স্পৰ্টছ ডেস্ক, 24 জুন : ছেইণ্ট লুছিয়াৰ ডেৰেন ছেমি ৰাষ্ট্ৰীয় ক্ৰিকেট ষ্টেডিয়ামত ভাৰত আৰু অষ্ট্ৰেলিয়াৰ মাজত অনুষ্ঠিত হৈছে চুপাৰ-8ৰ মেচ ৷ মেচখনত প্ৰথমে বেটিং কৰি অধিনায়ক ৰোহিত শৰ্মাৰ দুৰ্দান্ত প্ৰদৰ্শনৰ সহায়ত ভাৰতে অষ্ট্ৰেলিয়াক জয়ৰ বাবে 206 ৰাণৰ বিশাল লক্ষ্য বান্ধি দিছে ৷ মাত্ৰ আঠ ৰাণৰ বাবে শতক বঞ্চিত হোৱা ৰোহিত শৰ্মাই 92 ৰাণৰ এক অধিনায়কোচিত ইনিংছ খেলে ৷
🚨 Toss Update 🚨
— BCCI (@BCCI) June 24, 2024
Australia have elected to bowl against #TeamIndia.
Follow The Match ▶️ https://t.co/L78hMho6Te#T20WorldCup | #AUSvIND pic.twitter.com/d0UV4A4iRr
টছত জিকি প্ৰথমে বলিঙৰ সিদ্ধান্ত লয় অষ্ট্ৰেলিয়াৰ অধিনায়ক মিছেল মাৰ্শ্বে ৷ প্ৰথমে বেটিং কৰি ভাৰতীয় দলে নিৰ্ধাৰিত 20 অভাৰত 5 টা উইকেট হেৰুৱাই 205 ৰাণ সংগ্ৰহ কৰে ৷ দলীয় স্ক’ৰ ছয়তে ভাৰতে বিৰাট কোহলীৰ উইকেট হেৰুৱাই বিপদত পৰিছিল যদিও অধিনায়ক ৰোহিত শৰ্মাই বিস্ফোৰক বেটিঙেৰে দলক শক্তিশালী স্থিতিত উপনীত কৰে ৷ হিটমেনে মাত্ৰ 41 টা বলতে 92 ৰাণৰ এক দৰ্শনীয় ইনিংছ খেলে ৷ অধিনায়কগৰাকীয়ে 8 টা ছয় আৰু 7 টা চাৰিৰে এই ইনিংছ সজায় ৷ তাৰকা বেটছমেন বিৰাট কোহলীয়ে অনুৰাগীকক হতাশ কৰি 5 টা বলত কোনো ৰাণ নকৰাকৈয়ে পেভিলিয়নমুখী হয় ৷
লগতে পঢ়ক : অষ্ট্ৰেলিয়াৰে মোকাবিলা : ছেইণ্ট লুচিয়াত উপস্থিত ভাৰতীয় দল - T20 World Cup 2024
ৰোহিত শৰ্মাৰ উইকেট পতনৰ পিচত ঋষভ পন্ট, সূৰ্য কুমাৰ যাদৱ, শিভম ডুবে আৰু হাৰ্দিক পাণ্ডিয়াই দলক আগুৱাই নিয়ে ৷ ঋষভ পন্টে 15 ৰাণ সংগ্ৰহ কৰাৰ বিপৰীতে সূৰ্যকুমাৰ যাদৱে 16 টা বলত 31 ৰাণৰ এক ইনিংছ খেলে ৷ শিভম ডুবেই 22 টা বলত 28 ৰাণ খেলি পেভিলিয়নমুখী হয় ৷ আনহাতে হাৰ্দিক পাণ্ডিয়াই 17 টা বলত 27 ৰাণ সংগ্ৰহ কৰাৰ লগতে ৰবীন্দ্ৰ জাডেজাই 9 ৰাণ সংগ্ৰহ কৰি অপৰাজিত হৈ থাকে ৷ অষ্ট্ৰেলিয়াৰ হৈ মিছেল ষ্টাৰ্ক আৰু মাৰ্কাছ ষ্টইনিছে 2 টাকৈ উইকেট দখল কৰে ৷ জছ হেজেলউডে 1 টা উইকেট দখল কৰে ৷
উল্লেখ্য যে, ভাৰতত অনুষ্ঠিত হৈ যোৱা এদিনীয়া বিশ্বকাপৰ ফাইনেলত অষ্ট্ৰেলিয়াৰ হাতত পৰাজয়ৰ পাচত ভাৰতীয় দলে আজিৰ মেচত জয়লাভ কৰাৰ ওপৰত কঠোৰ দৃষ্টি ৰাখিছে ৷ ইতিমধ্যে কেংগেৰু বাহিনীয়ে নিজৰ ইনিংছ আৰম্ভ কৰি 8 অভাৰত 1 টা উইকেট হেৰুৱাই 83 ৰাণ সংগ্ৰহ কৰিছে ৷
লগতে পঢ়ক : অষ্ট্ৰেলিয়াৰ বিৰুদ্ধে আফগানিস্তানৰ জয়ে ছেমিত ভাৰতৰ প্ৰৱেশ ৰুদ্ধ কৰিব নেকি ! - T20 World Cup 2024
