নিউজ ডেস্ক, ৩১ জুলাই : ব্ৰাজিলিয়ান অলিম্পিক চাৰ্ফাৰ গেব্ৰিয়েল মেডিনাই বিশ্বৰ আটাইতকৈ ডাঙৰ চাৰ্ফ ব্ৰেকত দিনটোৰ আটাইতকৈ ডাঙৰ ঢৌবোৰৰ এটাত পেডেল কৰা প্ৰত্যক্ষ কৰে এ এফ পিৰ ফটোগ্ৰাফাৰ জেৰোম ব্ৰুইলেটে । ফ্ৰান্সৰ টাহিতিত অলিম্পিকৰ অভিলেখ অৰ্জন কৰা যাত্ৰাৰ পিচত তেওঁ চিত্ৰগ্ৰহণ কৰা মেডিনাৰ এই ফটোখন প্ৰকাশ পোৱাৰ পিচতে বিশ্বজুৰি তীব্ৰ আলোড়নৰ সৃষ্টি হৈছে । ছবিখনে যে এক খলকনি তুলিব সেইটো তেওঁ আশা কৰিছিল যদিও তেওঁ নাজানিছিল যে এই ছবিখনে বিশ্বজুৰি তীব্ৰ প্ৰতিক্ৰিয়াৰ সৃষ্টি কৰিব আৰু ভাইৰেল হৈ পৰিব । এই কথাও তেওঁ অনুমান কৰিব পৰা নাছিল যে এই ছবিখন সম্ভৱত ক্ৰীড়া জগত আৰু ক্ৰীড়াৰ এক পৰিভাষা বৰ্ণনা কৰা ছবিলৈ ৰূপান্তৰ হ'ব ।
ব্ৰুইলেট চেনেলটোত এখন নাৱত আছিল । ঠাইখিনি ঢৌৰ কাষৰ গভীৰ, শান্ত এলেকা আছিল । কিন্তু ঢৌৰ প্ৰাৰম্ভিক কাৰ্যৰ কোনো স্পষ্ট ৰেখা দৃষ্টিগোচৰ হোৱাকৈ নাছিল । অৱশ্যে তেওঁ যি ঠাইত থাকিব বিচাৰিছল, ঠিক সেইখিনিয়ে আছিল উপযুক্ত স্থান ।
ব্ৰুইলেট এক মুখ্য স্থানত আছিল, য'ৰ পৰা তেওঁ মেডিনাক 'কিক আউট' কৰাৰ বাবে অপেক্ষা কৰি আছিল । আৰু মেডিনা দৌৰি আহি সেই ঢৌৰ মুখৰ পৰায়ে প্ৰস্থান কৰিছিল ।
"প্ৰতিগৰাকী ফটোগ্ৰাফাৰে তাৰ বাবে অপেক্ষা কৰি আছিল । প্ৰত্যেকে জানিছিল যে গেব্ৰিয়েল মেডিনাই বিশেষ কিবা এটা কৰিব ।" ব্ৰুইলেটে কয় ।
"সকলোৱে জানিছিল যে কিবা এটা ঘটিব । একমাত্ৰ জটিল মুহূৰ্তটো হৈছে, তেওঁ ক'ৰ পৰা বাহিৰলৈ ওলাই আহিব ? কাৰণ সেই সন্দৰ্ভত মই সম্পূৰ্ণ অজ্ঞ ! কেতিয়াবা তেওঁ এক্ৰোবেটিক ভঙ্গী কৰে আৰু এইবাৰো তেওঁ সেইটো কৰিছিল আৰু লগে লগে মই কেমেৰাৰ বুটামটো হেঁচি দিছিলোঁ ।" তেওঁ লগতে কয় ।
উল্লেখ্য যে ব্ৰুইলেটৰ কেমেৰাত মেডিনাই আকাশলৈ এটা আঙুলি দেখুৱাই ঢৌৰ ওপৰেৰে পোনে পোনে ওপৰলৈ উৰি থকাৰ দৃশ্য ধৰা পৰিছিল । আনহাতে, তেওঁৰ চাৰ্ফবোৰ্ডখনো তেওঁৰ কাষত আকাশৰ ফালে আঙুলিয়াই থকাৰ দৰে ওপৰলৈ মূৰ দাঙি উঠি আছিল ।
"মই ভাবোঁ যে যেতিয়া তেওঁ টিউবত আছিল তেতিয়া তেওঁ জানিছিল যে তেওঁ দিনটোৰ আটাইতকৈ ডাঙৰ ঢৌবোৰৰ এটাত আছিল ।" ব্ৰুইলেটে কয় ।
আনহাতে, ব্ৰুইলেটে সন্দেহ কৰিছিল যে তেওঁ কিবা এক বিশেষ বস্তুও ধৰিছিল, কিন্তু ১০০ শতাংশ নিশ্চিত নাছিল ।
"যেতিয়া মই টিহুপো'ত শ্বুটিং কৰোঁ, তেতিয়া মই সাধাৰণতে ইমান 'হাই বাৰ্ষ্ট মোড'ত শ্বুটিং নকৰোঁ । কিয়নো দিনটোৰ শেষত যদি আপুনি একাধিকবাৰ কেমেৰাৰ বুটামটোত হেঁচি থাকে, তেন্তে আপুনি এদিনত 5,000 শ্বট লৈ উভতি আহিব পাৰে । কিন্তু মই সেইটো ভাল নাপাওঁ ! মই তেওঁৰ চাৰিটা শ্বট লৈছিলোঁ আৰু সেই চাৰিটা শ্বটৰ ভিতৰৰ এটা আছিল এই ফটোখন ।" ব্ৰুইলেটে ফটোখন শ্বুট কৰা সন্দৰ্ভত কয় ।
উল্লেখ্য যে এই ছবিখন বিশ্বজুৰি বহু প্ৰকাশনে ব্যৱহাৰ কৰিছে আৰু অনলাইনত লাখ লাখবাৰ শ্বেয়াৰ বা লাইক কৰা হৈছে ।
"এইখন সৰ্বকালৰ সৰ্বশ্ৰেষ্ঠ ক্ৰীড়া ফটো হ'ব পাৰে ।" অষ্ট্ৰেলিয়ান মিডিয়া News.com.au-এ নিজৰ ফেচবুক পেজৰ এটা পোষ্টত লিখিছে ।
আনহাতে, টাইম আলোচনীয়ে ইয়াক '২০২৪ চনৰ গ্ৰীষ্মকালীন ক্ৰীড়াৰ বিজয়ৰ পৰিভাষাৰ ছবি' বুলি বৰ্ণনা কৰিছে ।
ইফালে মেডিনাই ছবিখন নিজৰ ইনষ্টাগ্ৰাম একাউণ্টত পোষ্ট কৰাৰ লগে লগে 2.4 নিযুতৰো অধিক লাইক পাবলৈ সক্ষম হয় ।
অৱশ্যে এই প্ৰশংসা সত্ত্বেও ব্ৰুইলেটে কয় যে এই সফলতা উদযাপনৰ বাবে অপেক্ষা কৰিব লাগিব । কিয়নো তেওঁৰ এতিয়াও বাকী প্ৰতিযোগিতাৰ দৃশ্যগ্ৰহণ বাকী আছে ।
