যোৰহাটৰ ফলাফলে সলনি কৰিছে ৰাজনৈতিক প্ৰেক্ষাপট : বিজেপিৰ টাৰ্গেট এটা বিশেষ সম্প্ৰদায়ক ! - Politics of religious frenzy

Communal politics: ধৰ্মীয় উন্মাদনাৰ ৰাজনীতি । যোৰহাটৰ পৰাজয়ৰ পাচত উদ্বিগ্ন বিজেপি দল আৰু চৰকাৰৰ । পঞ্চায়ত আৰু ২০২৬ ৰ বিধানসভা নিৰ্বাচনৰ প্ৰতি লক্ষ্য ৰাখি বিশেষ ৰণকৌশল বিজেপিৰ । ধৰ্মীয় মেৰুকৰণৰ বিশেষ কৌশল । ভোট আদায়ৰ নতুন কৌশলৰে এটা বিশেষ সম্প্ৰদায়ক টাৰ্গেট কৰি বক্তব্য মুখ্যমন্ত্ৰী আৰু মন্ত্ৰী পীযুষ হাজৰীকাৰ ।

গুৱাহাটী, ২৮ জুন: সদ্যসমাপ্ত লোকসভা নিৰ্বাচনৰ পাচতে ৰাজ্যৰ ৰাজনৈতিক বাতাবৰণ সলনি হ'বলৈ ধৰিছে । বিশেষকৈ যোৰহাট লোকসভা সমষ্টিৰ ফলাফলে সলনি কৰিছে ৰাজনৈতিক প্ৰেক্ষাপট । বৃদ্ধি পাইছে ধৰ্মীয় উন্মাদনা । যোৰহাটৰ পৰাজয়ক সহজভাৱে ল'ব পৰা শাসকীয় বিজেপি দলে । নিজৰ ভোট বেংক বুলি গণ্য কৰি অহা উজনিত ভোট হ্ৰাস পোৱাক লৈ একপ্ৰকাৰ উদ্বিগ্ন হৈ পৰিছে বিজেপি দল আৰু চৰকাৰ ।

সন্মুখত উপনিৰ্বাচন আৰু পঞ্চায়ত নিৰ্বাচন, তাৰ পিচত ২০২৬ চনত বিধানসভা নিৰ্বাচন । গতিকে তেনেস্থলত বিজেপি দল আৰু চৰকাৰ শংকিত হোৱাটো স্বাভাৱিক । আনহাতে সদ্যসমাপ্ত লোকসভা নিৰ্বাচনত কংগ্ৰেছ দলে একচেটিয়াভাৱে সংখ্যালঘু সম্প্ৰদায়ৰ সমৰ্থন আদায় কৰিবলৈ সক্ষম হোৱাৰ উপৰিও বহু বিধানসভা সমষ্টিত খিলঞ্জীয়া লোকৰো সমৰ্থন আদায় কৰিবলৈ সক্ষম হৈছে । যাৰ বাবে এতিয়া হিন্দু আৰু মুছলমানৰ ৰাজনীতি প্ৰকট হৈ পৰিছে । ধৰ্মীয় উন্মাদনাৰ এক বাতাবৰণ গঢ়ি তোলা হৈছে ।

মুখ্যমন্ত্ৰীৰ বক্তব্যত টাৰ্গেট এটা বিশেষ সম্প্ৰদায়ক:

অলপতে মুখ্যমন্ত্ৰী হিমন্ত বিশ্ব শৰ্মাই বাজপেয়ী ভৱনত আয়োজন কৰা এক সম্বৰ্ধনা অনুষ্ঠানত সংখ্যালঘু সম্প্ৰদায়ৰ লোকসকলক লক্ষ্য কৰি লৈছিল । কংগ্ৰেছক ভোট দিয়া ৯৯ শতাংশ লোক বাংলাদেশী মূলৰ মুছলমান বুলি মন্তব্য কৰাৰ লগতে মুখ্যমন্ত্ৰীয়ে নিৰ্বাচনৰ সময়ত হোৱা কেতবোৰ ঘটনাৰ প্ৰসংগৰে সংখ্যালঘু লোকসকলক টাৰ্গেট কৰি লৈছিল ।

লগতে পঢ়ক: সংখ্যালঘুৰ বিৰুদ্ধে মুখ্যমন্ত্ৰীৰ ক্ষোভৰ উদগীৰণ : সমগ্ৰ অসমখন দখল কৰাৰ লক্ষ্য বাংলাদেশী মূলৰ মুছলমানৰ ! - Himanta Biswa Sarma

মুখ্যমন্ত্ৰীৰ মতে অসমৰ বাংলাদেশী মূলৰ সংখ্যালঘু সম্প্ৰদায়ৰ লক্ষ্য আগন্তুক ১০ বছৰত সমগ্ৰ অসমখন দখল কৰা । নিৰ্বাচনী আচৰণ বিধি প্ৰযোজ্য হৈ থকা বাবে ৰাজ্যখনৰ বিজেপি চৰকাৰ মাত্ৰ এমাহ নিষ্ক্ৰিয় হৈ থাকোতেই তিনিটাকৈ ভয়ংকৰ আগ্ৰাসনৰ কাণ্ড চলালে সংখ্যালঘু লোকসকলে । মুখ্যমন্ত্ৰীয়ে একপ্ৰকাৰে সংখ্যালঘু লোকসকল কংগ্ৰেছৰ পক্ষত থকাৰ কথা কৈ হিন্দুসকলক ভৱিষ্যতৰ পৰিস্থিতিৰ আভাস দি বিজেপিৰ পক্ষত একত্ৰিত হোৱাৰ এক বাৰ্তা দিব বিচাৰিছে ।

