ডিব্ৰুগড়, ৫ ছেপ্টেম্বৰ : মুখ্যমন্ত্ৰীৰ কঠোৰ নিৰ্দেশত ডিব্ৰুগড়ৰ আৰক্ষীৰ নিজা গোচৰত গ্ৰেপ্তাৰ হৈ মাৰাথান জেৰাৰ সন্মুখীন হৈছে অনলাইন ট্ৰেডিঙৰ নামত কোটি কোটি টকা সংগ্ৰহ কৰা বিশাল ফুকন । বুধবাৰে ডিব্ৰুগড় আদালতত হাজিৰ কৰি বিশালক ৩ দিনৰ জিম্মাত লৈছে ডিব্ৰুগড় আৰক্ষীয়ে । আৰক্ষীৰ জেৰাত বিশাল ফুকনে অনলাইন ট্ৰেডিঙৰ প্ৰৱঞ্চনাৰে ধন সংগ্ৰহ কৰি কেনেকৈ ক'ত খৰচ কৰিছে তাৰ তথ্য শুনি আচৰিত হৈছে ডিব্ৰুগড় আৰক্ষী ।
- বিশাল ফুকনক জেৰা :
বিশালক জেৰাৰ পৰা লাভ কৰা প্ৰাথমিক তথ্য অনুসৰি, ৬০ কোটি টকা বিশাল ফুকনৰ লেনদেনৰ তথ্য লাভ কৰিছে ডিব্ৰুগড় আৰক্ষীয়ে । যিসমূহ বেংকত একাউন্ট থকাৰ তথ্য লাভ কৰিছে সকলো ছীল কৰিবলৈ বেংকসমূহলৈ পত্ৰ প্ৰদান কৰিছে ডিব্ৰুগড়ৰ আৰক্ষীয়ে । আৰক্ষীৰ মতে কম সময়ৰ ভিতৰত ৩০ শতাংশ মুনাফা দিয়াৰ প্ৰলোভন দি ধন সংগ্ৰহ কৰিছিল । বিনিয়োগকাৰীক আশ্বস্ত কৰিব পৰাকৈ নটাৰীৰ জৰিয়তে চুক্তি কৰে ।
১০০০ পৰা ১৫০০ লোকৰ পৰা বিশাল ফুকনে ধন সংগ্ৰহ কৰিছে । কেৱল অসমৰে নহয় বহিঃৰাজ্যৰো বহু ব্যক্তিয়ে ধন বিনিয়োগ কৰিছিল । আৰক্ষীৰ মতে, বিশাল ফুকনৰ এই লুণ্ঠন প্ৰক্ৰিয়া বহুত ডাঙৰ । ইয়াত বহু মানুহ জড়িত আছে । নিজে কিছু সম্পত্তি ক্ৰয় কৰাৰ লগতে চুমী বৰাৰ লগত বিভিন্ন ক্ষেত্ৰত ধনসমূহ খৰচ কৰিছে । আনৰ টকাৰে ক্ৰয় কৰা সকলো সম্পত্তি তদন্ত কৰিব আৰক্ষীয়ে ।
লগতে পঢ়ক : চুমীৰ 'ডেষ্টিনেশ্যন' ক’ত ? দীক্ষুৰ ঘৰত পুলিচ : নাম সাঙোৰ খাইছে বহু শিল্পীৰ - Bishal Phukan Trading Scam
- বিশালে নিজ মাতৃক উপহাৰ দিয়া MG Hector বাহন জব্দ :
বুধবাৰে নিশাৰ পৰা বিশালে আনৰ ধনেৰে ক্ৰয় কৰা সম্পত্তিৰ বিৰুদ্ধে অভিযান আৰম্ভ কৰিছে । বিশালক আটক কৰা সময়ত বিশালৰ বাসগৃহৰ পৰা বেংক আৰু ব্যৱসায় সমন্ধীয় নথি পত্ৰ, বিলাসী (Luxury) সামগ্ৰী, বিদেশী মুদ্ৰা জব্দ কৰা হৈছে ।
যাৰ পাচতে নিশা বিশাল ফুকনে নিজ মাতৃক উপহাৰ দিয়া ব্যয়বহুল AS06AL 6734 নম্বৰৰ MG Hector বাহনখন ডিব্ৰুগড়ৰ চৌকিডিংগী প্ৰভাঞ্জলী এপাৰ্টমেণ্টৰ পৰা জব্দ কৰিছে ডিব্ৰুগড় আৰক্ষীয়ে । আজিৰে পৰা বিশাল ফুকনে ক'ত ক'ত ধন বিনিয়োগ কৰিছে তাৰ উৎস বিচাৰি অভিযান চলাব ডিব্ৰুগড় আৰক্ষীয়ে ।
- চুমী বৰাক সদৰ থানাত হাজিৰ হোৱাৰ চমন জাৰি :
কিন্তু লক্ষ্যণীয় বিষয়টো হ'ল বিশাল ফুকনে অনলাইন ট্ৰেডিঙৰ নামত যি কোটি কোটি টকা সংগ্ৰহ কৰিলে তাৰ লগত অভিনেত্ৰী চুমী বৰা জড়িত থকাৰ কথা বিভিন্ন মাধ্যমত প্ৰকাশ হৈছে । লগতে বিশাল ফুকনে সংগ্ৰহ কৰা অধিক ধন চুমীৰ সৈতে খৰচ কৰিছে । কিন্তু চুমি বৰাক লৈ নৰম স্থিতি ডিব্ৰুগড় আৰক্ষী । বিশালৰ পৰা সকলো তথ্য পোৱাৰ পিছতো চুমী বৰাক লৈ ডিব্ৰুগড় আৰক্ষীয়ে নিশা দিয়া সংবাদমেলত বিশেষ তথ্য ৰাজহুৱা নকৰিলে ।
