কংগ্ৰেছে চিন্তা কৰে আৰু আমি চৰকাৰ গঠন কৰো: পীযুষ হাজৰীকা - Lok Sabha Election 2024

Pijush Hazarika visits Hojai : খহনীয়া পৰিদৰ্শনৰ বাবে হোজাইত দিনযোৰা কাৰ্যসূচীৰে উপস্থিত মন্ত্ৰী পীযুষ হাজৰীকা ৷ মন্ত্ৰীগৰাকীয়ে এগজিট প’ল সন্দৰ্ভতো প্ৰকাশ কৰে প্ৰতিক্ৰিয়া ৷ ইফালে মন্ত্ৰীৰ উপস্থিতিক লৈ একাংশ লোক ক্ষুব্ধ ৷ কিহৰ বাবে এইসকল লোক ক্ষুব্ধ হ’ল চাওক এই প্ৰতিবেদনত ৷

হোজাই, 2 জুন: দিনযোৰা কাৰ্যসূচীৰে হোজাইত উপস্থিত হোৱা ৰাজ্য চৰকাৰৰ কেবিনেট মন্ত্ৰী পীযুষ হাজৰীকাই এগজিট প’ল সন্দৰ্ভত কৰিলে মন্তব্য ৷ মন্ত্ৰীগৰাকীয়ে প্ৰকাশ কৰা অনুসৰি, বিগত দহ বছৰত প্ৰধানমন্ত্ৰীয়ে যি কাৰ্য কৰিছে, তাৰে ভিত্তিতে জনতাই তেওঁক তৃতীয়বাৰৰ বাবে প্ৰধানমন্ত্ৰীৰ পদত বিচাৰিছে ৷ তদুপৰি এগজিট প’লে যি সমীক্ষা প্ৰকাশ কৰিছে, সেয়া বিজেপিৰ বাবে সন্তোষজনক বুলি মন্তব্য কৰে পীযুষ হাজৰীকাই ৷

তদুপৰি এইবেলি লোকসভা নিৰ্বাচনত এন ডি এ 400 খন আসন লাভ কৰিব ৷ অসমত 14 খন আসনৰ ভিতৰত 12 খন আসনে বিজেপিয়ে লাভ কৰিব বুলিও মন্ত্ৰীগৰাকীয়ে সদৰী কৰে ৷

লগতে পঢ়ক: এগজিট প’লৰ সমীক্ষাক অস্বীকাৰ বিধায়ক অখিল গগৈৰ - Lok Sabha Election 2024

বিৰোধী দল কংগ্ৰেছক কঠোৰ সমালোচনা কৰি মন্ত্ৰীগৰাকীয়ে কয় যে, কংগ্ৰেছে যি সময়ত চিন্তা কৰে, সেই সময়ত বিজেপিয়ে চৰকাৰ গঠন কৰে ৷ কংগ্ৰেছে বিগত সময়তো প্ৰতিটো নিৰ্বাচনৰ সময়তে আসন দখলত থকা কথা প্ৰকাশ কৰিছিল ৷ পিছে সেয়া কাৰ্যত শূন্য হোৱা দেখা গৈছিল ৷ এইবাৰো একে হ’ব ৷ কাৰণ ৰাইজৰ সৈতে বিজেপি আছে, ভুৱা প্ৰতিশ্ৰুতি দিয়া দলৰ সৈতে অসমৰ ৰাইজ নাথাকে বুলি মন্ত্ৰী পীযুষ হাজৰীকাই বিৰোধী দলটোক সমালোচনাৰে থকা-সৰকা কৰে ৷

উল্লেখ্য যে, নৰেন্দ্ৰ মোদীয়ে 45 ঘণ্টীয়া আধ্যাত্মিক ধ্যান সফলতাৰে সম্পূৰ্ণ কৰাৰ পাছত লিখা লিখনি সন্দৰ্ভতো মন্তব্য কৰে মন্ত্রী হাজৰীকাই ৷