গুৱাহাটী, ১৭ মাৰ্চ: ভাৰতৰ নিৰ্বাচন আয়োগে শনিবাৰে দেশৰ ১৮ সংখ্যক লোকসভা নিৰ্বাচনৰ সময়সূচী ঘোষণা কৰাৰ লগে লগে আৰম্ভ হৈছে নিৰ্বাচনী তৎপৰতা । আজি কামৰূপ জিলা আয়ুক্তৰ কাৰ্যালয়ত আগন্তুক লোকসভা নিৰ্বাচন সন্দৰ্ভত আয়ুক্তই আয়োজন কৰে এক সংবাদমেল । এই সংবাদমেল সম্বোধন কৰি কামৰূপ জিলা আয়ুক্ত সুমিত ছাত্তাৱানে গুৱাহাটী লোকসভা সমষ্টিৰ বাবে চলোৱা প্ৰস্তুতি সম্পৰ্কে ব্য়াখ্য়া কৰে ।
কামৰূপ জিলা আয়ুক্ত সুমিত ছাত্তাৱানে কয়," গুৱাহাটী লোকসভা সমষ্টিৰ বাবে অহা ১২ এপ্ৰিলত গুৱাহাটী সমষ্টিৰ মনোনয়নৰ বাবে অধিসূচনা জাৰি কৰা হ'ব । অহা ১৯ এপ্ৰিলত মনোনয়নৰ দাখিলৰ শেষ দিন ধাৰ্য কৰা হৈছে ।" অৱশ্য়ে ৰঙালী বিহুৰ বন্ধৰ কেইদিনত মনোনয়নৰ জমা লোৱা নহ'ব কয় আয়ুক্ত সুমিত ছাত্তাৱানে । প্ৰাৰ্থীসকলে অহা ১২ এপ্ৰিলৰ পৰা ১৯ এপ্ৰিললৈ দিনৰ ১১ বজাৰ পৰা ৩ বজাৰ ভিতৰত মনোনয়ন জমা দিব পাৰিব । তেওঁ কয় যে ২০ এপ্ৰিলত পৰীক্ষণ হ'ব মনোনয়ন পত্ৰৰ আৰু ২২ এপ্ৰিলত মনোনয়নৰ প্ৰত্যাহাৰ প্ৰক্ৰিয়া আৰম্ভ হ'ব । মনোনয়ন পত্ৰ উপায়ুক্তৰ কাৰ্যালয়ত ৰিটাৰ্ণিং বিষয়াৰ হাতত দাখিল কৰিব লাগিব ।
কামৰূপ জিলা আয়ুক্ত সুমিত ছাত্তাৱানে উল্লেখ কৰে যে গুৱাহাটী লোকসভা সমষ্টি অধীনত মুঠ ১০ টা বিধানসভা সমষ্টি আছে । তেওঁ উল্লেখ কৰা মতে, মনিৰাম দেৱান বাণিজ্য়িক কেন্দ্ৰত হ'ব ষ্ট্ৰংৰূম আৰু ভোট গণনা । আয়ুক্ত সুমিত ছাত্তাৱানে উল্লেখ কৰা মতে, গুৱাহাটী লোকসভা সমষ্টিৰ ভোটাৰ সৰ্বমুঠ সংখ্যা হৈছে ২০ লাখ ১৯ হাজাৰ ৪৪৪ গৰাকী । ইয়াৰে ৯ লাখ ৯৩ হাজাৰ ২৬৮ জন পুৰুষ ভোটাৰ আৰু ১০ লাখ ২৬ হাজাৰ ১১৮ গৰাকী মহিলা ভোটাৰ । আনহাতে, ৫৮ গৰাকী তৃতীয় লিংগৰ ভোটাৰ আছে ।
ইপিনে, প্ৰাৰ্থীৰ প্ৰস্তাৱক সন্দৰ্ভত কামৰূপ জিলা আয়ুক্ত সুমিত ছাত্তাৱানে কয় যে ৰাষ্ট্ৰীয় দলৰ প্ৰাৰ্থীৰ বাবে এজন প্ৰস্তাৱক হ'লেই হ'ব । নিৰ্দলীয় প্ৰাৰ্থীৰ বাবে লাগিব ১০ জন প্ৰস্তাৱক । গুৱাহাটী লোকসভা সমষ্টিৰ বাবে সৰ্বমুঠ ভোট কেন্দ্ৰ হৈছে ২১৮১ টা । ইয়াৰে ১০২ টা ভোটকেন্দ্ৰ মহিলাৰ দ্বাৰা পৰিচালিত হ'ব । লগতে ১৫ টা আদৰ্শ ভোট কেন্দ্ৰ থাকিব গুৱাহাটীত সমষ্টিত । প্ৰতিটো মুহুৰ্তত নজৰত থাকিব ইভিএম মেচিন । ইভিএম কঢ়িওৱা বাহনত জিপিএছ সংযুক্ত থাকিব বুলিও তেওঁ কয় । এই সংবাদমেলত জিলা আয়ুক্তসহ জিলা নিৰ্বাচনী বিষয়াই অংশগ্ৰহণ কৰে ।
লগতে পঢ়ক:১৯ এপ্ৰিলত তিনিচুকীয়াত প্ৰথম পৰ্যায়ৰ ভোটগ্ৰহণ; ৭৫ টা স্পৰ্শকাতৰ পুলিং ষ্টেচন চিনাক্ত
