ৰঙিয়া, 7 আগষ্ট: কামৰূপ জিলাৰ বেজেৰাত খাদ্যত বিষক্ৰিয়া হোৱাৰ ঘটনা সংঘটিত হৈছে ৷ এই বিষক্ৰিয়াৰ ফলত প্ৰায় 40 গৰাকীকৈ লোক চিকিৎসাধীন হ’বলগীয়া হৈছে বুলি জানিব পৰা গৈছে । আক্ৰান্ত লোকসকলৰ 12 গৰাকীক ৰঙিয়া আদৰ্শ চিকিৎসালয়ত ভৰ্তি কৰোৱা হৈছে ।
জানিব পৰা অনুসৰি, কামৰূপ জিলাৰ বেজেৰা নিবাসী দীনবন্ধু নাথৰ ঘৰত দেওবাৰে গৃহপ্ৰৱেশ উপলক্ষে এক অনুষ্ঠানৰ আয়োজন কৰা হৈছিল । এই অনুষ্ঠানটোত গৃহস্থই প্ৰসাদ হিচাপে বুট আৰু মগু আগবঢ়াইছিল ৷ সেয়া অনুষ্ঠানটোত উপস্থিত থকা লোকসকলে গ্ৰহণ কৰিছিল ।
দেওবাৰৰ দিনটোত কোনো লোকৰে একো হোৱা নাছিল যদিও সোমবাৰৰ দিনাখন শিশু-মহিলাসহ প্ৰায় 40 গৰাকী লোকৰ গাত খাদ্যৰ বিষক্ৰিয়া হোৱাৰ লক্ষণসমূহে দেখা দিয়ে । তাৰপিছত আক্ৰান্ত লোকসকলৰ অৱস্থাৰ অধিক অৱনতি ঘটাত গুৱাহাটী চিকিৎসা মহাবিদ্যালয় হাস্পতাল, এইমছ, বেজেৰা আৰু ৰঙিয়া আদৰ্শ চিকিৎসালয়ত ভৰ্তি কৰোৱা হয় ।
ৰঙিয়া আদৰ্শ চিকিৎসালয়ত মঙলবাৰৰ নিশা আক্ৰান্তসকলৰ 12 গৰাকী লোকক ভৰ্তি কৰোৱা হয় । চিকিৎসালয়খনত বৰ্তমান আক্ৰান্তসকলৰ চিকিৎসা অব্যাহত ৰখা হৈছে ।
এগৰাকী ভুক্তভোগীয়ে সংবাদ মাধ্যমৰ আগত কয়, "পৰিয়ালটোৰ অনুষ্ঠানটো 4 আগষ্টৰ দিনা আছিল ৷ অনুষ্ঠানত বুট-মাহ আদি প্ৰসাদ হিচাপে দিয়া হৈছিল ৷ উক্ত দিনা একো হোৱা নাছিল যদিও পিচদিনা অৰ্থাৎ 5 আগষ্টৰ দিনা অনুষ্ঠানটোত উপস্থিত থকা প্ৰতিগৰাকী লোকৰে বমি-শৌচ আদি হ’বলৈ ধৰে ৷ সকলোকে হাস্পতাললৈ প্ৰেৰণ কৰা হৈছে ৷ কিছুমানক গুৱাহাটী চিকিৎসা মহাবিদ্যালয় হাস্পতাল, এইমছ আদিলৈও লৈ যোৱা হৈছে ৷"
কিহৰ বাবে এই বিষক্ৰিয়াৰ ঘটনা সংঘটিত হৈছে, সেই বিষয়ে অৱশ্যে জানিব পৰা হোৱা নাই ৷ উপস্থিত লোকসকলে বুট-মাহৰ বিষক্ৰিয়া বুলিয়েই অনুমান কৰিছে ৷
