গুৱাহাটী, ২৮ জুন: শুকুৰবাৰে লোকসভাৰ অধ্যক্ষ হিচাপে একেৰাহে দ্বিতীয়বাৰৰ বাবে দায়িত্বভাৰ গ্ৰহণ কৰা ওম বিৰলাক কেন্দ্ৰীয় কেবিনেট মন্ত্ৰী সৰ্বানন্দ সোণোৱালৰ নেতৃত্বত অসমৰ এনডিএৰ সাংসদসকলে সংসদ ভৱনত সাক্ষাৎ কৰি উষ্ম অভিনন্দন জ্ঞাপন কৰে । লগতে লোকসভাৰ অধ্যক্ষগৰাকীৰ লগত অসমৰ সাংসদসকলে সৌহাৰ্দপূৰ্ণ বাৰ্তালাপতো মিলিত হয় । এখনি ফুলাম গামোচাৰে অধ্যক্ষ বিৰলাক সম্ভাষণ জনায় অসমৰ সাংসদ কেইগৰাকীয়ে ।
এই সাক্ষাতত অসমৰ প্ৰাক্তন মুখ্যমন্ত্ৰী তথা বৰ্তমানৰ কেন্দ্ৰীয় বন্দৰ, জাহাজ আৰু জলপথ মন্ত্ৰী সোণোৱালে অসমৰ এনডিএৰ এইবাৰ নিৰ্বাচিত সাংসদসকলক অধ্যক্ষগৰাকীৰ সন্মুখত চিনাকি কৰাই দিয়ে । ৰাজস্থানৰ কোটা সমষ্টিক প্ৰতিনিধিত্ব কৰা ওম বিৰলা যোৱা ২৬ জুনত অষ্টাদশ লোকসভাৰ প্ৰথম অধিৱেশনৰ প্ৰথম দিনা দ্বিতীয়বাৰৰ বাবে অধ্যক্ষ নিৰ্বাচিত হৈছিল ।
অসমৰ এনডিএৰ সাংসদৰ প্ৰতিনিধিৰ দলটোত দলটোত সৰ্বানন্দ সোণোৱালৰ ওপৰিও বিজেপিৰ পৰিমল শুক্লবৈদ্য, কামাখ্যা প্ৰসাদ তাছা, বিজুলী কলিতা মেধি, ৰঞ্জিত দত্ত, দিলীপ শইকীয়াৰ লগতে ইউপিপিএলৰ জয়ন্ত বসুমতাৰীক দেখা যায় ৷ অৱশ্যে ডিফুৰ সাংসদ বিজেপিৰ অমৰ সিং টিছ’ৰ উপৰিও বঙাইগাঁৱৰ সাংসদ অগপৰ ফণীভূষণ চৌধুৰীকো লোকসভাৰ অধ্যক্ষ ওম বিৰলাক আজি সাক্ষাৎ কৰা দলটোত দেখা পোৱা যায় ।
উল্লেখ্য যে, বুধবাৰে নেচনেল ডেম’ক্ৰেটিক এলায়েন্স চমুকৈ এন ডি এৰ প্ৰাৰ্থী তথা কোটাৰ সাংসদ ওম বিৰলাক ১৮ সংখ্যক লোকসভাৰ অধ্যক্ষ হিচাপে নিৰ্বাচিত কৰা হয় । লোকসভাৰ অধ্যক্ষ পদৰ বাবে ধ্বনিভোটৰ জৰিয়তে নিৰ্বাচিত কৰা হয় ওম বিৰলাক । প্ৰধানমন্ত্ৰী নৰেন্দ্ৰ মোদীয়ে উত্থাপন কৰা প্ৰস্তাৱক প্ৰতিৰক্ষা মন্ত্ৰী ৰাজনাথ সিঙে সমৰ্থন কৰাৰ পাচত সদনে ধ্বনিভোটৰ জৰিয়তে ভোটদান কৰে ।