মুখ্যমন্ত্ৰীৰ সুৰতে সুৰ মিলাই মন্ত্ৰী পীযুষ হাজৰীকাৰো টাৰ্গেট সংখ্যালঘু সম্প্ৰদায়ক:

মুখ্যমন্ত্ৰী হিমন্ত বিশ্ব শৰ্মাৰ পাচতে মন্ত্ৰী পীযুষ হাজৰীকায়ো এটা বিশেষ সম্প্ৰদায়ৰ প্ৰসংগৰে সংখ্যালঘু সম্প্ৰদায়ৰ লোকসকলক টাৰ্গেট কৰা পৰিলক্ষিত হৈছে । প্ৰথমতে মন্ত্ৰীগৰাকীয়ে সামাজিক মাধ্যমযোগে নিৰ্বাচনৰ সময়ৰ আৰু পাচৰ কেতবোৰ ঘটনাৰ প্ৰসংগ উল্লেখ কৰে । লগতে ঘটনাৰ লগত জড়িত সকলৰ নাম উল্লেখ কৰি বিশেষ সম্প্ৰদায়টোক উদ্দেশ্য কৰি খিলঞ্জীয়াৰ ওপৰত চলা অত্যাচাৰৰ বৰ্ণনা কৰে ।

তাৰ পিচত সাংবাদ মাধ্যমৰ আগত মন্ত্ৰীগৰাকীয়ে কয় যে যোৰহাট সমষ্টিত বিজেপি দলৰ পৰাজয় আৰু কংগ্ৰেছৰ জয়ৰ পাচৰে পৰা এটা বিশেষ সম্প্ৰদায় অসমৰ বিভিন্ন ঠাইত আক্ৰমণাত্মক হৈ উঠিছে । বৃহস্পতিবাৰে নলবাৰীত সংবাদ মাধ্যমৰ আগত মন্ত্ৰী হাজৰীকাই নাম উল্লেখ নকৰাকৈয়ে এটা বিশেষ সম্প্ৰদায়ক আক্ৰমণৰ লক্ষ্য কৰি লোৱাৰ পাচতে মুখ্যমন্ত্ৰী ড৹ হিমন্ত বিশ্ব শৰ্মায়ো মন্ত্ৰীজনৰ অভিযোগক মুকলিভাৱে সমৰ্থন কৰি সেই বিশেষ সম্প্ৰদায়টোৰ বিৰুদ্ধে ধর্ষণ, দলবদ্ধ আক্ৰমণৰ দৰে একাধিক গুৰুতৰ অভিযোগ উত্থাপন কৰে ।

লগতে পঢ়ক: প্ৰসংগ সাম্প্ৰদায়িক বক্তব্য : মন্ত্ৰী পীযুষ হাজৰীকাক যোৱা তিনি বছৰৰ অপৰাধৰ তথ্য় বিচাৰিলে বিধায়ক ৰফিকুল ইছলামে - Pijush Hazarika controversial post

মন্ত্ৰী পীযুষ হাজৰীকাৰ অভিযোগ, ‘‘অসমীয়া মানুহৰ ওপৰত এটা বিশেষ সম্প্ৰদায়ৰ লোকসকলে আক্ৰমণ কৰিছে । অসমীয়াক বা খিলঞ্জীয়াক আক্ৰমণৰ লক্ষ্য কৰি লৈছে । এয়া আমাৰ বাবে অশনি সংকেত । চৰকাৰে এনে কাৰ্য কঠোৰ হাতেৰে দমন কৰাৰ বাবে চেষ্টা চলাইছে । ৰাইজেও এইবিলাক কথা ভাবিব লাগে ।’’

আনহাতে মন্ত্ৰী পীযুষ হাজৰীকাৰ অভিযোগক সমর্থন জনাই মুখ্যমন্ত্ৰী হিমন্ত বিশ্ব শর্মাই কয়, ‘‘তিনি বছৰে শান্ত হৈ থকা অসমখনক কিছুমান বিশেষ লোকে লাহে লাহে অশান্ত কৰাৰ বাবে আগবাঢ়িছে । লোকসভা নিৰ্বাচনৰ পাচত এনে কেইবাটাও ঘটনা সংঘটিত হৈছে । মাজবাট, ঢেকিয়াজুলি, কোকৰাঝাৰ, বৰপেটা আদিত ধর্ষণ, সংঘবদ্ধ আক্ৰমণৰ ঘটনা সংঘটিত হৈছে । এই বিষয়টোৱে আমাক চিন্তিত কৰিছে । ইয়াৰ উত্তৰ আমি বিচাৰি উলিয়াম । সামাজিক পৰ্যায়ত ৰাইজে চিন্তা কৰিব লাগে যে কিহৰ কাৰণে এই সকল লোকে হঠাৎ মূৰ দাঙি উঠিলে ।’’