স্প’ৰ্টছ ডেস্ক, 19 আগষ্ট: সদ্যসমাপ্ত পেৰিছ অলিম্পিকত ভাৰতৰ হৈ দুটাকৈ পদক অৰ্জন কৰিছিল শ্বুটাৰ মনু ভাকৰে ৷ যদিহে অনুশীলনৰ সময়ত নিজৰ দক্ষতাৰ ওপৰত খেলুৱৈগৰাকীৰ কোনো সন্দেহ ওপজে, তেন্তে প্ৰশিক্ষকগৰাকীয়ে তেওঁক চৰ মাৰিব পাৰে বুলি শেহতীয়াকৈ ভাকৰে স্পষ্টকৈ প্ৰকাশ কৰিছে ৷ মনু ভাকৰৰ প্ৰশিক্ষক হিচাপে বৰ্তমান কাৰ্যনিৰ্বাহ কৰি আছে যশপাল ৰাণাই ৷
টকিঅ’ অলিম্পিক 2020 ত হতাশাজনক প্ৰদৰ্শনৰ পিছত দুয়োগৰাকীৰে মাজত মতভেদ থকা পৰিলক্ষিত হৈছিল যদিও পৰৱৰ্তী সময়ত সেয়া মীমাংসা হয় ৷ ইয়াৰে তিনিবছৰৰ পিছত এই অংশীদাৰিত্বই ভাৰতক পেৰিছ অলিম্পিকত দুটাকৈ ব্ৰঞ্জৰ পদক জয় কৰাত সহায় কৰিছিল ।
প্ৰশিক্ষক ৰাণাই মোক চৰিয়াব পাৰে
সংবাদ মাধ্যমৰ সৈতে হোৱা বাৰ্তালাপত শ্বুটাৰ মনু ভাকৰে কয়, "মই ক’ম যে তেওঁ মোৰ পিতৃৰ দৰে আৰু এজন ব্যক্তিক আপুনি বিশ্বাস কৰাটোও এক বিশ্বাসৰে বিষয় । যেতিয়াই মই অনুভৱ কৰোঁ যে, মই এইটো কৰিব পাৰো বা নকৰোঁ, তেওঁ মোক যথেষ্ট সাহস দিয়ে ৷ প্ৰয়োজনসাপেক্ষে তেওঁ মোক চৰিয়াই ক’ব পাৰে যে, আপুনি এইটো কৰিব পাৰে, আপুনি ইয়াৰ বাবে প্ৰশিক্ষণ লৈছে"।
শ্বুটাৰগৰাকীৰ এই কথা শুনি হতবাক হৈ পৰে তেওঁৰ লগতে উপস্থিত থকা প্ৰশিক্ষক যশপাল ৰাণা ৷ ৰাণাই ততালিকে খেলুৱৈগৰাকীক বাধা প্ৰদান কৰি ই এক বিতৰ্কিত মন্তব্য বুলিও প্ৰকাশ কৰে ৷ পিছে প্ৰশিক্ষকৰ এই কথাত খেলুৱৈগৰাকীয়ে কয় যে,"মই ইয়াত এটা চৰ মৰা মানে আচলতে কি সেয়া বুজাব নোৱাৰো ৷ মই ক’বলৈ চেষ্টা কৰিছো যে তেওঁ(প্ৰশিক্ষক) মোৰ পৰিধি ভাঙি মোক উলিয়াই আনিবলৈ চেষ্টা কৰে ৷ তেওঁ মোক কয় যে, মই এইবাবেই প্ৰশিক্ষণ লৈ আছো" ৷
টকিঅ'ৰ পিছত পেৰিছত দুৰ্দান্ত প্ৰত্যাৱৰ্তন
টকিঅ' অলিম্পিক 2020 সকলো অৰ্থতে মনু ভাকাৰৰ বাবে এক দুৰ্যোগস্বৰূপ আছিল । 10 মিটাৰ এয়াৰ পিষ্টলৰ অৰ্হতাৰ পূৰ্বে শ্বুটাৰগৰাকীৰ পিষ্টলটো ক্ষতিগ্ৰস্ত হৈছিল, যাৰ ফলত তেওঁ পৰৱৰ্তী কোনো শাখাতে অংশগ্ৰহণ কৰিব নোৱাৰিলে ৷
কিন্তু পেৰিছ অলিম্পিক 2024 ত তাৰকা শ্বুটাৰ মনু ভাকৰে সুন্দৰ প্ৰদৰ্শন অব্যাহত ৰাখি দুবাৰকৈ পোডিয়াম সমাপ্ত কৰিছিল । তেওঁ পেৰিছত অনুষ্ঠিত 10 মিটাৰ এয়াৰ পিষ্টল ইভেণ্টত ভাৰতৰ হৈ প্ৰথম পদক আৰু তাৰপিছত সৰৱজ্যোত সিঙৰ সৈতে 10 মিটাৰ এয়াৰ পিষ্টল মিক্সড শাখাৰ ইভেণ্টত আন এটা ব্ৰঞ্জ জয় কৰে । পেৰিছ অলিম্পিকত দুটা পদক জয় কৰাৰ লগতে মনু ভাকৰ একেখন অলিম্পিকত দুটা পদক জয় কৰা প্ৰথমগৰাকী ভাৰতীয় খেলুৱৈ হিচাপে পৰিগণিত হয় ।
লগতে পঢ়ক: ফোগাটলৈ 16 কোটি টকাৰ পুৰস্কাৰ ! স্বামীয়ে জনালে প্ৰকৃত সত্য - VINESH PHOGAT PRIZE LIST
