গুৱাহাটী, ৪ জুন : অৱশেষত খোল খালে ই ভি এম । লগে লগে আৰম্ভ হ'ল ফলাফলকলৈ উৎকণ্ঠা । আজি নিৰ্ণয় হ'ব গুৱাহাটী লোকসভা সমষ্টিৰ আঠগৰাকী প্ৰাৰ্থীৰ ভাগ্য । কোন যাব দিল্লীলৈ ? আজি বিয়লিলৈ সেয়া নিৰ্ণয় হ'ব । প্ৰতিকূল বতৰৰ মাজতে গুৱাহাটী লোকসভা সমষ্টিৰ বাবে তিনিটা স্থানত ভোটগণনাৰ ব্যৱস্থা কৰা হৈছে । কামৰূপ মহানগৰ জিলাত গুৱাহাটীৰ মণিৰাম দেৱান ট্ৰেড চেণ্টাৰৰ উপৰিও কামৰূপ জিলা আয়ুক্তৰ কাৰ্যালয় আৰু গোৱালপাৰা জিলা আয়ুক্তৰ কাৰ্যালয় চৌহদত ভোটগণনাৰ ব্যৱস্থা কৰা হৈছে । পুৱা ৮ বজাৰৰ লগে লগে আৰম্ভ হৈছে ভোটগণনা । উল্লেখ্য যে, গুৱাহাটী লোকসভা সমষ্টিত তৃতীয় পৰ্যায়ত অৰ্থাৎ ৭ মে’ত নিৰ্বাচন অনুষ্ঠিত হৈছিল ।
ভোট গণনাৰ দিনটোতে পুৱাই মহানগৰীত দেখা গ’ল লোকসভা নিৰ্বাচনৰ প্ৰাৰ্থী মীৰা বৰঠাকুৰক ৷ কাউণ্টিং এজেণ্টে যাতে পৰিপাটিকৈ কামবোৰ আগবঢ়াই নিয়ে তাৰ আশা ব্যক্ত কৰে তেওঁ ৷ লগতে উল্লেখ কৰে যে পাঁচটা সমষ্টিৰ কাউণ্টিং এজেণ্টৰ কাষলৈ যাব তেওঁ ৷ মনত উৎসাহ যোগাবলৈ তেওঁলোকৰ ওচৰলৈ যাব মীৰা বৰঠাকুৰ ৷ আত্মবিশ্বাস নাথাকিলে যুদ্ধলৈ যাবই নোৱাৰিব বুলি মন্তব্য কৰে মীৰা বৰঠাকুৰে ৷ তেওঁ কয় যে যুদ্ধলৈ যাওতে আপুনি আত্মবিশ্বাসৰ সৈতে জয়ী হ’ম বুলিয়ে যাব লাগিব ৷ যুদ্ধ যেতিয়া কৰিব দুটা ফল হ’ব, হয় জয় নহয় পৰাজয়, এই মানসিকতাৰে তেওঁ ফলাফললৈ সাজু হৈ থকাৰ ইংগিত দিয়ে ৷
লোকসভা নিৰ্বাচনৰ ফলাফলৰ লাইভ আপডেটৰ বাবে ক্লিক কৰক- https://www.etvbharat.com/as/!elections/lok-sabha-election-results-2024
কামৰূপ মহানগৰ জিলাৰ ভোটগণনা ব্যৱস্থা : কামৰূপ মহানগৰ জিলাৰ পাঁচটা বিধানসভা সমষ্টিৰ প্ৰতিটোৰে ১৪ খনকৈ মুঠ ৭০ খন টেবুলত ভোট গণনাৰ ব্যৱস্থা কৰা হৈছে । মহানগৰীৰ মণিৰাম দেৱান ট্ৰেড চেণ্টাৰত কামৰূপ মহানগৰ নিৰ্বাচন জিলাৰ মুঠ ১০২৬ টা ই ভি এমৰ ভোটগণনা হ'ব । জিলাখনৰ অন্তৰ্গত দিছপুৰ, ডিমৰীয়া, নিউ গুৱাহাটী, গুৱাহাটী চেণ্ট্ৰেল আৰু জালুকবাৰী বিধানসভা সমষ্টি প্ৰতিটোৰ বাবে ১৪ খনকৈ মুঠ ৭০ খন টেবুলত ভোট গণনাৰ ব্যৱস্থা কৰা হৈছে । তদুপৰি পোষ্টেল বেলট গণনাৰ বাবে আন ১০ খন টেবুলৰ ব্যৱস্থা কৰা হৈছে । দিছপুৰ বিধানসভা সমষ্টিত ১৬ ৰাউণ্ড, ডিমৰীয়াত ১৭ ৰাউণ্ড, নিউ গুৱাহাটীত ১৪ ৰাউণ্ড, গুৱাহাটী চেণ্ট্ৰেলত ১৪ ৰাউণ্ড আৰু জালুকবাৰীত ১৫ ৰাউণ্ড গণনাৰে সম্পন্ন কৰা হ'ব কামৰূপ মহানগৰ নিৰ্বাচন জিলাৰ ভোটগণনা ।
