টীয়ক/চৰাইদেউ, ১ জুন: বাৰিষা আহিলেই টীয়ক নগৰাঞ্চলৰ বহু অঞ্চলতে সৃষ্টি হোৱা কৃত্ৰিম বানে আজি বছৰ বছৰ ধৰি জলাকলা খুৱাইছে নগৰৰ একাংশ জনতাক । বছৰি বানপানী নিষ্কাষণৰ বাবে পৌৰসভাই মাষ্টাৰ প্লেন প্ৰস্তুত কৰি পানী নিষ্কাষণ কৰাৰ আশ্বাস দি আহিছে যদিও প্ৰকৃততে পৌৰসভাই কি মাষ্টাৰ প্লেন কৰিছে সেয়া এতিয়া চকুৰ আগত । টীয়ক নগৰৰ ৮নং ৱাৰ্ডৰ অচ্যুত মাৰ্গৰ দৃশ্য দেখিলে চকৰু কঁপালত উঠে সকলোৰে ।
চলিত বৰ্ষৰ এপ্ৰিল মাহৰ পৰা উক্ত অঞ্চলত এইদৰে বানৰ সৈতে সহবাস কৰিছে ৰাইজে । অৱশ্যে ইয়াৰ মাজতে ৰাইজে বহুবাৰ পৌৰসভাক এনেবোৰ সমস্যা সমাধানৰ বাবে দাবী জনাই আহিছে আৰু পৌৰসভাৰ বিষয়া কৰ্মচাৰী আহি পৰ্যবেক্ষণ কৰিছে যদিও আজি পৰ্যন্ত কোনো সমাধান কৰিব পৰা নাই ।
দৰাচলতে উক্ত অঞ্চলত পানী নিষ্কাষণৰ কোনো সু-ব্যৱস্থা নলা-নৰ্দমা আৰু নৱনিৰ্মিত গৃহসমূহৰ নিৰ্মাণৰ সময়ত পৌৰসভাই চকু নিদিয়াৰ ফলতে এইদৰে সমগ্ৰ অঞ্চলটি বানৰ কবলত পৰিছে বুলি একাংশ অভিজ্ঞ ব্যক্তিয়ে মত প্ৰকাশ কৰে ।
আনফালে এজাক বৰষুণতে বুৰ গ'ল ঐতিহাসিক চৰাইদেউৰ সদৰ সোণাৰি চহৰ । সোণাৰি নগৰৰ নলা-নৰ্দমা নিষ্কাষণ নকৰাৰ বাবেই কৃত্ৰিম বানৰ সৃষ্টি হোৱাৰ অভিযোগ স্থানীয় ৰাইজৰ । কৃত্ৰিম বানত চৰাইদেউ জিলা যুটীয়া স্বাস্থ্য সঞ্চালকৰ কাৰ্যালয়ৰ চৌহদৰ লগতে বিভিন্ন শিক্ষানুষ্ঠান তথা ব্যৱসায়িক প্ৰতিষ্ঠান বুৰ যোৱাত সৃষ্টি হৈছে এক হাহাকাৰময় পৰিৱেশৰ ।
আনহাতে পৌৰসভাৰ অন্তৰ্গত আটাইকেইটা ৱাৰ্ডৰ বাট-পথৰ লগতে বাসগৃহৰ ভিতৰতো পানী সোমোৱাত সমস্যাৰ সন্মুখীন হৈছে সোণাৰিৰ ৰাইজ । শীঘ্ৰে উচিত পৰিকল্পনা কৰি নলা-নৰ্দমাৰ ব্যৱস্থা কৰিবলৈ আহ্বান জনাই সোণাৰি পৌৰসভাক ।
