নতুন দিল্লী : ২৩ অক্টোবৰত এক ডাঙৰ অনুষ্ঠানৰ বাবে প্ৰস্তুতি চলাইছে কংগ্ৰেছে । কিয়নো সেইদিনা ১৩ নৱেম্বৰত অনুষ্ঠিত হ'বলগা ৱায়নাড় সংসদীয় উপ-নিৰ্বাচনৰ বাবে প্ৰিয়ংকা গান্ধীয়ে মনোনয়ন দাখিল কৰাৰ সম্ভাৱনা আছে । আনহাতে, তেওঁক সংগ দিব পাৰে লোকসভাৰ বিৰোধী দলৰ নেতা ৰাহুল গান্ধীয়ে । ১৩ নৱেম্বৰত অনুষ্ঠিত হ'বলগা ৱায়নাড় উপনিৰ্বাচনৰ বাবে মনোনয়ন দাখিলৰ অন্তিম তাৰিখ হৈছে ২৫ অক্টোবৰ । প্ৰাৰ্থিত্ব প্ৰত্যাহাৰৰ অন্তিম তাৰিখ হৈছে ৩০ অক্টোবৰ । ভোটগণনা অনুষ্ঠিত হ'ব ২৩ নৱেম্বৰত ।
দলৰ ভিতৰুৱা সূত্ৰৰ মতে, উপ-নিৰ্বাচনৰ মনোনয়ন দাখিলৰ দিনা এক ৰোড শ্ব'ৰ পৰিকল্পনা কৰা হৈছে । উল্লেখ্য যে ৰাহুল গান্ধীয়ে শেহতীয়া লোকসভা নিৰ্বাচনত ৱায়নাড়ৰ পৰা দ্বিতীয়বাৰৰ বাবে জয়ী হৈছিল । কিন্তু উত্তৰ ভাৰতৰ ৰাজ্যত দলটোক পুনৰুজ্জীৱিত কৰিব বিচৰা বাবে তেওঁ উত্তৰ প্ৰদেশৰ ৰায়বৰেলীৰ সংসদীয় আসনখনৰ পৰা সদনত প্ৰতিনিধিত্ব কৰা সিদ্ধান্ত গ্ৰহণ কৰি ৱায়নাড় আসনখন এৰি দিয়ে ।
আনহাতে, ৱায়নাড়ৰ ভোটাৰসকলৰ গান্ধী পৰিয়ালৰ সৈতে থকা আৱেগিক সম্পৰ্ক আৰু ২০২৬ চনৰ কেৰালা বিধানসভা নিৰ্বাচনৰ পূৰ্বে ইয়াৰ সুবিধা প্ৰদানৰ বাবে প্ৰিয়ংকাক ৰাহুলৰ পৰিৱৰ্ত হিচাপে ঘোষণা কৰা হয় । সূত্ৰ মতে, উপ-নিৰ্বাচনত ৱায়নাড়ক কংগ্ৰেছে শীৰ্ষ অগ্ৰাধিকাৰ প্ৰদান কৰিছে । এই কথা ইয়াৰ দ্বাৰাই মূল্যায়ন কৰিব পাৰি যে লোকসভাত আলাপুঝা আসনক প্ৰতিনিধিত্ব কৰা এ আই চি চিৰ ভাৰপ্ৰাপ্ত সংগঠনিক নেতা কে চি বেণুগোপালে ব্যক্তিগতভাৱে ইয়াৰ তদাৰক কৰি আছে ।
বেণুগোপাল আৰু কেৰালাৰ এ আই চি চিৰ ভাৰপ্ৰাপ্ত বিষয়া দীপ দাসমুন্সিৰ নেতৃত্বত কংগ্ৰেছে ২৫ ছেপ্টেম্বৰত অঞ্চলটোত স্থানীয় নেতাসকলৰ এক বৈঠক অনুষ্ঠিত কৰি ৱায়নাড় লোকসভা উপ-নিৰ্বাচনৰ বাবে প্ৰস্তুতি আৰম্ভ কৰে । তাৰ পিচত ৩ অক্টোবৰত অন্তুৰ আৰু থিৰুৱম্বাদি বিধানসভা সমষ্টিত বৈঠক অনুষ্ঠিত হয় । ইয়াৰ উপৰি প্ৰিয়ংকাৰ বাবে প্ৰচুৰ বিজয়ৰ ব্যৱধান নিশ্চিত কৰিবলৈ বেণুগোপালে ১৭ অক্টোবৰত কোজিকোডৰ মুক্কামত ইউ ডি এফ নেতাসকলৰ এখন বৈঠকত সভাপতিত্ব কৰে ।
