তিনিচুকীয়া : ৰাজ্যত অত্যাৱশ্যকীয় খাদ্য-সামগ্ৰীৰ আকাশলংঘী মূল্যবৃদ্ধিয়ে কোঙা কৰিছে সাধাৰণ জনতাক । ইয়াৰ বিপৰীতে নিৰ্বাক-নিৰ্বিকাৰ হৈ আছে ৰাজ্য চৰকাৰৰ যোগান বিভাগ । এই মূল্যবৃদ্ধিৰ বিৰুদ্ধে বুধবাৰে ৰাজ্যজুৰি প্ৰতিবাদমুখৰ হৈ পৰে সদৌ অসম ছাত্ৰ সন্থা । আছুৰ আহ্বানত ৰাজ্যৰ বিভিন্ন প্ৰান্তত ৰূপায়ণ কৰা হয় বিক্ষোভ কাৰ্যসূচী ।
বুধবাৰে সদৌ তিনিচুকীয়া জিলা ছাত্ৰ সন্থাই তিনিচুকীয়া জিলাৰ সদৰত এক বৃহৎ প্ৰতিবাদী কাৰ্যসূচী ৰূপায়ণ কৰে । কেন্দ্ৰীয় আৰু ৰাজ্যত বিজেপি চৰকাৰ শাসনলৈ অহাৰ পিচৰে পৰা অত্যাৱশ্যকীয় খাদ্য-সামগ্ৰীৰ পৰা আৰম্ভ কৰি ইন্ধনজাত সামগ্ৰী, ৰন্ধন গেছ, ঔষধ-পাতি ইত্যাদি প্ৰত্যেকবিধ সামগ্ৰীৰ অভাৱনীয় মূল্যবৃদ্ধিয়ে সৰ্বস্তৰৰ জনসাধাৰণক জুৰুলা কৰিছে ।
সেয়ে বুধবাৰে সদৌ তিনিচুকীয়া জিলা ছাত্ৰ সন্থাই তিনিচুকীয়া আঞ্চলিক ছাত্ৰ সন্থাৰ কাৰ্যালয়ৰ পৰা তিনিচুকীয়া থানা চাৰিআলিলৈ এক বৃহৎ সমদল উলিয়াই প্ৰতিবাদী বিক্ষোভ কাৰ্যসূচী ৰূপায়ণ কৰে । সদৌ তিনিচুকীয়া জিলা ছাত্ৰ সন্থাৰ ভাৰপ্ৰাপ্ত সভাপতি দীপাঙ্কৰ বুঢ়াগোঁহাই আৰু সাধাৰণ সম্পাদক প্ৰতিম নেওগে প্ৰতিবাদী কাৰ্যসূচীত জঅংশগ্ৰহণ কৰি কয়, "মূল্যবৃদ্ধি ৰোধ কৰাত অসম চৰকাৰ আৰু যোগান বিভাগ চূড়ান্তভাৱে ব্যৰ্থ হৈছে । হিতাধিকাৰী সৃষ্টিৰ নামত ৰাজভঁৰালৰ ধন খৰচ কৰি নিত্যব্যৱহাৰ্য্য সকলো সামগ্ৰীৰ মূল্যবৃদ্ধি কৰি সৰ্বসাধাৰণ ৰাইজক মাধমাৰ শোধাইছে । গতিকে যোগান মন্ত্ৰী ৰণজিৎ কুমাৰ দাসে শীঘ্ৰে মূল্যবৃদ্ধি ৰোধ কৰাৰ ব্যৱস্থা কৰক, অন্যথা তেওঁ দায়িত্বৰ পৰা পদত্যাগ কৰক ।"
শৰীৰচৰ্চাৰ সমানে ৰাইজৰ কথা কিয় নাভাবে যোগান মন্ত্ৰীয়ে ?
