স্প’ৰ্টছ ডেস্ক, 16 আগষ্ট: সদ্য সমাপ্ত পেৰিছ অলিম্পিক 2024 ৰ শ্বুটিঙত ভাৰতৰ হৈ দুটাকৈ ব্ৰঞ্জৰ পদক অৰ্জন কৰিছে মনু ভাকৰে ৷ শ্বুটাৰগৰাকীয়ে কেৰিয়াৰৰ শ্ৰেষ্ঠ প্ৰদৰ্শনৰ বাবে লাভ কৰিছে এক বৃহৎ পুৰস্কাৰ, যি পুৰস্কাৰ প্ৰদান কৰিছে অসমৰ প্ৰাক্তন মুখ্যমন্ত্ৰী তথা দ্বিতীয়বাৰৰ বাবে কেন্দ্ৰীয় মন্ত্ৰীৰ দায়িত্ব লাভ কৰা সৰ্বানন্দ সোণোৱালে । পেৰিছ অলিম্পিক 2024 ত আগবঢ়োৱা অসামান্য অৱদানৰ বাবে দিল্লীত অনুষ্ঠিত এক সম্বৰ্ধনা অনুষ্ঠানত কেন্দ্ৰীয় মন্ত্ৰী সোণোৱালে মনু ভাকৰক অভিনন্দন জ্ঞাপন কৰি প্ৰদান কৰে 10 লাখ টকাৰ চেক ৷
মনু ভাকৰৰ প্ৰশংসাত পঞ্চমুখ সৰ্বানন্দ সোণোৱাল
এই সম্বৰ্ধনা অনুষ্ঠানৰ সময়ছোৱাত কেন্দ্ৰীয় মন্ত্ৰী সৰ্বানন্দ সোণোৱালে কয়, "আজি দেশৰ জনসাধাৰণে মনু ভাকৰক লৈ গৌৰৱ অনুভৱ কৰিছে । ভৱিষ্যতে তেওঁ দেশৰ বাবে আৰু বহুতো পদক জিকিবলৈ গৈ আছে । ইয়াত কোনো সন্দেহ নাই । তেওঁৰ দক্ষতা, সামৰ্থ, দূৰদৰ্শিতা, নিষ্ঠা, আনুগত্য, প্ৰতিশ্ৰুতি আৰু কঠোৰ পৰিশ্ৰম কৰাৰ প্ৰতি আগ্ৰহ আছে । মই নিশ্চিত যে, সততা আৰু প্ৰতিশ্ৰুতিৰ মনোভাৱৰ সৈতে মনু বাৰে বাৰে জিলিকি উঠিব" ৷
#WATCH | Delhi | Union Minister Sarbananda Sonowal says, " today, the people of the nation feel proud of manu bhaker...in the near future, she is going to win many more medals for the country. no doubt about it! she has the ability, potential, vision, dedication, devotion,… pic.twitter.com/D5FyxvabNv
— ANI (@ANI) August 16, 2024
অলিম্পিকত সুন্দৰ প্ৰদৰ্শন মনু ভাকৰৰ
মনু ভাকৰে পেৰিছ অলিম্পিকত 10 মিটাৰ ব্যক্তিগত আৰু 10 মিটাৰ মিশ্ৰিত শ্বুটিং ইভেণ্টত ব্ৰঞ্জৰ পদক জিকি সৃষ্টি কৰিছিল ইতিহাস । ভাকৰ অলিম্পিকৰ কোনো ইভেণ্টৰ একেটা প্ৰতিযোগিতাত দুটাকৈ পদক জয় কৰা প্ৰথমগৰাকী ভাৰতীয় ৷ পেৰিছ অলিম্পিকৰ সামৰণি অনুষ্ঠানত ভাকৰক ভাৰতীয় দলটোৰ ধ্বজাবাহক হিচাপে পৰিলক্ষিত হৈছিল ৷
ভাকৰৰ প্ৰদৰ্শনৰ পিছত প্ৰধানমন্ত্ৰী মোদী, বিৰোধী দলপতি ৰাহুল গান্ধী, ছোনিয়া গান্ধী আৰু ক্ৰীড়া মন্ত্ৰী মনসুখ মাণ্ডৱিয়াকে ধৰি বহুকেইজন নেতা আৰু ৰাজনীতিবিদেও তেওঁক সাক্ষাৎ কৰে । প্ৰধানমন্ত্ৰী মোদীয়ে পেৰিছ অলিম্পিকৰ সামৰণিৰ পিছত খেলুৱৈসকলক সাক্ষাৎ কৰিছিল ৷ য’ত প্ৰধানমন্ত্ৰীগৰাকীয়ে মনু ভাকৰক উচ্চ প্ৰশংসা কৰা দেখা যায় ।