"ৱায়নাড় হৈছে এক বিশেষ স্থান, যাৰ কংগ্ৰেছৰ সৈতে গভীৰ সম্পৰ্ক আছে । ৰাইজে প্ৰিয়ংকা গান্ধীক সংসদত তেওঁলোকৰ কণ্ঠস্বৰ হিচাপে নিৰ্বাচিত কৰিবলৈ আগ্ৰহী । ৰাজ্যখনত এটা নতুন অধ্যায় উন্মোচিত হ'বলৈ ওলাইছে । প্ৰিয়ংকা গান্ধী লোকসভাত আমাৰ কণ্ঠস্বৰ হিচাপে আগবাঢ়িবলৈ সাজু, আমাৰ অধিকাৰৰ বাবে যুঁজ দিবলৈ আৰু আমাৰ উদ্বেগবোৰ সমাধান কৰিবলৈ উচ্চ শিৰে থিয় দিছে । তেওঁৰ দ্বাৰা আমাৰ আকাংক্ষাবোৰ উচ্চ স্বৰত আৰু স্পষ্টভাৱে শুনা যাব । আহক একত্ৰিত হওঁ আৰু তেওঁক আমি সদায় ৰাহুল গান্ধীলৈ আগবঢ়াই অহাৰ দৰে একেই উষ্ণতা আৰু সমৰ্থন আগবঢ়াওঁ । আমি একেলগে ৱায়নাড়ৰ বাবে এক উজ্জ্বল ভৱিষ্যতৰ দিশত কাম কৰি যাওঁ আহক ।" কেৰালাৰ দায়িত্বত থকা এ আই চি চিৰ সম্পাদক মনচুৰ আলী খানে ইটিভি ভাৰতক কয় ।
তেওঁ কয় যে ৱায়নাড়ৰ জনসাধাৰণৰ ৰাহুল গান্ধীৰ সৈতে এক বিশেষ সম্পৰ্ক আছে । তেওঁ ২৪ জুনত তেওঁৰ পূৰ্বৰ সমষ্টিৰ ভোটাৰসকললৈ এক আৱেগিক পত্ৰ লিখি তেওঁৰ ভগ্নীৰ বাবে সমৰ্থন বিচাৰিছিল । "ৰাহুল গান্ধীয়ে কৈছিল যে যদিও তেওঁ ৰায়বৰেলীক বাছনি কৰিছে, তথাপিও ৱায়নাড়ৰ জনসাধাৰণৰ বাবে তেওঁৰ দুৱাৰ সদায় মুকলি থাকিব ।" খানে কয় ।
উল্লেখ্য যে উপ-নিৰ্বাচনত ক্ষমতাসীন এল ডি এফে চি পি আই নেতা সত্যম মোকেৰীক প্ৰিয়ংকাৰ বিৰুদ্ধে প্ৰাৰ্থিত্ব প্ৰদান কৰিছে । মুখ্য লোকসভা নিৰ্বাচনত ৰাহুল গান্ধীয়ে ভাৰতীয় কমিউনিষ্ট পাৰ্টীৰ মনোনীত এনি ৰাজাক 3.6 লাখ ভোটৰ ব্যৱধানত পৰাজিত কৰে । আনহাতে, কেৰালা বিজেপিৰ সভাপতি কে সুৰেন্দ্ৰনে ১.৪১ লাখ ভোট লাভ কৰি তৃতীয় স্থান লাভ কৰে । 2019 চনৰ লোকসভা নিৰ্বাচনত ৰাহুলে চি পি আই প্ৰাৰ্থী পিপি চুনিৰক অভিলেখ ব্যৱধানত পৰাস্ত কৰিছিল ।
