শিলচৰ, 27 ফেব্ৰুৱাৰী : ৰাজ্যজুৰি ক্ৰমাৎ বৃদ্ধি হৈছে মানৱ সৰবৰাহৰ ঘটনা ৷ বহিঃৰাজ্যত চাকৰি দিয়াৰ প্ৰলোভনেৰে বৰাক উপত্যকাৰ 30 গৰাকীৰো অধিক যুৱতীক বিক্ৰীৰ পৰিকল্পনা কৰাৰ গুৰুতৰ অভিযোগ উত্থাপন হৈছে এটা স্থানীয় প্লেছমেন্ট কোম্পানীৰ বিৰুদ্ধে ৷
অৱশেষত গাজিয়াবাদৰ পৰা পলাই আহিল 19 গৰাকী যুৱতী ৷ ইফালে হাৰিয়ানাৰ গাজিয়াবাদত এতিয়াও বন্দী আছে 11 গৰাকী যুৱতী ৷ শিলচৰস্থিত ভ্যেলুয়াৰ ফ্যাবটেক্স প্ৰাইভেট লিমিটেড নামৰ প্লেচমেন্ট চেন্টাৰৰ বিৰুদ্ধে উত্থাপন হৈছে এই গুৰুতৰ অভিযোগ ৷ অচিৰেই প্লেচমেন্ট চেন্টাৰটোৰ বিৰুদ্ধে ব্যৱস্থা গ্ৰহণৰ দাবী কৰিছে ভুক্তভোগীসকলে ৷
ইফালে এই অভিযোগ অস্বীকাৰ কৰে প্লেচমেন্ট চেন্টাৰৰ কৰ্তৃপক্ষই ৷ জানিব পৰা মতে, বহিঃৰাজ্যৰ বিভিন্ন নামকৰা হাস্পতালত নাৰ্ছৰ চাকৰি দিয়া প্ৰলোভনেৰে প্লেছমেন্ট চেন্টাৰটোৱে দিল্লীলৈ লৈ গৈছিল বৰাকৰ 30গৰাকীৰো অধিক শিক্ষিত যুৱতীক ৷ যোৱা 15 ফেব্ৰুৱাৰীত দিল্লীলৈ লৈ যোৱা হৈছিল যুৱতীসকলক ৷ তাৰ পিচতে দিল্লীত আটাইগৰাকী যুৱতীক গোপনে লৈ যোৱা হয় হৰিয়ানাৰ কাপাসেৰা চহৰত ৷ তাত এখন স্থানীয় হাস্পতালত নাৰ্ছৰ কামত নিয়োজিত কৰা হ’ব তেওঁলোকক ৷ কিন্তু তালৈ গৈ হতবাক হয় যুৱতীসকল ৷
যুৱতীসকলৰ ভাষ্য অনুসৰি, কাপাসেৰা চহৰৰ পতিতালয়ত ৰখা হৈছিল কেইবাগৰাকী যুৱতীক ৷ বাকীসকলক গাজিয়াবাদলৈ লৈ যোৱা হয় ৷
ইয়াৰ পিচতে ভুক্তভোগী যুৱতীসকলে জনায় যে, যি স্থানত তেওঁলোকক ৰখা হৈছিল সেইস্থান মূলতঃ পতিতালয় ৷ তেওঁলোকে এই বিষয়ক লৈ আপত্তি কৰাৰ পিচত কেইদিন মানক পিচত তেওঁলোকক উত্তৰপ্ৰদেশৰ গাজিয়াবাদলৈ লৈ যোৱা হয় ৷ কিন্তু তাতেও একেটা অৱস্থা ৷ তেওঁলোকক যি বিল্ডিঙত ৰখা হৈছিল সেই বিল্ডিঙৰ বাকী কোঠাসমূহত থকা যুৱতীসকলৰ ওচৰত ঘনাই ঘনাই অহা যোৱা কৰিছিল পুৰুষে ৷
বিভিন্ন অৰ্থনৈতিক কামত নিয়োজিত আছিল ৰূমত থকা যুৱতীসকল ৷ এই সমগ্ৰ ঘটনা দেখি 19 গৰাকী যুৱতী পলাই শিলচৰত উপস্থিত হয়হি ৷ বাকী 11 গৰাকী যুৱতী এতিয়াও গাজিয়াবাদত আছে বুলি জানিব পৰা গৈছে ৷
তাৰ পিচতে দেওবাৰে কাছাৰ আৰক্ষী অধীক্ষকৰ ওচৰত প্লেচমেন্ট চেন্টাৰটোৰ বিৰুদ্ধে অভিযোগ কৰিছে ভুক্তভোগী যুৱতীসকলে ৷
লগতে পঢ়ক: হাফলং শ্মশানত সামৰিক মৰ্যাদাৰে শেষকৃত্য সম্পন্ন সেনা জোৱান কমল যোশীৰ