ধেমাজি : ৰাজ্যত অত্যাৱশ্যকীয় খাদ্য-সামগ্ৰীৰ চৰা দামে কোঙা কৰাৰ সময়ত ৰাজ্যৰ যোগান মন্ত্ৰীগৰাকীয়ে নাকত তেল দি শুই থকাক লৈ জাঙুৰ খাই উঠিছে আছু ৷ সদৌ অসম ছাত্ৰ সন্থাৰ আহ্বানমৰ্মে বুধবাৰে ধেমাজি সদৰতো সদৌ ধেমাজি জিলা ছাত্ৰ সন্থাই বিক্ষোভ কাৰ্যসূচী ৰূপায়ণ কৰে ৷
প্ৰতিবাদী সমদলে বিজেপি চৰকাৰ হায় হায়, মূল্যবৃদ্ধি ৰোধ কৰক, ৰণজিৎ দাস হায় হায় আদি শ্লোগানেৰে আকাশ-বতাহ মুখৰ কৰি তোলে ৷
প্ৰতিবাদৰ অন্তত জিলা ছাত্ৰ সন্থাৰ সাধাৰণ সম্পাদক জয়ন্ত বুঢ়াগোঁহায়ে কয়, “এইখন চৰকাৰৰ যোগান বিভাগৰ মন্ত্ৰীগৰাকী একেবাৰে অকৰ্মণ্য বুলি বাৰে বাৰে প্ৰমাণিত হৈছে ৷ যিসময়ত অত্যধিক মূল্যবৃদ্ধি হৈছে সেই সময়ত তেওঁ শৰীৰচৰ্চা কৰি আছে । শৰীৰচৰ্চা কৰিব লাগে আমি বেয়া পোৱা নাই ৷ শৰীৰচৰ্চা যেনেধৰণে কৰিছে তেনেকৈ যদি ৰাইজৰ কথা চিন্তা কৰিলেহেঁতেন নিশ্চিতভাৱে জনসাধাৰণে সকাহ পালেহেঁতেন ।"
আমিনগাঁৱত সদৌ অসম ছাত্ৰ সন্থাৰ উত্তাল প্ৰতিবাদ
বাইহাটা : কামৰূপ জিলাৰ সদৰ আমিনগাঁৱতো মূল্যবৃদ্ধিৰ বিৰুদ্ধে কামৰূপ জিলা ছাত্ৰ সন্থাই বিক্ষোভ কাৰ্যসূচী ৰূপায়ণ কৰে । সদৌ অসম ছাত্ৰ সন্থাৰ আহ্বানমৰ্মে কামৰূপ জিলাৰ সদৰ আমিনগাঁৱত তীব্ৰ প্ৰতিবাদ সাব্যস্ত কৰে ছাত্ৰ সন্থাৰ কৰ্মীসকলে । অত্যাৱশ্যকীয় সামগ্ৰীৰ অভাৱনীয় মূল্যবৃদ্ধিৰ প্ৰতিবাদত কৰা এই বিক্ষোভ কাৰ্যসূচীত জিলাখনৰ শতাধিক ছাত্ৰ কৰ্মীয়ে অংশগ্ৰহণ কৰে ।
আনহাতে, যোগান মন্ত্ৰী হায় হায়,অসম চৰকাৰ হায় হায়, মূল্যবৃদ্ধি ৰোধ কৰক আদি শ্লোগানেৰে উত্তাল কৰি তোলে কামৰূপ জিলা আয়ুক্ত কাৰ্যালয় চৌহদ । লগতে শীঘ্ৰে মূল্যবৃদ্ধি ৰোধ নকৰিলে যোগান মন্ত্ৰীয়ে পদত্যাগ কৰিব লাগিব বুলি হুংকাৰ দিয়ে ছাত্ৰ সন্থাৰ নেতা-কৰ্মীসকলে ।
ছাত্ৰ সন্থাৰ একাংশ নেতা-কৰ্মীয়ে সংবাদ মাধ্যমৰ সন্মুখত কয়, "ভাল দিনৰ সপোন দেখুওৱা বৰ্তমানৰ চৰকাৰৰ সময়ত সাধাৰণ জনতাই চলিব নোৱৰা এক পৰিৱেশৰ সৃষ্টি হৈছে । বৰ্তমানৰ যোগান মন্ত্ৰীগৰাকী সৰ্বকালৰ সৰ্বশ্ৰেষ্ঠ ব্যৰ্থ যোগান মন্ত্ৰী । কেৱল এ চি ৰুমত বহি আৰু শৰীৰচৰ্চা কৰি থাকিলে নহ'ব । পৰৱৰ্তী সময়ত চৰকাৰে যদি বয়বস্তুৰ মুল্যবৃদ্ধি ৰোধ নকৰে তেন্তে ইয়াতকৈ অধিক প্ৰতিবাদী কাৰ্যসূচী হাতত লোৱা হ'ব ।