লগতে পঢ়ক : চুমী বৰা আৰু তাৰ্কিক বৰাৰ আত্মগোপন : কি ক'লে শিল্পী গীতালি দেৱীয়ে - Bishal Phukan Trading Scam
কেৱল চুমী বৰাক সদৰ থানাত হাজিৰ হ'বলৈ জাননী দিয়া হৈছে ৷ কিন্তু জাননী দিবলৈ চুমী বৰাৰ লগত যোগাযোগ কৰিব পৰা নাই বুলি উল্লেখ কৰাত আৰক্ষীৰ ভূমিকাক লৈ ৰহস্য সৃষ্টি হৈছে । বুধবাৰে আৰক্ষীয়ে ডিব্ৰুগড় সদৰ থানাত চুমী বৰা ভাতৃ ৰাজীৱ বৰাক হাজিৰ হ'বলৈ নিৰ্দেশ দিছিল যদিও নাহিল ৰাজীৱ বৰা ।
- ৰঞ্জিত কাকতিক জেৰা :
বিশাল ফুকনৰ সমান্তৰালভাৱে ৩১৬/৩১৮ সংলগ্ন ২১/২৩ Banning of unregulated deposit scheme actৰ জৰিয়তে ডিব্ৰুগড়ৰ সদৰ আৰক্ষীয়ে অনলাইন ট্ৰেডিঙৰ প্ৰৱঞ্চনাৰ ঘটনাক লৈ ৰঞ্জিত কাকতিক জেৰা চলাই আছে । গ্ৰেপ্তাৰ হোৱা ৰঞ্জিত কাকতিক বুধবাৰে নিশা পুনৰ স্বাস্থ্য পৰীক্ষা কৰি ডিব্ৰুগড়ৰ সদৰ থানালৈ অহা হৈছে ।
Trading FX নামৰ অনলাইন মানি ট্ৰেডিঙত ধন বিনিয়োগ কৰাৰ নামত বহুলোকৰ পৰা ধন সংগ্ৰহ কৰাৰ অভিযোগ ৰঞ্জিত কাকতিৰ বিৰুদ্ধে আৰক্ষীয়ে লাভ কৰা পাচতে আৰক্ষীয়ে আটক কৰি সদৰ থানাত জেৰা চলাইছে ।
ৰঞ্জিত কাকতিৰ Trading FX নামৰ অনলাইন মানি ট্ৰেডিঙত ধন বিনিয়োগ কৰা ভুক্তভোগীৰ মতে অসমৰ লগত বহিঃ ৰাজ্যৰ বহু লোকে Trading FXত ধন বিনিয়োগ কৰিছিল । এই ৰঞ্জিত কাকতি আছিল অসমৰ দায়িত্বত । এই ঘটনাৰ লগত এজন চৰকাৰী স্বাস্থ্য বিভাগক কৰ্মচাৰীৰ নাম সাঙোৰ খাইছে ।
লগতে পঢ়ক : বহু ধনৰ লোভত পৰি মূলো গ’ল: অনলাইন ট্ৰেডিঙৰ ভয়ংকৰ জাল অসমত, ৩৬ জনক গ্ৰেপ্তাৰ - Online trading scam
- প্ৰফুল্ল বৰা :
ডিব্ৰুগড়ৰ টেঙাখাটত ৰাজ্য চৰকাৰৰ স্বাস্থ্য বিভাগত কৰ্মৰত প্ৰফুল্ল বৰা বৰ্তমান স্বাস্থ্যজনিত কাৰণত ছুটিত আছে । এইগৰাকী চৰকাৰী কৰ্মচাৰীয়ে বহু লোকক যোগদান কৰাইছিল Trading FX নামৰ অনলাইন মানি ট্ৰেডিঙত । আন এটা গুৰুত্বপূৰ্ণ বিষয় হ'ল Trading FX অসমৰ দায়িত্ব থকা ৰঞ্জিত কাকতি আৰু আন বিষয়াই মুখ্যমন্ত্ৰীৰ পুঁজিলৈ ৫ লাখ টকা সাহাৰ্য প্ৰদান কৰিছিল কেইটামান মাহৰ পূৰ্বে । এই বিষয়টোৱে সামাজিক মাধ্যমত ব্যাপক চৰ্চা লাভ কৰিছে ।
উল্লেখ্য বিষয়টো হ'ল সোমবাৰৰ পৰা ডিব্ৰুগড়ৰ সদৰ থানাত বিশাল ফুকন গ্ৰেপ্তাৰ হৈ আছে, কিন্তু বিশাল ফুকনৰ অনলাইন ট্ৰেডিঙৰ ধন বিনিয়োগ কৰা কোনো লোক আহি উপস্থিত হোৱা নাই ৷ অৱশ্যে বুধবাৰে আটক হোৱা ৰঞ্জিত কাকতিক বিচাৰি সদৰ থানাত ভিৰ কৰিছে বহু ভুক্তভোগীয়ে ।
লগতে পঢ়ক : আৰক্ষীৰ আগত বিশালে দিলে বায়েকৰ 'ডেষ্টিনেশ্যন ৱেডিঙ'ৰ খৰচৰ হিচাপ - Online trading scam
