স্প’ৰ্টছ ডেস্ক: ভাৰতীয় ক্ৰিকেট দলৰ তাৰকা বেটছমেন বিৰাট কোহলীয়ে আজি অৰ্থাৎ মঙলবাৰে পালন কৰিছে জন্মদিন ৷ মাষ্টাৰ ব্লাষ্টাৰ খ্যাত শচীন তেণ্ডুলকাৰৰ পিছত ভাৰতৰ অন্যতম সৰ্বাধিক ৰাণ সংগ্ৰহকাৰী হিচাপে পৰিচিত বিৰাট কোহলী ।
সমান্তৰালকৈ কোহলী হৈছে বিশ্ব ক্ৰিকেটত সৰ্বাধিক শতক অৰ্জন কৰা দ্বিতীয়গৰাকী ক্ৰিকেটাৰ । দেশৰ লগতে বিশ্বৰ প্ৰতিটো কোণত আছে বিৰাটৰ অনুৰাগী । অনুৰাগীৰ মাজত জনপ্ৰিয়ভাৱে কিং কোহলী বুলিও জনাজাত ভাৰতীয় ক্ৰিকেটাৰগৰাকী । তেওঁৰ কভাৰ ড্ৰাইভ বিশ্ব ক্ৰিকেটত যথেষ্ট বিখ্যাত ।
মঙলবাৰে 36 বছৰ সম্পূৰ্ণ কৰে বিৰাট কোহলীয়ে । 1988 চনৰ 5 নৱেম্বৰত দিল্লীত জন্মগ্ৰহণ কৰিছিল বিৰাটে । দিল্লীত তেওঁৰ শৈশৱৰ প্ৰশিক্ষক ৰাজকুমাৰ শৰ্মাৰ পৰা ক্ৰিকেট শিকিবলৈ আৰম্ভ কৰিছিল । 2008 চনত ভাৰতৰ হৈ এদিনীয়া ক্ৰিকেটত আন্তৰ্জাতিক অভিষেক ঘটায় বিৰাট কোহলীয়ে ।
পৰৱৰ্তী সময়ত অৰ্থাৎ 2017 চনৰ 11 ডিচেম্বৰত ইটালীত বিৰাটে বলীউডৰ অভিনেত্ৰী অনুষ্কা শৰ্মাৰ সৈতে বিবাহপাশত আৱদ্ধ হয় । এতিয়া তেওঁৰ আছে দুটাকৈ সন্তানেৰে (এগৰাকী কন্যা আৰু এজন ল’ৰা) ভৰা এখন সুখী সংসাৰ ৷
ভাৰতীয় তাৰকা বেটছমেনগৰাকীৰ জন্মদিন উপলক্ষে তেওঁ স্থাপন কৰা 5 টা অভিলেখৰ বিষয়ে এই প্ৰতিবেদনত উল্লেখ কৰা হ’ল ৷
বিৰাট কোহলীৰ 5 টা বৃহৎ অভিলেখ
10 হাজাৰ ৰাণ সংগ্ৰহ কৰা সৰ্বাধিক দ্ৰুত ক্ৰিকেটাৰ
বিৰাট কোহলী বিশ্ব ক্ৰিকেটত 10 হাজাৰ ৰাণ সংগ্ৰহ কৰা সৰ্বাধিক দ্ৰুত খেলুৱৈত পৰিগণিত হৈছে । বিৰাটে 205 টা ইনিংছত এই মাইলৰ খুঁটি অৰ্জন কৰে । আনহাতে, শচীনে 259 ইনিংছত সম্পূৰ্ণ কৰিছে 10 হাজাৰ ৰাণ ।
এখন মেচত শতক আৰু শূন্যত আউট
2018 চনত ইডেন গাৰ্ডেনত শ্ৰীলংকাৰ বিৰুদ্ধে খেলা এখন মেচত অধিনায়ক হিচাপে বিৰাট কোহলী প্ৰথম ইনিংছত শূন্য ৰাণত আউট হৈছিল । ইয়াৰ পিছত দ্বিতীয় ইনিংছত বিৰাটে শতক অৰ্জন কৰি এক অনন্য অভিলেখ গঢ়িছিল । তেওঁ একেখন মেচতে শতক অৰ্জন কৰা আৰু শূন্যত আউট হোৱা প্ৰথমগৰাকী অধিনায়ক ।
দৌৰি দৌৰিয়েই অৰ্জন অধিকাংশ শতক
ৰাণ সংগ্ৰহৰ বাবে কৰা সংগ্ৰামৰ সময়তো সৰ্বাধিক শতক অৰ্জন কৰা বিৰাট কোহলী প্ৰথমগৰাকী খেলুৱৈ । এনেদৰে 27 বাৰকৈ শতক অৰ্জন কৰি দলৰ বিজয়ত গুৰুত্বপূৰ্ণ ভূমিকা গ্ৰহণ কৰিছে কোহলীয়ে ৷ আনহাতে, শচীন তেণ্ডুলকাৰে মুঠ 17 বাৰ এই কৃতিত্ব অৰ্জন কৰিছে ।
এটাও বল নকৰাকৈ উইকেট দখল
বিৰাট কোহলীয়ে 2011 চনত নীতিগতভাৱে বলিং নকৰাকৈ দখল কৰিছিল এটা উইকেট ৷ কোহলীয়ে এটা ৱাইড বল দিছিল আৰু মহেন্দ্ৰ সিং ধোনীয়ে ইংলেণ্ডৰ প্ৰাক্তন বেটছমেন কেভিন পিটাৰছেনক ষ্টাম্প কৰিছিল ।
টি-20 বিশ্বকাপত সৰ্বাধিক ৰাণ
বিৰাট কোহলী টি-20 বিশ্বকাপত সৰ্বাধিক ৰাণ সংগ্ৰহকাৰী । বিৰাটে 35 খন মেচৰ 33 টা ইনিংছত 15 টা অৰ্ধশতকৰ সৈতে সংগ্ৰহ কৰিছে 1292 ৰাণ, যি হৈছে সৰ্বাধিক । তেওঁ 111 টা চাৰি আৰু 35 টা ছয় কোবাইছে । বিৰাটে 2014 চনৰ টি-20 বিশ্বকাপত সংগ্ৰহ কৰিছিল 319 ৰাণ ।
লগতে পঢ়ক: 2 টা বলত 3 উইকেট... ক্ৰিকেটৰ ইতিহাসত এক অবিশ্বাস্য অভিলেখ
