স্প’ৰ্টছ ডেস্ক, ১২ জুন : ফিফা বিশ্বকাপৰ যোগ্য়তা নিৰ্ণয়কাৰী খেলত ৰেফাৰীৰ দুৰ্বল ভূমিকাৰ বাবে পৰাজিত হ'ল ভাৰত । ভাৰতীয় ফুটবল দলটোৱে মঙলবাৰে কাটাৰৰ হাতত ২-১ গ'লত পৰাজিত হৈ বিশ্বকাপৰ যোগ্য়তা অৰ্জনৰ পৰা বঞ্চিত হ'ল ।
দক্ষিণ কোৰিয়াৰ মেচ ৰেফাৰীৰ দুৰ্বল খেল পৰিচালনাৰ বাবে এই বিতৰ্কৰ সূত্ৰপাত ঘটে । খেলখনৰ ৭৩ মিনিটলৈকে ভাৰতে বিশ্বকাপ কোৱালিফায়াৰৰ পৰৱৰ্তী ৰাউণ্ডলৈ অগ্ৰসৰ হ'ব বুলি নিশ্চিত হৈছিল ভাৰতীয় সমৰ্থকসকল । কিয়নো তেতিয়ালৈকে ভাৰতে লালিয়াঞ্জুৱালা চাংটেৰ গ'লৰ সহায়ত কাটাৰৰ বিৰুদ্ধে ১-০ গ'লৰ ব্য়ৱধানত আগবাঢ়ি আছিল ।
এইদৰে খেল চলি থকাৰ সময়তেই ৰেফাৰীয়ে কাটাৰক ফ্ৰী কিক প্ৰদান কৰাৰ ফলত ভাৰতীয় ফুটবল দলটো দুৰ্যোগৰ সন্মুখীন হয় । গ'লৰক্ষক গুৰপ্ৰীত সিং সান্ধুৱে য়ুচেফ আয়মেনৰ এটা হেডাৰ ৰক্ষা কৰে, যদিও বলটো তেওঁৰ মাজেৰে পাৰ হৈ যোৱাত কাটাৰে এটা কৰ্ণাৰ কিক লাভ কৰে ।
অৱশ্যে আলহাছমী মহিলদিনে বলটো বেকহিলৰে ঘূৰাই অনাৰ পচতেই য়ুচেফ আয়মেনে ইয়াক গ'লপোষ্টত আঘাত কৰে । ইফালে বলটো সীমাৰ বাহিৰলৈ যোৱাৰ কথা বিবেচনা কৰি ভাৰতীয় দলটোৱে খেলা বন্ধ কৰে । ভাৰতীয় দলটোৱে এই গ'লটোৰ পিছত সমস্বৰে প্ৰতিবাদ কৰে । কিন্তু ভি এ আৰ নোহোৱাকৈ ৰেফাৰীয়ে নিজৰ সিদ্ধান্তত অটল থাকে ।
