নলবাৰী,১৫ মে': দুৰ্নীতি নিৰ্মূল কৰাৰ বাবে ৰাজ্যৰ মুখ্যমন্ত্ৰী হিমন্ত বিশ্ব শৰ্মাই প্ৰশাসনক তৎপৰতা গ্ৰহণ কৰিবলৈ নিৰ্দেশ দিছে যদিও বিভিন্ন প্ৰান্তত অবাধে চলি আছে দুৰ্নীতি । বিভিন্ন আঁচনি ৰূপায়ণত সংঘটিত হোৱা দুৰ্নীতিক কেন্দ্ৰ কৰি অতিষ্ঠ হৈ পৰিছে ৰাজ্যৰ জনতা । এইবাৰ নলবাৰী জিলাৰ বৰক্ষেত্ৰী বিধানসভা সমষ্টিৰ অন্তৰ্গত চৰাঞ্চলৰ কালাৰচৰ গাঁও পঞ্চায়তৰ সভানেত্ৰীৰ স্বামীৰ বিৰুদ্ধে উত্থাপন হৈছে দুৰ্নীতিৰ অভিযোগ । চৰাঞ্চলৰ লোকসকলক সৌৰশক্তি চালিত সামগ্ৰী যোগান ধৰাৰ নামত ব্যাপক দুৰ্নীতিৰ অভিযোগ উত্থাপন হৈছে সভানেত্ৰীৰ স্বামী নিশান আলীৰ বিৰুদ্ধে ।
অভিযোগ অনুসৰি সৌৰশক্তি চালিত সামগ্ৰী আবন্টন হোৱা হিতাধিকাৰীৰ পৰা নিশান আলীয়ে ৩ হাজাৰকৈ টকা সংগ্ৰহ কৰাৰ অভিযোগ হিতাধিকাৰীৰ । পঞ্চায়ত সভানেত্ৰীয়ে সৌৰ শক্তিৰ সকলো সামগ্ৰী বিতৰণ কৰে যদিও সভানেত্ৰীগৰাকীৰ স্বামী নিশান আলীয়ে আজিলৈকে বেটাৰী যোগান নধৰিলে হিতাধিকাৰীসকলক । হিতাধিকাৰীসকলে বেটাৰীৰ কথা সুধিলে নিশান আলীয়ে আজি দিম, কালি দিম বুলি কৈ প্ৰায় দুবছৰে হিতাধিকাৰীসকলক বঞ্চনা কৰি অহাৰ অভিযোগ উত্থাপিত হৈছে । যাৰ ফলত অতিষ্ঠ হৈ সংবাদমাধ্যৰ কাষ চাপে হিতাধিকাৰীসকল ।
উল্লেখ্য যে সভানেত্ৰীগৰাকীৰ স্বামী নিশান আলীয়ে সৌৰ বেটাৰী আৱন্টনৰ নামত হিতাধিকাৰীৰ পৰা তিনিহাজাৰকৈ টকা সংগ্ৰহ কৰে বুলি অভিযোগ কৰে হিতাধিকাৰীসকলে । ৰাইজৰ অভিযোগ অনুসৰি ৰাইজে লাভ কৰিব লগীয়া বেটাৰীসমূহৰ আত্মসাৎ কৰি ক'লা বজাৰত বিক্ৰী কৰে সভানেত্ৰীৰ স্বামী নিশান আলীয়ে । সেয়ে ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাৰ লগতে জিলা প্ৰশাসনক ইয়াৰে এক উচিত তদন্ত কৰি দোষীক উপযুক্ত শাস্তি দিয়াৰ লগতে ৰাইজক ন্যায় প্ৰদান কৰিবলৈ অনুৰোধ জনাই বঞ্চিত হিতাধিকাৰীসকলে ।
