গুৱাহাটী, 31 মে’: প্ৰেমৰ প্ৰস্তাৱ প্ৰত্যাখ্যানৰ বাবেই এজন যুৱকে সংঘটিত কৰিলে জঘন্য কাণ্ড ৷ এগৰাকী যুৱতীক চুৰিৰে হানি-খুঁচি হত্যা কৰাৰ চেষ্টা এজন যুৱকৰ । গুৱাহাটী মহানগৰীত সংঘটিত হৈছে এই ঘটনাটো ৷ মহানগৰীৰ বেলতলা চাৰ্ভেৰ আস্থা এপাৰ্টমেণ্টৰ তৃতীয় মহলাত সংঘটিত হৈছে এই নৃশংস ঘটনা ।
জানিব পৰা মতে, বেলতলাস্থিত এগৰাকী যুৱতীক হত্যা কৰাৰ চেষ্টা চলায় এজন যুৱকে । ভুক্তভোগী যুৱতীগৰাকী স্থানীয় এখন কৰ্কট প্ৰতিষ্ঠানত কৰ্মৰত বুলি জানিব পৰা গৈছে ৷
কোনে সংঘটিত কৰিলে এই কাণ্ড :
অভিযোগ অনুসৰি সহকৰ্মী অমিত ভৌমিক নামৰ যুৱকজনে হানি-খুঁচি হত্যা কৰাৰ চেষ্টা চলায় যুৱতীগৰাকীক । দুদিন পূৰ্বে যুৱতীগৰাকীয়ে অমিতে তেওঁক অনুসৰণ কৰা বুলি দিশপুৰ থানাত দাখিল কৰিছিল এখন এজাহাৰ ৷
ইয়াৰ পাচতে বৃহস্পতিবাৰৰ সন্ধিয়া এই ঘটনা সংঘটিত হয় । যুৱতীগৰাকীৰ সৈতে থকা আন এজন যুৱককো চুৰিৰে আঘাত কৰাৰ অভিযোগ উত্থাপন হৈছে অমিত ভৌমিকৰ বিৰুদ্ধে । বৰ্তমান গুৱাহাটীৰ এখন ব্যক্তিগত চিকিৎসালয়ত চিকিৎসাধীন হৈ আছে যুৱতীগৰাকী । সমগ্ৰ ঘটনা সন্দৰ্ভত তদন্ত অব্যাহত ৰাখিছে দিশপুৰ আৰক্ষীয়ে ।
ঘটনাৰ আঁৰৰ ৰহস্য কি :
প্ৰেমজনিত কাৰণতে এই ঘটনা সংঘটিত হোৱাৰ সন্দেহ প্ৰকাশ কৰা হৈছে । ভুক্তভোগী যুৱতীগৰাকীৰ সৈতে অমিত ভৌমিকৰ দীৰ্ঘদিন ধৰি প্ৰেমৰ সম্পৰ্ক আছিল । কিন্তু কিছুদিন ধৰি যুৱতীগৰাকীয়ে অমিতক এৰাই চলি আন এজন যুৱকৰ সৈতে প্ৰেমৰ সম্পৰ্ক গঢ়ি তোলাৰ অভিযোগ উত্থাপন হৈছে । প্ৰেম প্ৰত্যাখান কৰাৰ বাবেই অমিতে বৃহস্পতিবাৰৰ সন্ধিয়া যুৱতীগৰাকীক অস্ত্ৰৰে আক্ৰমণ কৰে । যুৱতীগৰাকীৰ সৈতে থকা যুৱকজনে তেওঁক বচাবলৈ গৈ আহত হয় ৷
পলাতক অভিযুক্ত :
বৰ্তমান পৰ্যন্ত আৰক্ষীৰ জালত পৰা নাই অভিযুক্ত অমিত ভৌমিক ।
লগতে পঢ়ক: নুমলীগড়ৰ তেলগৰমত ছাত্ৰীক ধৰ্ষণ কৰি হত্যাৰ সন্দেহ আত্মীয়ৰ
