স্পৰ্টছ ডেস্ক,১৬ ফেব্ৰুৱাৰী : ভাৰত আৰু ইংলেণ্ডৰ মাজত চলি থকা তৃতীয় টেষ্টৰ আজি দ্বিতীয় দিন । প্ৰথম ইনিংছত ভাৰতে ইংলেণ্ডৰ সন্মুখত ৪৪৬ ৰাণৰ বৃহৎ স্ক'ৰ ৰাখিবলৈ সক্ষম হৈছে । এই স্ক'ৰক লৈ সম্ভৱত ভাৰতীয় দল যথেষ্ট সন্তুষ্ট । এতিয়া ইংলেণ্ড দলত যিমান সম্ভৱ কম ৰাণত অলআউট কৰি খেলখনত অগ্ৰগতি লাভ কৰিবলৈ চেষ্টা কৰিব ।
দ্বিতীয় দিনৰ খেল আৰম্ভ হোৱাৰ পিচতে ভাৰতে কম সময়ৰ ভিতৰতে ৰবীন্দ্ৰ জাদেজা আৰু কুলদ্বীপ যাদৱৰ উইকেট হেৰুৱায় । ৰবীন্দ্ৰ জাদেজাই ১১২ ৰাণ কৰি আউট হয় আৰু কুলদ্বীপ যাদৱেও মাত্ৰ ৪ ৰাণতে আউট হয় । তাৰ পিচত ধ্ৰুৱ জুৰেল আৰু অশ্বিনে ভাৰতীয় বেটিং চম্ভালি লয় আৰু স্ক'ৰত যথেষ্ট অৱদান আগবঢ়ায় । অশ্বিনে ৮৯ টা বলত ৩৭ ৰাণ কৰি আউট হয় আৰু জুৰেলেও ১০৪ টা বল খেলি ৪৬ ৰাণ কৰে । জুৰেলে অভিষেক অৰ্ধশতক কৰাৰ আশাত আছিল যদিও সেয়া সফল নহ'ল । ইয়াৰ পিচত চিৰাজ আৰু বুমৰাহেও কিছু সময়ত ক্ৰিজত থাকে যদিও অৱশেষত ২৬ ৰাণত বুমৰাহে উইকেট হেৰুৱাই আৰু ভাৰতৰ ইনিংছ সমাপ্ত হয় ।
অৱশ্যে খেল আৰম্ভ কৰাৰ পূৰ্বেই ইংলেণ্ডে ৫ ৰাণ লাভ কৰিলে । ভাৰতৰ বেটছমেনৰ পেনাল্টিৰ বাবে আম্পায়াৰে ইংলেণ্ড এই ৫ ৰাণৰ উপহাৰ দিয়ে । এতিয়া ইংলেণ্ড ৫ ৰাণৰ পৰা তেওঁলোকৰ প্ৰথম ইনিংছৰ অভিযান আৰম্ভ কৰিব ।
উল্লেখ্য যে প্ৰথম দিনা ভাৰতে টছত জয়ী হৈ প্ৰথমে বেটিং কৰি প্ৰথম দিনৰ অন্তত ৩২৬ ৰাণ সংগ্ৰহ কৰিবলৈ সক্ষম হৈছিল । একেদৰে ভাৰতৰ অধিনায়ক ৰোহিত শৰ্মাই দীৰ্ঘদিনৰ অপেক্ষাৰ অন্তত টেষ্ট শতক কৰিবলৈ সক্ষম হৈছিল আৰু ৰবীন্দ্ৰ জাদেজাইও আকৰ্ষণীয় শতক কৰি বেটিং কৰি আছে ।
প্ৰথম দিনা ভাৰতে ৩৩ ৰাণতে ৩ টা উইকেট হেৰুৱাইছিল যদিও ৰোহিত শৰ্মা আৰু জাদেজাৰ আকৰ্ষণীয় ইনিংছে ভাৰতক খেলখনত গুৰুত্বপূৰ্ণ স্ক'ৰ কৰাত সহায় কৰিছিল । ইফালে অভিষেক মেচতে ছৰফৰাজ খানৰ অৰ্ধশতকে সকলোৰে পৰা প্ৰশংসা লাভ কৰিছিল । ছৰফৰাজে অতি সাৱধান আৰু আক্ৰমণাত্মকভাৱে খেল খেলা দেখা গৈছিল । ফলস্বৰূপে খানে ৬৬ টা বলত ৬২ ৰাণ সংগ্ৰহ কৰে । অৱশ্যে দুৰ্ভাগ্যৱশতঃ ছৰফৰাজ খান ৰাণআউট হ'বলগীয়া হয় ।
লগতে পঢ়ক :ৰোহিত-জাডেজাৰ শতকেৰে ৰাজকোটত শক্তিশালী স্থিতিত ভাৰত