ভাগ্য নিৰ্ণয় হ'বলগীয়া গুৱাহাটী সমষ্টিৰ ৮ গৰাকী প্ৰাৰ্থী :
- বিজেপিৰ বিজুলী কলিতা মেধি
- কংগ্ৰেছৰ মীৰা বৰঠাকুৰ গোস্বামী
- ভাৰতীয় গণ পৰিষদৰ সামাদ চৌধুৰী
- বহুজন মহাপাৰ্টিৰ চেজন গয়াৰী
- একম সনাতন ভাৰত দলৰ অমিতাভ শৰ্মা
- ভোটাৰ্চ পাৰ্টী ইন্টাৰনেচনেল দলৰ দীপক কুমাৰ বড়ো
- নিৰ্দলীয় প্ৰাৰ্থী কাজি নেকিব আহমেদ
- নিৰ্দলীয় প্ৰাৰ্থী কৰ্ণেল গোকুল চন্দ্ৰ সিংহ
এইবাৰ গুৱাহাটী লোকসভা সমষ্টিত ভোটদানৰ হাৰ আছিল ৭৮.৩৯ শতাংশ । গুৱাহাটী লোকসভা সমষ্টিৰ অন্তৰ্গত দহটা বিধানসভা সমষ্টিৰ ভোটদানৰ হাৰ আছিল এনেধৰণৰ :
- পশ্চিম গোৱালপাৰা - ৮৭.০৪ শতাংশ
- দুধনৈ - ৮৫.৯৯ শতাংশ
- চমৰিয়া - ৮৯.৮৯ শতাংশ
- বকো-ছয়গাঁও - ৮০.৭০ শতাংশ
- পলাশবাৰী - ৮০.০৯ শতাংশ
- দিছপুৰ - ৬৯.৭৯ শতাংশ
- ডিমৰীয়া - ৭৬.৯৪ শতাংশ
- নিউ গুৱাহাটী - ৬৭.৯৩ শতাংশ
- গুৱাহাটী চেণ্ট্ৰেল - ৭১.২৪ শতাংশ
- জালুকবাৰী - ৭৬.৫০ শতাংশ
দহটা বিধানসভা সমষ্টিৰে গঠিত গুৱাহাটী লোকসভা সমষ্টিৰ মুঠ ভোটাৰৰ সংখ্যা হৈছে ২০,৩৬,৮৪৬ গৰাকী । ইয়াৰে ১৫,৯৬,৬৬৪ গৰাকী ভোটাৰে ভোটদান সাব্যস্ত কৰিছিল । ভোটদানৰ হাৰ ৭৮.৩৯ শতাংশ । লক্ষণীয় যে বেছিভাগ সময় কংগ্ৰেছৰ দখলত থকা গুৱাহাটী লোকসভা সমষ্টিটোত কোনো এটা দল নাইবা প্ৰাৰ্থীক সমষ্টিবাসীয়ে দুবাৰৰ বেছি থাকিবলৈ দিয়া নাই যদিও বিজেপিৰ ক্ষেত্ৰত ব্যতিক্ৰম দেখা গৈছিল । বিগত তিনিটা নিৰ্বাচনত সমষ্টিটোৰ ৰাইজে বিজেপিৰ পক্ষতে সমৰ্থন আগবঢ়াই আহিছে । আনহাতে বিগত তিনিটা কাৰ্যকালত গুৱাহাটী সমষ্টিটো মহিলাই প্ৰতিনিধিত্ব কৰি আহিছে । এইবাৰো আছে মহিলা প্ৰাৰ্থী । সমষ্টিটোৰ ৰাইজে এইবাৰ কাক দিল্লীলৈ পঠিওৱাৰ বাবে ভোটদান কৰিলে সেয়া আজিৰ ফলাফলতহে জানিব পৰা যাব ।
লগতে পঢ়ক : অসমৰ পৰা কোন কোন যাব দিল্লীৰ মচনদলৈ ? - LOK SABHA ELECTION RESULTS 2024
