ধেমাজি, 24 জানুৱাৰী : এশ নহয় দুশ নহয় পাঁচশৰো অধিক সৰু-বৰ গৰু পালন কৰি অহা এটি দম্পতীৰ কাহিনী ৷ কেনেকৈ পালন কৰিছে শ-শ গৰু ? বাৰিষা, ৰ’দ, বতাহ, বৰষুণ, ধুমুহা সকলোবোৰ নেওচি ভীষণ ত্ৰাসযুক্ত পৰিস্থিতিৰ মাজত কেৱল চালিৰ তলত আশ্ৰয় গ্ৰহণ কৰিয়েই এক ব্যতিক্ৰমী জীৱন যুঁজত অৱতীৰ্ণ হৈ দুয়োৱে পাৰ কৰিছে এটা এটা দিন ৷ নিজৰ পৰিয়ালৰ লগতে আন দহ-বাৰটা পৰিয়ালকো দিছে আৰ্থিক সকাহ ৷
ধেমাজিৰ গাই আৰু লেচিয়া নদীৰ সৃষ্ট চল্লিশ বিঘা মাটিৰে আগুৰি থকা বিপসংকুল চাপৰিত বিগত 2010 চনৰ পৰা গো পালন কৰি আহিছে ধেমাজি তুলসী বাৰীৰ সুবাস পাল আৰু কুঞ্জ বৰুৱা পালে ৷ স্মৰ্তব্য যে, ২০১০ ৰ পৰাই গৰু পালনৰ লগত জড়িত দম্পতীটোৱে 2022 চনৰ পৰা চৰকাৰে বাজেয়াপ্ত কৰা গৰু পালন কৰিবলগীয়া হোৱাত আন এক সমস্যাৰ সন্মুখীন হ’বলগীয়া হৈ আহিছে ৷ কিয়নো গো-পালনৰ অভিজ্ঞতা থকা সূত্ৰে ধেমাজি জিলা প্ৰশাসনৰ সংশ্লিষ্ট বিভাগে সুবাস পালকে দায়িত্ব দিয়ে ৷
2022 ৰ পৰা গৰু পালন কৰি 2023 ৰ আগষ্ট মাহত চৰকাৰীৱে ‘শ্ৰী জয় গুৰু গো-শালা’ নামেৰে পঞ্জীয়ন কৰে দুয়োৱে ৷ এনেদৰে গো-শালাত ক্ৰমাগতভাৱে প্ৰশাসনে বাজেয়াপ্ত কৰা গৰুৰ সংখ্যা বাঢ়ি গৈ বৰ্তমান পাচঁশ হৈছেগৈ । ইয়াৰে ৪১৬ টা চৰকাৰী আৰু বাকী ৮৪ টা গৰু সুৱাস পালৰ নামত আছে ৷ এই শ-শ গৰু প্ৰতিপালন কৰিবৰ বাবে দম্পতীটোৱে ১৩/১৪ গৰাকী লোকক নিয়োজিত কৰিবলগীয়া হৈছে ৷ স্থানীয় যুৱকৰ উপৰিও আন ঠাইৰ লোকেও এই গো-শালাত গৰু প্ৰতিপালন কৰি জীৱন নিৰ্বাহ কৰি আহিছে ৷ এনে কেইগৰাকীমান লোক হৈছে বিকাশ পাল, বিতুল গগৈ, সঞ্জীৱ গগৈ, মঞ্জিত গগৈ, ভোগেন্দ্ৰ হাজৰিকা, দিপক গগৈ, বগা তাঁতী, বিকাশ কেওঁট, বাবুল পাল আদি ৷
এইসকল যুৱকে এখন গো-শালাৰ জৰিয়তে পাইছে জীয়াই থকাৰ সম্বল ৷ পিছে পৰিতাপৰ বিষয় যে, চৰকাৰে বাজেয়াপ্ত কৰা গৰুৱে গো-শালাখন ভৰ্তি হৈ পৰিছে যদিও গো-শালাখনৰ নামত অদ্যাৱধি চৰকাৰৰ সংশ্লিষ্ট বিভাগে মোকোলাই দিয়া নাই ফুটাকড়ি এটাও ধন ৷ ফলস্বৰূপে নিজৰ গোঁধনৰ পইচা, গাখীৰ বিক্ৰী কৰি পোৱা ধন আৰু গো-শালাৰ পৰা কেতিয়াবা গিৰীহঁতে গৰু মোকোলাই নিয়াৰ বাবদ দিয়া ধনেৰে নিজৰ লগতে ১৩/১৪ টা পৰিয়াল চলাই নিছে গোপালক দম্পতীটোৱে ৷
আশ্বৰ্যকৰ কথা এয়ে যে, চৰকাৰে অতবোৰ গৰু পাল দম্পতীটোৰ গো-শালাত চমজাই দিয়েই দায়িত্ব সামৰিছে । পশুধনৰ বেমাৰ-আজাৰ, পশু ধনৰ খাদ্যৰ ক্ষেত্ৰত ধেমাজি পশুপালন বিভাগটোৱে তিলমানো গুৰুত্ব নিদিয়া বুলি অভিযোগ তুলিছে তেওঁলোকে৷ চৰকাৰে ধেমাজিত পশু চিকিৎসাৰ ক্ষেত্ৰত সকাহ দিবৰ বাবে দহখন ভ্ৰাম্যমাণ বাহন দিলে যদিও এশবাৰ ফোন কৰিলেও সঁহাৰি নিদিয়ে ৷
বিভাগটোৰ এনে অদূৰদৰ্শী মনোভাৱৰ স্বত্বেও লাম্পি ভাইৰাছৰ দৰে ভয়াৱহ মহামাৰী সময়তো গোধনসমূহ মৃত্যুৰ মুখৰ পৰা ৰক্ষা কৰিছে বুলি মন্তব্য কৰে পালে ৷ আনপিনে, গৰু চৰাই ভাগৰি নপৰা স্থানীয় কেবাগৰাকী শিক্ষিত যুৱকে গো-শালাত কাম কৰিয়ে বহিঃৰাজ্যত কাম কৰিবলৈ নোযোৱাকৈ ইয়াতে উচিত মজুৰি লাভ কৰিছে বুলি সন্তোষ্ট ব্যক্ত কৰে ৷ সেয়ে এই গো-শালাখনলৈ চৰকাৰক সু-দৃষ্টি দিবলৈ পাল দম্পতীৰ লগতে নিয়োজিত যুৱকসকলে কাতৰ আহ্বান জনাইছে ৷ সুৱাস পালৰ স্পষ্ট মত, চৰকাৰে গো-শালাখন চকু মেলি চাওঁক অন্যাথা গৰু মৰিলে চৰকাৰৰো পাপ লাগিব ৷
লগতে পঢ়ক : ধেমাজিত শিক্ষিত যুৱকৰ কৃষি বিপ্লৱ
