে তাৰ পৰা সভাপতিৰ বেলট পেপাৰবোৰ স্থানান্তৰ কৰি অইন ঠাইত গননা কৰা হৈছে ৷”
লগতে ড৹ হাকাচামৰ বিস্ফোৰক অভিযোগ যে সভাপতিৰ বেলটবোৰ স্থানান্তৰ কৰোতে চাৰি ঘণ্টা সময় লৈছে । সেয়ে সমগ্ৰ নিৰ্বাচনী ভোটগণনা প্ৰক্ৰিয়াটো পুনৰ বিবেচনা পিছতহে ফলাফল গণনাৰ বাবে দেওবাৰে নিশা আবেদন জনাইছিল উপেন ৰাভা হাকাচামে ৷ আনহাতে হাকাচামৰ আহ্বান নেওচি দেওবাৰেই নিশা ফলাফল ঘোষণা কৰা হয় ৷
সোমবাৰে এই প্ৰসংগত অসম সাহিত্য সভাৰ সভাপতি সূৰ্যকান্ত হাজৰিকাই স্পষ্ট কৰি দিয়ে যে পুনৰ কৰা নহয় ভোট গননা । ড৹ হাকাচামৰ অভিযোগ খাৰিজ কৰি সভাপতি হাজৰিকাৰ মন্তব্য, “দেওবাৰে নিৰ্ধাৰিত নিয়ম অনুসৰিয়েই ভোটগণনাৰ পিছত ফলাফল ঘোষণা কৰা হৈছিলো । মেঘদূত ভৱনৰ পৰাই নিৰ্বাচনী ভোটগণনা প্ৰক্ৰিয়া আৰম্ভ হৈছিল । ছীল হৈ থকা বেলট বাকচ প্ৰতিনিধি সভাৰ মঞ্চত দেখুওৱাৰ পিছতহে গণনাৰ বাবে লৈ যোৱা হৈছিল ।’’
‘‘আনহাতে ভোটগণনাৰ পিছত সভাপতি পদৰ প্ৰাৰ্থী ড৹ উপেন ৰাভা হাকাচামৰ প্ৰতিনিধিয়ে ফলাফলত সন্মতি জনাই স্বাক্ষৰ কৰাৰ পিছতহে সভাপতি পদৰ ফলাফল ঘোষণা কৰা হৈছিল দেওবাৰে ৷ গতিকে পুনৰ ভোটগণনা নহয় ৷” সূৰ্যকান্ত হাজৰিকাই কয় ৷
