বৰপেটা, ১৬ জুন: বৰপেটা জিলাৰ হাউলীৰ বিস্তীৰ্ণ অঞ্চল কৃত্ৰিম বানৰ কবলত পৰিছে । বিগত কেইবাদিনৰ পৰা হৈ থকা নেৰানেপেৰা বৰষুণৰ ফলত পুনৰ সৃষ্টি হৈছে এই জটিল পৰিস্থিতিৰ । কৃত্ৰিম বানত ইতিমধ্য়ে হাউলী উচ্চতৰ মাধ্যমিক বিদ্যালয়ৰ সকলো শ্ৰেণীকোঠা, কাৰ্যালয় কক্ষ বুৰ গৈছে । তদুপৰি হাউলী পৌৰসভাৰ অধীনৰ প্ৰধানকৈ আঠ, ন আৰু দহ নম্বৰ ৱাৰ্ডৰ কেইবাহাজাৰ বাসিন্দাৰ স্বাভাৱিক জীৱনযাত্ৰা সম্পূৰ্ণ ব্যাহত হৈ পৰিছে । অসহায় হৈ পৰিছে সাধাৰণ জনতা ।
কৃত্ৰিম বানত বহু পৰিয়ালৰ ঘৰৰ মজিয়া একাঁঠু পৰ্যন্ত পানীত বুৰ গৈছে । এনেদৰে বাট-পথ, চোতাল, ঘৰ সকলো পানীৰে একাকাৰ হৈ পৰাত বহু পৰিয়ালে আত্মীয়-স্বজন অথবা আন কোনো স্থানত আশ্ৰয় গ্ৰহণ কৰিবলৈ বাধ্য হৈছে । এই সন্দৰ্ভত স্থানীয় লোকে অভিযোগ কৰি কয় যে, কৃত্ৰিম বানৰ সমস্যা হাউলীত দীৰ্ঘদিনৰ পৰা চলি আহিছে । এইবাৰ সমস্যাটো অধিক জটিল হৈছে ।
ৰাইজে ক্ষোভ প্ৰকাশ কৰি কয় যে, তেওঁলোকৰ এই সমস্যাটো সমাধানৰ বাবে হাউলী পৌৰসভাকে ধৰি সংশ্লিষ্ট সকলো পক্ষই গুৰুত্ব প্ৰদান কৰা নাই । পানী ওলাই যোৱা নলা নিৰ্মাণ নকৰাত পানী জমা হৈ থাকে । ইয়াৰ পৰিণাম সাধাৰণ জনতাই ভূগিব লাগে ।
হাউলী পৌৰসভাৰ ন নম্বৰ ৱাৰ্ডৰ ৱাৰ্ড কমিছনাৰ বিনয় ঘোষেও হাউলীত কৃত্ৰিম বানে দীৰ্ঘদিনৰ পৰা সমস্যাৰ সৃষ্টি কৰি অহা বুলি মন্তব্য কৰে । ৱাৰ্ডৰ ৱাৰ্ড কমিছনাৰ বিনয় ঘোষে কয় যে, য'তে ত'তে ঘৰ নিৰ্মাণ কৰাৰ ফলতেই এই সমস্য়াই জটিল ৰূপ ধাৰণ কৰিছে ।
