স্প’ৰ্টছ ডেস্ক, ২৮ জুন : আইচিচি টি-২০ বিশ্বকাপ ২০২৪ ৰ ফাইনেলৰ সাজু হৈছে ভাৰতীয় দল । ইতিমধ্যে দলটো বাৰ্বাডোছত উপস্থিত হৈছে । ছেমি ফাইনেলত ইংলেণ্ডক ৬৮ ৰাণত পৰাস্ত কৰাৰ পিচতে ৰোহিত শৰ্মাৰ নেতৃত্বত দলটো গায়ানাৰ পৰা নিশা বাৰ্বাডোছত উপস্থিত হয় । এতিয়া ভাৰতীয় দলে ২৯ জুনত ব্ৰিজটাউনৰ কেনিংটন অ'ভেল ষ্টেডিয়ামত দক্ষিণ আফ্ৰিকাৰ বিৰুদ্ধে ফাইনেল খেল খেলিব ।
#WATCH | Indian cricket team arrived in Barbados ahead of their T20 World Cup Final match against South Africa on 29 June pic.twitter.com/6QTaiu9aVT
— ANI (@ANI) June 28, 2024
ভাৰতীয় দলে বাৰ্বাডোছত উপস্থিত হোৱাৰ এটা ভিডিঅ' সামাজিক মাধ্যমত প্ৰকাশ কৰা হৈছে । এই ভিডিঅ'টো এএনআইয়ে অফিচিয়েল এক্স একাউণ্টত শ্বেয়াৰ কৰিছে । এই ভিডিঅ'টোত ভাৰতীয় দলৰ খেলুৱৈ যশপ্ৰীত বুমৰাহ, হাৰ্দিক পাণ্ডিয়া, মহম্মদ চিৰাজ আৰু অক্ষৰ পেটেলক দেখা গৈছে । ইয়াৰ পিচত বিৰাট কোহলী আৰু যুজবেন্দ্ৰ চাহালকো একেলগে অহা দেখা গৈছে ।
ভিডিঅ'টোত যশস্বী জয়ছোৱালক অকলে খোজ কাঢ়ি আহি থকা দেখা গৈছে । তাৰপিচত দলৰ সকলো খেলুৱৈ আৰু প্ৰশিক্ষণ কৰ্মচাৰীৰ সকলো সদস্যক বিশেষ বাছখনলৈ যোৱা দেখা গৈছে । বাছখনে খেলুৱৈসকলক তেওঁলোকৰ হোটেললৈ লৈ গৈছে । এতিয়া ভাৰতীয় দলে এখন বৃহৎ খেলত দক্ষিণ আফ্ৰিকাৰ মুখামুখি হ'ব আৰু টি-২০ বিশ্বকাপ ২০২৪ ৰ খিতাপ লাভৰ চেষ্টা চলাব ।
টি-২০ বিশ্বকাপৰ বাবে ভাৰতীয় দল : ৰোহিত শৰ্মা (অধিনায়ক), বিৰাট কোহলী, ঋষভ পন্ত, সূৰ্যকুমাৰ যাদৱ, শিৱম ডুবে, হাৰ্দিক পাণ্ডিয়া, ৰবীন্দ্ৰ জাদেজা, অক্ষৰ পেটেল, কুলদীপ যাদৱ, যশপ্ৰীত বুমৰাহ, অৰ্শদীপ সিং, মহম্মদ চিৰাজ, সঞ্জু ছেমচন, যশস্বী জয়ছোৱাল, যশৱেন্দ্ৰ চাহাল ।
উল্লেখ্য যে, ২৭ জুনত ইংলেণ্ডৰ বিৰুদ্ধে ছেমি ফাইনেলত ভাৰতে প্ৰথমে বেটিং কৰি ৭ টা উইকেট হেৰুৱাই ১৭১ ৰাণ সংগ্ৰহ কৰে । আনহাতে দ্বিতীয় ইনিংছত ইংলেণ্ডে ১৬.৪ অভাৰত মাত্ৰ ১০৩ ৰাণ সংগ্ৰহ কৰে । যাৰ ফলত ভাৰতে ইংলেণ্ডৰ বিৰুদ্ধে এক বৃহৎ জয় সাব্যস্ত কৰি ফাইনেলত প্ৰৱেশ কৰে ।
