নগাঁও,৯ মাৰ্চ: সমষ্টি পুনৰ নিৰ্ধাৰণৰ পিচত নতুনকৈ গঠিত নগাঁও লোকসভা সমষ্টিত কংগ্ৰেছৰ প্ৰাৰ্থী কোন হ'ব ? ৰাজনৈতিক মহলত এই বিষয়টো আজিও চৰ্চাৰ কেন্দ্ৰবিন্দু হৈ আছে । ৰাজ্যৰ ভিতৰতে সৰ্বাধিক চৰ্চিত লোকসভা সমষ্টি হিচাপে চিহ্নিত নগাঁও লোকসভা সমষ্টিৰ বৰ্তমানৰ সাংসদ প্ৰদ্যুৎ বৰদলৈ । পূৰ্বৰ লোকসভা সমষ্টিৰ অধীনত থকা ৫ টা বিধানসভা সমষ্টিৰ উপৰিও নতুনকৈ পূৰ্বৰ কলিয়াবৰ লোকসভা সমষ্টিৰ তিনিটাকৈ বিধানসভা সমষ্টি অন্তৰ্ভুক্ত হোৱাৰ লগে লগে নগাঁও লোকসভা সমষ্টিত চকু পৰিল পূৰ্বৰ কলিয়াবৰ লোকসভা সমষ্টিৰ সাংসদ গৌৰৱ গগৈৰ ।
কংগ্ৰেছৰ প্ৰাৰ্থিত্বক লৈ নগাঁও লোকসভা সমষ্টিত একপ্ৰকাৰ প্ৰতিদ্বন্দ্বিতাও চলি আছে । সমষ্টিটোৰ পৰা দলীয় প্ৰাৰ্থিত্ব বিচাৰি পূৰ্বৰ সাংসদ প্ৰদ্যুৎ বৰদলৈৰ উপৰিও সাংসদ গৌৰৱ গগৈ আৰু প্ৰাক্তন মন্ত্ৰী ৰকিবুল হুছেইনেও প্ৰাৰ্থিত্ব বিচাৰিছিল যদিও প্ৰদ্যুৎ বৰদলৈ আৰু গৌৰৱ গগৈৰ মাজত তীব্ৰ প্ৰতিদ্বন্দ্বিতা চলিছে । প্ৰথম অৱস্থাত নগাঁও লোকসভা সমষ্টিৰ বাবে গৌৰৱ গগৈয়ে শীৰ্ষ নেতৃত্বৰ পছন্দৰ আছিল বুলি চর্চা চলি থকাৰ পিচত প্ৰাৰ্থিত্বৰ দৌৰত আগবাঢ়ি আছিল বৰ্তমানৰ সাংসদ প্ৰদ্যুৎ বৰদলৈ ।
গৌৰৱ গগৈয়ে যোৰহাট লোকসভা সমষ্টিৰ প্ৰাৰ্থী হ'ব বুলি বিৰোধী ঐক্যমঞ্চৰ নেতা অখিল গগৈয়ে মাত্ৰ দুটা দিন পূৰ্বে নগাঁৱত উপস্থিত হৈ স্পষ্ট মন্তব্য কৰাৰ এটা দিনৰ পিচৰে পৰা কংগ্ৰেছৰ প্ৰাৰ্থিত্বক লৈ যেন পুনৰ সলনি হৈছে দৃশ্যপট । বিগত দুটা দিনে হঠাৎ গৌৰৱ গগৈয়ে নগাঁৱত বাহৰ পাতি গাঁৱে-ভূঞে আৰম্ভ কৰিছে ব্যাপক প্ৰচাৰ অভিযান ।
বৃহস্পতিবাৰে নিশা নগাঁও আৱৰ্ত ভৱনত পূৰ্বৰ বটদ্ৰৱা সমষ্টিৰ বিধায়িকা শিবামণি বৰা আৰু নগাঁও লোকসভা সমষ্টিৰ অন্তৰ্গত লাহৰীঘাট বিধানসভা সমষ্টিৰ বিধায়ক আছিফ নজৰক লৈ সংবাদমেল সম্বোধন কৰাৰ পিচত শুকুৰবাৰৰ দিনটোত বিধায়িকা শিবামণি বৰাক লগত লৈ বটদ্ৰৱা সমষ্টিত প্ৰচাৰ চলাইছে গৌৰৱ গগৈয়ে । নগাঁও লোকসভা সমষ্টিৰ প্ৰাৰ্থিত্ব এই পৰ্যন্ত দলীয় নেতৃত্বই ঘোষণা কৰিব নোৱাৰাৰ সময়ত নগাঁৱত বাহৰ পাতি হঠাৎ সমষ্টিটোক লৈ গৌৰৱ গগৈ অধিক তৎপৰ হৈ পৰাৰ পিচতেই প্ৰদ্যুৎ বৰদলৈ প্ৰাৰ্থিত্বৰ পৰা বঞ্চিত হোৱাৰ সম্ভাৱনাই অধিক বুলি চর্চা আৰম্ভ হৈছে ৰাজনৈতিক মহলত ।
ইফালে আন এক সূত্ৰৰ মতে নগাঁও লোকসভা সমষ্টিত বিজেপিয়ে এগৰাকী সদ্য প্ৰাক্তন কংগ্ৰেছী সুৰেশ বৰাক প্ৰাৰ্থিত্ব দিয়াৰ পিচতেই সমষ্টিটো কংগ্ৰেছে দখল কৰাত যথেষ্ট সহজ হৈ পৰা বুলি ধাৰণা কৰি নগাঁও লোকসভা সমষ্টিৰ প্ৰাৰ্থিত্ব বিচাৰি ৰাহুল গান্ধীক অৱগত কৰিছে গৌৰৱ গগৈয়ে ।
চৰ্চিত নগাঁও লোকসভা সমষ্টিৰ প্ৰাৰ্থী চূড়ান্ত কৰাৰ ক্ষেত্ৰত প্ৰতি মুহূৰ্তত দৃশ্যপট সলনি হৈছে যদিও দুই এদিনতে হয়তো কংগ্ৰেছ নেতৃত্বই ঘোষণা কৰিব চূড়ান্ত প্ৰাৰ্থীৰ তালিকা । চূড়ান্ত তালিকা ঘোষণাৰ পিচতেই স্পষ্ট হ'ব নগাঁৱৰ প্ৰাৰ্থী গৌৰৱ গগৈ নে প্ৰদ্যুৎ বৰদলৈ ? নগাঁৱত গৌৰৱ গগৈয়ে প্ৰাৰ্থিত্ব লাভ কৰিলে কি কৰিব প্ৰদ্যুৎ বৰদলৈয়ে ? বিজেপিত যোগদান কৰিব নে দলে দায়িত্ব দিলে যোৰহাট অথবা কাজিৰঙা সমষ্টিৰ পৰাই নিৰ্বাচন খেলিব প্ৰদ্যুৎ বৰদলৈয়ে ।
লগতে পঢ়ক :দলে দিলে জালুকবাৰীতো নিৰ্বাচন খেলিবলৈ সাজু গৌৰৱ গগৈ
