স্প’ৰ্টছ ডেস্ক, 28 আগষ্ট: আমেৰিকা যুক্তৰাষ্ট্ৰৰ মেজৰ লীগ বেছবল কেচাৰ ডেনি জনছেনে এক চমকপ্ৰদ সাফল্য অৰ্জনৰে গঢ়ে এক অভিলেখ ৷ জনছেন একেখন খেলত অংশগ্ৰহণ কৰা দলবোৰৰ হৈ খেলা প্ৰথমগৰাকী খেলুৱৈত পৰিণত হৈছিল । একেজন খেলুৱৈয়ে দুটা দলৰ হৈ খেলত কেনেদৰে অংশগ্ৰহণ কৰিব পাৰে, সেয়া শুনিলে আচৰিত হ'ব আপুনি । কিন্তু প্ৰকৃততে খেলপথাৰত সেয়াই ঘটিছিল ।
দৰাচলতে জনছেনে 26 জুনত বষ্টন ৰেড চক্সৰ বিৰুদ্ধে টৰণ্টো ব্লু জেছৰ হৈ বেটিং কৰিবলৈ খেলপথাৰত নামিছিল ৷ খেলৰ মাজতে বৰষুণে বাধা প্ৰদান কৰাত খেলখন পিছুৱাই দিয়া হয় ৷ নিৰ্ধাৰিত সময়তকৈ এমাহ পিছত অৰ্থাৎ 27 জুলাইত জনছেনক ৰেড চক্সলৈ স্থানান্তৰ কৰা হয় ৷ যাৰ ফলত তেওঁ বৰষুণৰ বাবে পিছুৱাই দিয়া খেলখনত নিজৰ দলৰ বিৰুদ্ধে খেলাৰ সুবিধা লাভ কৰে ।
জনছেনে তেওঁৰ স্থানান্তৰৰ পিছত অৱশ্যে ৰেড চক্সৰ হৈ একাধিক খেলত অংশগ্ৰহণ কৰা নাই ৷ বৰষুণৰ বাবে পিছুৱাই দিয়া খেলখন সোমবাৰে পুনৰ আৰম্ভ হোৱাত তেওঁক দলত অন্তৰ্ভুক্ত কৰা হৈছিল । এইটোৱে এম এল বি তাৰকা ডেনি জনছেনক একেখন খেলত দুয়োটা দলৰ হৈ খেলিবলৈ সুযোগ প্ৰদান কৰে ৷ কেচাৰ ডেনি জনছেনে একেখন খেলতে বষ্টন ৰেড চক্স আৰু টৰণ্টো ব্লু জেছৰ হৈ খেলি অভিলেখ সৃষ্টি কৰে ।
জনছেনে এথলেটিকছৰ সৈতে হোৱা বাৰ্তলাপত এনেদৰে কয়, "মই নাজানো এই সিদ্ধান্তই খেলপথাৰত কেনেদৰে কাম কৰে । মই ইয়াৰ বিষয়ে বহুবাৰ শুনিছো" । বৰষুণৰ বাবে খেল পুনৰ আৰম্ভ হোৱাৰ আগতে জেনছেনে কৈছিল, "মই কেৱল মোৰ মূৰ তললৈ কৰি খেলি যাম । এয়া নিশ্চিতভাৱে এটা ভাল দিশ"।
"নিশ্চিতভাৱে কৃতজ্ঞ । সঁচাকৈয়ে যেতিয়া মই এই বিষয়ে শুনিছিলো, মই ভবা নাছিলো যে মই এইটো কাম কৰা প্ৰথমগৰাকী ব্যক্তিত পৰিণত হ’ম । এই খেলখন দীৰ্ঘদিন ধৰি চলি আছে । এয়া এই খেলত ঘটি থকা সেই বিচিত্ৰ ঘটনাবোৰৰে মাজৰ এটা । ই অত্যন্ত বিৰল আৰু দৰ্শনীয়" ৷
