স্পৰ্টছ ডেস্ক,২০ জুন : চলিত টি-২০ বিশ্বকাপৰ ছুপাৰ-৮ৰ প্ৰথমখন খেল দক্ষিণ আফ্ৰিকা আৰু আমেৰিকাৰ মাজত অনুষ্ঠিত হয় । ৰোমাঞ্চকৰ খেলখনত দক্ষিণ আফ্ৰিকাই আমেৰিকাক ১৮ ৰাণত পৰাস্ত কৰে । আমেৰিকা দলটোৰ এণ্ড্ৰিজ গৌছে এক উত্তেজনাপূৰ্ণ যুঁজৰ নেতৃত্ব দিছিল যদিও অভিজ্ঞ দক্ষিণ আফ্ৰিকাই খেলখনত শেষ হাঁহি মাৰিবলৈ সক্ষম হয় ।
দক্ষিণ আফ্ৰিকাতে জন্মগ্ৰহণ কৰা গৌছে আমেৰিকাৰ হৈ ৪৭ বলত ৮০ ৰাণৰ নট আউট ইনিংছ খেলে । অন্তিম অভাৰলৈকে প্ৰতিযোগিতাখনত নিজৰ দলটোক জীয়াই ৰাখিবলৈ প্ৰয়াস কৰিছিল ।
ছাৰ ভিভিয়ান ৰিচাৰ্ডছ ষ্টেডিয়ামত বেটিং-অনুকূল পিচত ১৯৫ ৰাণৰ লক্ষ্যৰ পিচত গৈ দক্ষিণ আফ্ৰিকাৰ বলিং আক্ৰমণৰ বিৰুদ্ধে আমেৰিকাৰ বাবে এক স্মৰণীয় প্ৰচেষ্টা আছিল । হৰমিত সিঙৰ ২২ টা বলত ৩৮ ৰাণৰ সৈতে ষষ্ঠ উইকেটৰ বাবে ৯১ ৰাণৰ এক অবিশ্বাস্য পাৰ্টনাশ্বিপ খেলে ।
আমেৰিকাৰ ষ্টিভেন টেইলৰেও ১৪ টা বলত ২৪ ৰাণৰ আকৰ্ষণীয় ইনিংছ খেলে । অৱশ্যে বাকী বেটছমেন নীতিশ কুমাৰ (৮), অধিনায়ক এৰন জোনছ (০), কোৰী এণ্ডাৰছন (১২) আৰু শ্যান জাহাংগীৰ (৩) বেটিঙত ফ্লপ হৈছিল । যিয়ে দলটোক সমস্যাত পেলাইছিল ।
দ্বাদশ অভাৰত আমেৰিকাৰ স্ক'ৰ ৫ টা উইকেট হেৰুৱাই ৭৬ ৰাণ আছিল । কিন্তু দক্ষিণ আফ্ৰিকাৰ হৈ অনুৰ্ধ-১৯ খেলা গৌছ আৰু হৰমিতে যিমান সম্ভৱ খেলখন দলটোৰ পক্ষলৈ লৈ যোৱাৰ প্ৰচেষ্টা চলাইছিল । এসময়ত দক্ষিণ আফ্ৰিকাৰ বলাৰৰ বিৰুদ্ধে আক্ৰমণাত্মক হৈ পৰিছে দুয়োগৰাকী বেটছমেন । কিন্তু শেষত, অভিজ্ঞ কাগিচো ৰাবাডাই পাৰ্টনাৰ্শ্বিপ ভংগ কৰাৰ লগে লগে খেলখন দক্ষিণ আফ্ৰিকাৰ পক্ষলৈ আহে । একেদৰে ৰাবাডাই তেওঁৰ অন্তিম অভাৰত মাত্ৰ ২ ৰাণ দিয়ে ।
দক্ষিণ আফ্ৰিকাৰ হৈ কুইণ্টন ডি ককে ৪০ বলত ৭৪ ৰাণৰ এক দায়িত্বশীল ইনিংছ খেলে । শীৰ্ষ অৰ্ডাৰৰ শক্তিশালী প্ৰদৰ্শনৰ জৰিয়তে আফ্ৰিকাই ৪ উইকেটত ১৯৪ ৰাণৰ স্ক'ৰ কৰিবলৈ সক্ষম হয় । শেষৰ ফালে হেনৰিখ ক্লাছেন ৩৬ ৰাণ আৰু ট্ৰিষ্টান ষ্টবছে ২০ ৰাণৰ ইনিংছ খেলে । ৭৪ ৰাণৰ বিজয়ী ইনিংছৰ বাবে কুইন্টন ডি ককক প্লেয়াৰ অফ দ্য মেচৰ বঁটা প্ৰদান কৰা হয় ।
