নিউজ ডেস্ক, ৩১ আগষ্ট : অসম বিধানসভাৰ নামাজ বিৰতি বিলুপ্ত কৰাৰ সিদ্ধান্তৰ পিছত দেশজুৰি সমালোচিত হৈছে ড৹ হিমন্ত বিশ্ব শৰ্মাই ৷ এই প্ৰসংগত আৰ জে ডি নেতা তেজস্বী যাদৱে ড৹ শৰ্মাক ‘যোগীৰ চীনা সংস্কৰণ’ আখ্যা দি মুখ্যমন্ত্ৰীগৰাকীয়ে সস্তীয়া জনপ্ৰিয়তা বিচাৰি থকা বুলি ক’লে শনিবাৰে ৷ যাদৱৰ উক্ত মন্তব্য প্ৰতিক্ৰিয়া প্ৰকাশ কৰিছে ঝাৰখণ্ড ভ্ৰমণত থকা ড৹ হিমন্ত বিশ্ব শৰ্মাই ৷
ড৹ শৰ্মাই কয় যে অসমত লোৱা এই সিদ্ধান্ত মুখ্যমন্ত্ৰীৰ নহয়, বিধানসভাত থকা হিন্দু-মুছলমান সকলো বিধায়কসকলৰ সামূহিক সিদ্ধান্ত এয়া ৷ অধ্যক্ষক জনোৱাৰ পিছতহে এই সিদ্ধান্ত লোৱা হৈছে ৷ উল্লেখ্য যে ১৯৩৭ চনত মুছলিম লীগে অসম বিধানসভাত এই প্ৰথা আৰম্ভ কৰিছিল ।
ৰাঁচী বিজেপিৰ ৰাজ্যিক কাৰ্যালয়ত, হিমন্ত বিশ্ব শৰ্মাই তেজস্বী যাদৱৰ বক্তব্যৰ প্ৰতিক্ৰিয়া কৰি কয়, ‘‘বিহাৰ, ঝাৰখণ্ডৰ বিধানসভাকে ধৰি দেশৰ লোকসভা আৰু ৰাজ্যসভাতো জুম্মা বিৰতিৰ কোনো ব্যৱস্থা নাই ৷ যদি তেওঁ ভাবে যে এইটো বিচাৰে, তেন্তে তেওঁ প্ৰথমে বিহাৰত চাৰি ঘণ্টাৰ জুম্মা বিৰতি আৰম্ভ কৰিব নিবিচাৰে কিয় ? যেতিয়া তেওঁ উপ-মুখ্যমন্ত্ৰী আছিল, তেতিয়া তেওঁ এনেধৰণৰ ব্যৱস্থা কৰিব পাৰিলেহেঁতেন ৷’’
মুখ্যমন্ত্ৰী ড৹ হিমন্ত বিশ্ব শৰ্মাই কয়, ‘‘হজৰত মহম্মদে কৈছিল যে মিঠাই খোৱা বন্ধ কৰাবলৈ, প্ৰথমে নিজে মিঠাই খোৱা বন্ধ কৰা উচিত । একেদৰে, যদি কোনো ৰাজ্যই অনুভৱ কৰে যে এইটো শুদ্ধ, তেন্তে চাৰি ঘণ্টাৰ জুম্মা বিৰতি আৰম্ভ কৰক ৷ তাৰ পিচত আনক পৰামৰ্শ দিব ৷
ঝাৰখণ্ড বিধানসভাত শুকুৰবাৰৰ বিৰতিৰ ব্যৱস্থা নাই :
ঝাৰখণ্ড বিধানসভাত শুকুৰবাৰে বিৰতিৰ কোনো ব্যৱস্থা নাই । অৱশ্যে, শুকুৰবাৰৰ প্ৰাৰ্থনা কৰিবলৈ দুপৰীয়া ১২.৩০ বজাত সদন স্থগিত ৰখাৰ পৰম্পৰা আছে । ২০২১ চনত, বিধানসভাত প্ৰাৰ্থনা কোঠা আৱণ্টন দিয়া হৈছিল । ইয়াৰ বাবে, বিধানসভা সচিবালয়ৰ দ্বাৰা এক নিৰ্দেশনা জাৰি কৰা হৈছিল । যাক লৈ পিছত যথেষ্ট বিতৰ্কৰ সৃষ্টি হৈছিল আৰু বিৰোধীয়ে বিষয়টো উচ্চ ন্যায়ালয়লৈ লৈ গৈছিল ৷
পৰৱৰ্তী সময়ত বিধানসভাৰ দ্বাৰা সাতজনীয়া বিধায়কৰ এটা দল গঠন কৰা হৈছিল আৰু সেই সমিতিয়ে ২০২৩ চনৰ ৩১ জুলাইত প্ৰতিবেদন দাখিল কৰিছিল । প্ৰতিবেদনখনত দেশৰ আন ৰাজ্যসমূহৰ উদ্ধৃতি দিয়া হৈছিল । বিষয়টো এতিয়াও আদালততে আছে । অৱশ্যে, অসমত জুম্মা বিৰতিৰ ব্যৱস্থা বিলুপ্ত হোৱাৰ লগে লগে দেশৰ ৰাজনীতিত বিষয়টোৱে যথেষ্ট চৰ্চা লাভ কৰিছে ৷
লগতে পঢ়ক : সস্তীয়া জনপ্ৰিয়তা বিচাৰি মুছলমানক লক্ষ্য কৰি লৈছে হিমন্ত বিশ্ব শৰ্মাই : তেজস্বী যাদৱ
