নিউজ ডেস্ক, 25 জুন: লোকসভাত বিৰোধী দলৰ নেতা নিযুক্ত ৰাহুল গান্ধী । কংগ্ৰেছৰ জ্যেষ্ঠ নেতা কে চি বেণুগোপালে মঙলবাৰে নিশা এই ঘোষণা কৰি কয়, “চি পি পিৰ অধ্যক্ষ ছোনিয়া গান্ধীয়ে প্ৰ’টেম অধ্যক্ষ ভাৰ্ত্ৰুহৰি মেহতাবলৈ পত্ৰ লিখি ৰাহুল গান্ধীক লোকসভাত বিৰোধী দলৰ নেতা হিচাপে নিযুক্তি দিয়াৰ সিদ্ধান্তৰ বিষয়ে অৱগত কৰে ৷ অন্যান্য বিষয়ববীয়াৰ বিষয়ে পিচত সিদ্ধান্ত লোৱা হ’ব ।”
ইতিপূৰ্বে কংগ্ৰেছ ৱৰ্কিং কমিটী (CWC) ৰ ফালৰ পৰা বিৰোধী দলপতি হিচাপে ৰাহুল গান্ধীৰ নাম প্ৰস্তাৱ কৰা হৈছিল যদিও ৰাহুলে সেই প্ৰস্তাৱ অগ্ৰাহ্য কৰিছিল ৷ গতিকে স্বাভাৱিকতে প্ৰশ্ন উঠিছিল বিৰোধী দলপতি কোন হ’ব তাকে লৈ ৷ কিন্তু মঙলবাৰে নিশা কংগ্ৰেছৰ সভাপতি মল্লিকাৰ্জুন খাৰ্গেৰ বাসগৃত অনুষ্ঠিত ইণ্ডিয়া ব্লকৰ এক বৈঠকত বিৰোধী পক্ষত থকা কেউটা দলৰে সৰ্বসন্মত সিদ্ধান্ত মৰ্মে ৰাহুল গান্ধীকেই বিৰোধী দলপতি হিচাপে বাচনি কৰা হয় ৷ লগে লগে এই সৰ্বসন্মত সিদ্ধান্ত আনুষ্ঠানিকভাৱে প্ৰেৰণ কৰা হয় লোকসভাৰ প্ৰ’টেম অধ্যক্ষ ভাৰ্ত্ৰুহৰি মেহতাবলৈ ৷
5 টা কাৰ্যকাল সাংসদ হৈ থকা ৰাহুল গান্ধীয়ে বৰ্তমান লোকসভাত ৰায়বৰেলী সমষ্টিক প্ৰতিনিধিত্ব কৰিছে । সংবিধানৰ প্ৰতিলিপি হাতত লৈ মঙলবাৰে তেওঁ সাংসদ হিচাপে শপতগ্ৰহণ কৰে ।
