মৰাণ, ১৪ অক্টোবৰ : আজি ডিব্ৰুগড় জিলাৰ ঐতিহাসিক জেৰাই গাঁৱত অনুষ্ঠিত হৈছে অসম গণ পৰিষদ দলৰ কেন্দ্ৰীয় প্ৰতিষ্ঠা দিৱস । ১৯৮৫ চনতে গঠন হোৱা দলটোৰ এই প্ৰতিষ্ঠা দিৱসতে প্ৰাক্তন আলফা নেতা অনুপ চেতিয়াই যোগদান কৰাৰ সম্ভাৱনা আছে ! মুকলিকৈ নক'লেও চাবুৱাৰ বিধায়ক পোনাকণ বৰুৱাই এই সন্দৰ্ভত সংবাদ মাধ্যমক ইংগিত দিছে ।
ডিব্ৰুগড়ত অগপৰ প্ৰতিষ্ঠা দিৱস
উল্লেখ্য যে ১৯৮৫ চনৰ ১৪ অক্টোবৰ অৰ্থাৎ আজিৰ দিনটোতে গঠন হৈছিল অসম গণ পৰিষদ দল চমুকৈ অগপ । অসমৰ আঞ্চলিক ৰাজনৈতিক শক্তিৰ বাটকটীয়া হিচাপে জনা যায় অগপ দলক ।
ঐতিহাসিক অসম আন্দোলনৰ পটভূমিত প্ৰতিষ্ঠা লাভ কৰা ৰাজ্যৰ অন্যতম আঞ্চলিক ৰাজনৈতিক দল অসম গণ পৰিষদৰ ৪০ সংখ্যক কেন্দ্ৰীয় প্ৰতিষ্ঠা দিৱস এইবাৰ উজনিৰ ডিব্ৰুগড় জিলাৰ চাবুৱাত অনুষ্ঠিত হৈছে । যাক লৈ ডিব্ৰুগড়ৰ ৰাইজ আৰু দলৰ সমৰ্থকসকলৰ মাজত ব্যাপক উছাহ দেখিবলৈ পোৱা গৈছে । ঐতিহাসিক জেৰাই গাঁৱত অনুষ্ঠিত অগপৰ কেন্দ্ৰীয় প্ৰতিষ্ঠা দিৱসৰ প্ৰস্তুতি সম্পূৰ্ণ হোৱাৰ লগে লগে পুৱাৰে পৰা বিভিন্ন ধৰণৰ কাৰ্যসূচী আৰম্ভ হৈছে ।
ইফালে চাবুৱাৰ জেৰাই গাঁৱৰ অসমৰ ইতিহাসত এক বিশেষ ভূমিকা আছে । কিয়নো অসম স্বাধীন কৰাৰ লক্ষ্যৰে এই জেৰাই গাঁৱৰ পৰাই ওলাই গৈছিল আলফা স্বাধীনৰ মুখ্য সেনাধ্যক্ষ পৰেশ বৰুৱা । সেই ঐতিহাসিক জেৰাই গাঁৱতেই অগপই কেন্দ্ৰীয় প্ৰতিষ্ঠা দিৱস আয়োজন কৰাক লৈ ব্যাপক চৰ্চা হৈছে । চাবুৱাবাসী ৰাইজৰ সহযোগত আৰু জেৰাই গাঁৱৰ ৰাইজৰ আতিথ্যত প্ৰভাতী আৰতি আৰু পতাকা উত্তোলনৰ পাছতে কেন্দ্ৰীয় প্ৰতিষ্ঠা দিৱসৰ কাৰ্যসূচী আৰম্ভ হয় ৷
ইফালে শ্বহীদ তৰ্পণ, সতীৰ্থ সোঁৱৰণ, সাংস্কৃতিক এনাজৰী, মুকলি সভা, সন্ধিয়া বন্তি প্ৰজ্বলনকে ধৰি বিভিন্ন ধৰণৰ কাৰ্যসূচীও আছে । মুকলি সভাত অসম গণ পৰিষদৰ সভাপতি অতুল বৰা, কাৰ্যকৰী সভাপতি কেশৱ মহন্তৰ লগতে কেন্দ্ৰীয় নেতৃত্ব উপস্থিত থাকিব । দলটোৰ কেন্দ্ৰীয় সম্পাদক তথা চাবুৱাৰ বিধায়ক পোনাকণ বৰুৱাই সমগ্ৰ ব্যৱস্থাপনাৰ বুজ লৈছে ।
আঞ্চলিকতাবাদৰ ধ্বজাবাহক অসম গণ পৰিষদৰ ৪০সংখ্যক প্ৰতিষ্ঠা দিৱসৰ শুভ ক্ষণত দলৰ প্ৰতিগৰাকী সদস্যলৈ আন্তৰিক শুভেচ্ছা জনালোঁ। এই ক্ষণত ঐতিহাসিক অসম আন্দোলনৰ মহান শ্বহীদসকলক গভীৰ শ্ৰদ্ধাৰে সুঁৱৰিছোঁ আৰু অসম গণ পৰিষদৰ অনিৰুদ্ধ যাত্ৰাৰ কালছোৱাত ত্যাগেৰে স্বদেশপ্ৰেমৰ নিদৰ্শন দাঙি ধৰা… pic.twitter.com/cT5thMZs9C
— Atul Bora (@ATULBORA2) October 14, 2024
অনুপ চেতিয়াই অগপত যোগদান কৰিব !
এই প্ৰতিষ্ঠা দিৱসৰ মুকলি সভাতে অগপত যোগদান কৰাৰ সম্ভাৱনা আছে আলফাৰ প্ৰাক্তন সাধাৰণ সম্পাদক অনুপ চেতিয়াৰ । এই কথা দলটোৱে ৰাজহুৱাকৈ ঘোষণা কৰা নাই যদিও অনুপ চেতিয়াৰ যোগদানক লৈ ব্যাপক চৰ্চা চলিছে । এই সম্পৰ্কত বিধায়ক পোনাকণ বৰুৱাইও তাৎপৰ্যপূৰ্ণ মন্তব্য কৰে," অনুপ চেতিয়া জেৰাই গাঁৱৰ সু-সন্তান, তেওঁ জন্মগতভাৱে এগৰাকী জাতীয়তাবাদী এগৰাকী আঞ্চলিকতাবাদী ব্যক্তি । তেওঁ আমাক শুভেচ্ছা জনাবলৈ, আমাক উৎসাহ দিবলৈ ইতিমধ্যে জেৰাই গাঁৱত উপস্থিত হৈছে । কালিও আহিছে আৰু আগতেও আহি গৈছে । তেওঁ যদি দলত যোগদান কৰে আমি আনন্দিত হ’ম ।"
লগতে পঢ়ক : উপনিৰ্বাচন : বিজেপিৰ ৰাজ্যিক নিৰ্বাচনী সমিতিৰ বৈঠকত প্ৰস্তুত প্ৰাৰ্থী পেনেল
