স্পৰ্টছ ডেস্ক, ২৮ জুলাই : পেৰিছ অলিম্পিকৰ প্ৰথমটো দিনত আমেৰিকাক অতিক্ৰম কৰি পদকৰ তালিকাত প্ৰথম স্থান দখল কৰে অষ্ট্ৰেলিয়াই । প্ৰথম অৱস্থাত আমেৰিকাই অগ্ৰগতি লাভ কৰিছিল যদিও পৰৱৰ্তী সময়ত ৩ টা সোণৰ সৈতে অষ্ট্ৰেলিয়া আগবাঢ়ি যায় । অষ্ট্ৰেলিয়ান সাঁতোৰবিদ আৰিয়াৰ্নে টিটমাছে শনিবাৰে নিশা ৪০০ মিটাৰ ফ্ৰীষ্টাইলত আমেৰিকান সাঁতোৰবিদ কেটি লেডেকীক অতিক্ৰম কৰি সোণৰ পদক অৰ্জন কৰে ।
১৭ বছৰীয়া কানাডিয়ান ফেনম চামাৰ মেকিনটছ টিটমাছক তীব্ৰ প্ৰত্যাহ্বান জনাইছিল যদিও পৰৱৰ্তী সময়ত মেকিনটছে ৰূপৰ পদকতে সন্তুষ্ট থাকিবলগীয়া হয় । একেদৰে আমেৰিকান সাঁতোৰবিদ লেডেকীয়ে ব্ৰঞ্জ লাভ কৰে । টিটমাছে টকিঅ'ত ২০০ আৰু ৪০০ ইভেণ্টত সোণৰ পদক লাভ কৰিছিল ।
ইফালে অষ্ট্ৰেলিয়াই মহিলাৰ ৪x১০০ ফ্ৰীষ্টাইল ৰিলেত আমেৰিকানসকলক অতিক্ৰম কৰি পোনপটীয়াকৈ চতুৰ্থটো অলিম্পিক খিতাপ দখল কৰে । মলি অ'কালাঘান, শায়না জেক, এমা মেককেন আৰু মেগ হেৰিছৰ কোৱাৰ্টেটে ৩ মিনিট ২৮.৯২ ছেকেণ্ডৰ সৈতে অলিম্পিক অভিলেখ গঢ়ে । আমেৰিকান কেট ডগলাছ, গ্ৰেচেন ৱালছ, টৰি হাস্কে আৰু চিমোন মেনুৱেলে ৰূপৰ পদক লাভ কৰে । চীনে ব্ৰঞ্জতে সন্তুষ্ট থাকে ।
অৱশেষত আমেৰিকাই পুৰুষৰ ৪x১০০ ফ্ৰীষ্টাইল ৰিলেত প্ৰথমটো স্বৰ্ণ লাভ কৰে । আমেৰিকাক কেলেব ড্ৰেচেলে নেতৃত্ব দিছিল যিয়ে তেওঁৰ কেৰিয়াৰৰ অষ্টম সোণৰ পদক লাভ কৰে । অষ্ট্ৰেলিয়াই ৰূপৰ পদক লাভ কৰে ।
চীনৰ হাতলৈ পেৰিছ অলিম্পিকৰ প্ৰথমটো স্বৰ্ণ
পেৰিছ অলিম্পিকৰ প্ৰথমটো সোণৰ পদক চীনে লাভ কৰে । হুয়াং য়ুটিং আৰু শ্বেং লিহাওৱে শনিবাৰে পুৱা ১০ মিটাৰ এয়াৰ ৰাইফল মিক্সড দলৰ ইভেণ্টৰ ফাইনেলত দক্ষিণ কোৰিয়াৰ কেউম জিহিয়ন আৰু পাৰ্ক হাজুনক পৰাস্ত কৰে ।
টেনিছ বিতৰ্ক
২০২২ চনৰ জুন মাহৰ পৰা ভ্ৰমণ পৰ্যায়ৰ মেইন ড্ৰ একক খেলত অংশগ্ৰহণ নকৰা অষ্ট্ৰেলিয়াৰ ৩৬ বছৰীয়া ডাবলছ খেলুৱৈ মেথিউ এবডেনৰ বিৰুদ্ধে এক ঘণ্টাতকৈও কম সময়ৰ ভিতৰত ৬-০, ৬-১ ৰাউটৰ পিচত ন'ভাক জকোভিচ অলিম্পিকৰ নিয়মৰ দ্বাৰা বিচলিত হয় । জকোভিচে অনুভৱ কৰিছিল যে এবডেনৰ পৰিৱৰ্তে অলিম্পিকত আন একক খেলুৱৈসকল স্থান লাভৰ যোগ্য আছিল ।
১০ বাৰৰ অলিম্পিয়ান
জৰ্জিয়ান শ্বুটাৰ নিনো চালুকভাদজে ছোভিয়েট ইউনিয়নক প্ৰতিনিধিত্ব কৰিছে আৰু কেৰিয়াৰত ১০ বাৰ অলিম্পিক গেমছত অংশগ্ৰহণ কৰা প্ৰথমগৰাকী মহিলা হিচাপে অভিলেখ ৰচিছে । তেওঁ ১৯৮৮ চনৰ পৰা প্ৰতিটো গ্ৰীষ্মকালীন অলিম্পিকত অংশগ্ৰহণ কৰিছে ।
হাংগেৰিয়ান ফেঞ্চাৰৰ পৰাজয়
ফেন্সিঙত বিগত ৩ বাৰ অলিম্পিকত সোণৰ পদ লাভ কৰা হাংগেৰিয়ান ফেঞ্চাৰ এৰন জিলাগি এইবাৰ বিফল হ'ল । চতুৰ্থটো স্বৰ্ণৰ বাবে যুঁজ দিয়া জিলাগিয়ে কানাডিয়ান ফাৰেছ আৰ্ফাৰৰ হাতত পৰাস্ত হয় । জিলাগিয়ে ২০১২, ২০১৬ আৰু ২০২১ চনত পুৰুষৰ ব্যক্তিগত চাবৰত সোণৰ পদক লাভ কৰিছিল । জিলাগিৰ পৰাজয় ২০২৪ চনৰ অলিম্পিকত প্ৰথমটো বৃহৎ অসন্তুষ্টি হিচাপে পৰিগণিত হৈছে ।
