স্পৰ্টছ ডেস্ক, ২২ জুন : চলিত টি-২০ বিশ্বকাপৰ ছুপাৰ-৮ৰ মেচত ৱেষ্ট ইণ্ডিজে আমেৰিকাক পৰাস্ত কৰে । ইয়াৰ লগে লগে ৱেষ্ট ইণ্ডিজ দলে ছুপাৰ-৮ পৰ্যায়ৰ প্ৰথমখন মেচত জয়ী হয় । ইয়াৰ পূৰ্বে ইংলেণ্ডৰ বিৰুদ্ধে খেলা মেচখনত ৱেষ্ট ইণ্ডিজ পৰাজয়ৰ সন্মুখীন হৈছিল । অৱশ্যে আমেৰিকাৰ বিৰুদ্ধে খেলত ৱেষ্ট ইণ্ডিজে ৰাণ-ৰেটৰ ক্ষেত্ৰত যথেষ্ট অগ্ৰগতি লাভ কৰিছে ।
প্ৰথমে বেটিং কৰি আমেৰিকাৰ দলটোৱে ১৯.৫ অভাৰত ১২৮ ৰাণ সংগ্ৰহ কৰিছিল । এণ্ড্ৰিজ গৌছে আমেৰিকাৰ হৈ সৰ্বাধিক ২৯ ৰাণ সংগ্ৰহ কৰে । ইয়াৰ উপৰিও নীতিশ কুমাৰে ২০, ষ্টিভেন টেইলৰে ২ ৰাণ আৰু অধিনায়ক এৰন জনছে ১১ টা বলত ১১ ৰাণ সংগ্ৰহ কৰে । একেদৰে ক'ৰী এণ্ডাৰছনেও ১৫ টা বলত ৭ ৰাণ সংগ্ৰহ কৰে আৰু মিলিন্দ কুমাৰেও ২১ টা বলত ১৯ ৰাণৰ ইনিংছ খেলে ।
ৱেষ্ট ইণ্ডিজৰ বলিং প্ৰদৰ্শন অতি আকৰ্ষণীয় আছিল । য'ত ৰ'ষ্টন চেজে এক আকৰ্ষণীয় স্পেলত ৪ অভাৰত ১৯ ৰাণ দি ৩ টা গুৰুত্বপূৰ্ণ উইকেট দখল কৰে । ইয়াৰ উপৰিও আলজাৰি জোছেফে ৩১ ৰাণত ২ টা, আন্দ্ৰে ৰাছেলে ৩১ ৰাণত ৩ টা আৰু গুডাকেশে এটা উইকেট দখল কৰে ।
আমেৰিকা যুক্তৰাষ্ট্ৰৰ ১৩১ ৰাণৰ টাৰ্গেটৰ পিছে পিছে কেৰিবিয়ান দলটোৱে আক্ৰমণাত্মক স্থিতি গ্ৰহণ কৰে । ৱেষ্ট ইণ্ডিজৰ হৈ ছাই হ'পে সুন্দৰ বেটিং কৰি ৩৯ টা বলত ৮২ ৰাণ সংগ্ৰহ কৰে । যাৰ ফলত দলটোৱে শক্তিশালী ৰাণ-ৰেটেৰে বিজয় সাব্যস্ত কৰে । একে সময়তে নিকোলাছ পুৰাণে ১২ টা বলত অপৰাজিত ২৭ ৰাণ সংগ্ৰহ কৰে । খেলখনত ৰ'ষ্টন চেজক প্লেয়াৰ অফ দ্য মেচৰ বঁটা প্ৰদান কৰা হয় ।
সম্প্ৰতি দক্ষিণ আফ্ৰিকাই দুয়োখন মেচত জয়ী হৈ গ্ৰুপ B-ৰ শীৰ্ষত আছে । তাৰ পিচতে ৱেষ্ট ইণ্ডিজ শক্তিশালী ৰাণ-ৰেটৰ বাবে দ্বিতীয় স্থানত আছে । ইংলেণ্ড তৃতীয় স্থানত আছে ।