মূল্যবৃদ্ধিৰ প্ৰতিবাদত বৰপেটা চহৰত বৰপেটা জিলা ছাত্ৰ সন্থাৰ বিক্ষোভ কাৰ্যসূচী
বৰপেটা : সদৌ অসম ছাত্ৰ সন্থাৰ আহ্বানমৰ্মে মূল্যবৃদ্ধিৰ বিৰুদ্ধে প্ৰতিবাদত ৰাজপথত নামিল বৰপেটা জিলা ছাত্ৰ সন্থা ৷ অত্যাৱশ্যকীয় সামগ্ৰীৰ অভাৱনীয় মূল্যবৃদ্ধিৰ প্ৰতিবাদত আৰু মূল্য হ্রাস কৰাৰ দাবীত বৰপেটা চহৰত বৰপেটা জিলা ছাত্ৰ সন্থাই বিক্ষোভ কাৰ্যসূচী ৰূপায়ণ কৰে ৷ বৰপেটা জিলা ছাত্ৰ সন্থাৰ কাৰ্যালয়ৰ সন্মুখৰ পৰা প্ৰতিবাদী সমদল উলিয়াই আছু কৰ্মীসকলে বৰপেটা বৰবজাৰৰ তিনিআলিৰ চ'কত ধৰ্ণা কাৰ্যসূচী ৰূপায়ণ কৰে ৷
মূল্য বৃদ্ধি ৰোধ কৰিব নোৱৰা যোগান মন্ত্ৰী ৰণজিৎ দাস হায় হায়, অসম চৰকাৰ হায় হায়, যোগান মন্ত্ৰী ৰণজিৎ দাসে পদত্যাগ কৰক আদি শ্লোগানেৰে পৰিৱেশ উত্তল কৰি তোলে ৷ শীঘ্ৰে মূল্যবৃদ্ধি ৰোধ কৰাৰ লগতে যোগান মন্ত্ৰীয়ে নিজৰ ব্যৰ্থতা স্বীকাৰ কৰি মন্ত্ৰী পদৰ পৰা পদত্যাগ কৰাৰ দাবী জনায় বৰপেটা জিলা ছাত্ৰ সন্থাৰ সভাপতি অবিনাশ কুমাৰ দাসে ৷
কেৱল কথাৰ ফুলজাৰি মাৰে মন্ত্রী ৰণজিৎ দাসে- লখিমপুৰত ছাত্র নেতাৰ ক্ষোভ
লখিমপুৰ : ৰাজ্য চৰকাৰ, যোগান বিভাগ আৰু বিভাগীয় মন্ত্রীক কঠোৰ সমালোচনা কৰি বুধবাৰে ৰাজ্যজুৰি মূল্যবৃদ্ধিৰ বিৰুদ্ধে বিক্ষোভ কাৰ্যসূচী ৰূপায়ণ কৰে ছাত্র সন্থাই । ৰাজ্যৰ আন আন জিলাৰ দৰে লখিমপুৰতো জিলা ছাত্র সন্থাই বিক্ষোভ কাৰ্যসূচী ৰূপায়ণ কৰে ।
"কেৱল কথাৰ ফুলজাৰি মাৰে মন্ত্রী ৰণজিৎ দাসে । তেওঁৰ নিজৰ যোগান বিভাগৰ ওপৰত নিয়ন্ত্রণ নাই । যোগান বিভাগ বুলি থকা বিভাগটো নামতহে আছে । কামত নাই । বজাৰ অথবা বেপাৰীৰ ওপৰত নিয়ন্ত্রণ নাই বিভাগটোৰ ।" ৰাজ্যৰ যোগান বিভাগ আৰু বিভাগীয় মন্ত্রী ৰণজিৎ দাসৰ বিৰুদ্ধে বুধবাৰে এনেদৰে ক্ষোভ প্ৰকাশ কৰে লখিমপুৰ জিলা ছাত্র সন্থাৰ নেতৃবৰ্গই ।
