স্প’ৰ্টছ ডেস্ক: প্ৰাক্তন ভাৰতীয় মল্লযোদ্ধা তথা অলিম্পিক পদক বিজয়ী সাক্ষী মালিকে নিজৰ অফিচিয়েল এক্স একাউণ্টত পোষ্ট কৰিছে এটা বিশেষ ভিডিঅ’ ৷ যিটো ভিডিঅ’ত ভাৰতৰ প্ৰধানমন্ত্ৰী নৰেন্দ্ৰ মোদীক দেশৰ মল্লযোদ্ধাসকলক সহায় কৰিবলৈ আহ্বান জনোৱা দেখা গৈছে ।
ভিডিঅ’টোত, সাক্ষীয়ে ভাবুকি লাভ কৰাৰ বিষয়ে উল্লেখ কৰা হৈছে ৷ কিয়নো তেওঁ পূৰ্বৰে পৰা ভাৰতীয় কুস্তি ফেডাৰেচন (ডব্লিউ এফ আই) ৰ বিৰুদ্ধে মাত মাতিছিল ।
ব্ৰিজভূষণৰ বাহিনীৰ পৰা ভাবুকি লাভৰ দাবী
ৰিঅ’ অলিম্পিকত ব্ৰঞ্জৰ পদক বিজয়ী সাক্ষী মালিকে পূৰ্বে ডব্লিউ এফ আই আৰু ইয়াৰ প্ৰাক্তন অধ্যক্ষ ব্ৰিজভূষণ সিঙৰ বিৰুদ্ধে কৰিছিল প্ৰতিবাদ ৷ সিঙৰ বিৰুদ্ধে যৌন নিৰ্যাতনৰ অভিযোগ উত্থাপন কৰি মালিকে জোৰদাৰ প্ৰতিবাদ সাব্যস্ত কৰে ৷
লগতে পঢ়ক: সাক্ষী মালিকৰ মাতৃক ফোনযোগে ভাবুকি ব্ৰিজ ভূষণ বাহিনীৰ
পৰৱৰ্তী সময়ত চৰকাৰে সংস্থাটো ভংগ কৰি দিয়ে ৷ কিন্তু বৰ্তমানে পুনৰ সাক্ষী মালিকে অভিযোগ উত্থাপন কৰিছে যে, সংস্থাটোৱে তেওঁলোকৰ কাম-কাজ পুনৰ আৰম্ব কৰিছে ৷ তেওঁ দাবী কৰা অনুসৰি, এইক্ষেত্ৰত থকা আদালতৰ নিৰ্দেশকো অমান্য কৰে সংস্থাটোৱে ৷
ডব্লিউ এফ আইয়ে আৰম্ভ কৰিছে কাৰ্যকলাপ
সাক্ষী মালিকে ভিডিঅ’টোত সদৰী কৰিছে এনেদৰে, "সন্মানীয় প্ৰধানমন্ত্ৰী আৰু ক্ৰীড়া মন্ত্ৰী, মই আপোনালোকক অভিবাদন জনাইছো । যোৱা বছৰ কুস্তি ফেডাৰেচনৰ নিৰ্বাচনৰ পিছত সকলোৱে ব্ৰিজভূষণ সিঙৰ আধিপত্য আৰু উৎপীড়ন প্ৰত্যক্ষ কৰিছিল ৷ যিটোৱে মোক যথেষ্ট বিচলিত কৰিছিল আৰু মোক মল্লযুদ্ধৰ পৰা আঁতৰি আহিবলৈ বাধ্য কৰাইছিল । পৰৱৰ্তী সময়ত চৰকাৰে ফেডাৰেছনক নিলম্বিত কৰে । অৱশ্যে ফেডাৰেছনে ইয়াৰ কাৰ্যকলাপ পুনৰ আৰম্ভ কৰিছে" ৷
মোদীজী আমাৰ মল্লযুঁজক ৰক্ষা কৰক
সাক্ষী মালিকে ডব্লিউ এফ আইয়ে যুৱ খেলুৱৈসকলৰ ওপৰত হেঁচা প্ৰয়োগ কৰাৰ অভিযোগ উত্থাপন কৰিছে ।
"চৰকাৰে আৰোপ কৰা নিষেধাজ্ঞাৰ পিছত ফেডাৰেছনে কেনেকৈ নিজৰ কাম অব্যাহত ৰাখিব পাৰে বুলি আদালতে প্ৰশ্ন কৰিছিল । উচ্চ ন্যায়ালয়ে ইয়াক স্থগিত ৰাখিছিল, কিন্তু ডব্লিউ এফ আইয়ে কোনো নিৰ্দেশ পালন কৰা নাছিল । যেতিয়া আদালতে তেওঁলোকক পুনৰ ৰ্ভৎসনা কৰিছিল, ফেডাৰেছনে যুৱ খেলুৱৈসকলক আগবঢ়াই দিছিল । মই বুজি পাওঁ যে এই যুৱ খেলুৱৈসকল কি কঠিন পৰিস্থিতিত আছে, তেওঁলোকৰ কেৰিয়াৰ ফেডাৰেচনৰ ওপৰত নিৰ্ভৰ কৰে" বুলি সাক্ষীয়ে কয় ৷
তেওঁ লগতে কয়, "প্ৰধানমন্ত্ৰী মহোদয়, যদি আপুনি ভাৱে যে ব্ৰিজভূষণৰ প্ৰভাৱ থকা ফেডাৰেছনৰ অধীনত এই ছোৱালীবোৰৰ ভৱিষ্যত সুৰক্ষিত, তেন্তে আপুনি নিলম্বন প্ৰত্যাহাৰ কৰা উচিত । অন্যথা এক স্থায়ী সমাধান বিচাৰি উলিওৱা প্ৰয়োজন" ৷
লগতে পঢ়ক: Wrestlers protest: নাবালিকা খেলুৱৈগৰাকীৰ ওপৰত মানসিক হেঁচা প্ৰয়োগ কৰা হৈছে - সাক্ষী মালিক
